Ads by Google Ads by Google

Onosa’i I Mea Tiga

Vaega: 62

 

Alo maia, o le a toe fa’aauau atu la tatou tala mo lenei aso. Na muta mai la tatou tala, a’o faia pea le talatalanoaga a Lefefe, Mose ma le to’alua o Lusia, le tamaloa o Vesi. O lea la e tautala sa’o lava Lefefe ma Vesi i uiga na fa’aali e le teine, lea ua naunau i ai le loto o Lilo. O lea fo’i lava ua mafaufau le toeaina o Mose e sili pe a fai vave loa le talanoaga ma lona atali’i, se manu o lo’o lava le taimi.

 

Fai mai le tala, ua tau le alu sa’o i totonu le fa’alifu talo a le toeaina o Mose, ua le mautonu le loto ma le mafaufau, o le ala fo’i lea ua tau le manogi ai se mea’ai. O tulaga lava ia e o’o ia i tatou, a tele mea e mafaufau i ai, pe i ai fo’i se mea o mamafa i le loto, e avea ma ala e tutupu mai ai ma’i. Ae ia o tatou maua pea le fiafia, ma tu’u atu o tatou loto i le Atua i taimi uma e lutia ai si a tatou faigamalaga i puapuaga ma faitaga o le soifuaga nei.

 

O lo’o mafatia le loto ma le mafaufau o Mose, ae fa’alogo atu, ua na o le sao o le talie, a Malia ma Lonisi. “Leaga lava lo’omatutua e fa’aletonuga tele, ai fo’i o mulu ane se nofoaga o se isi lo’omatua, ana o a’u na faia nei mea o lo’omatutua, se manu e fa’auu uma i lalo ulu, ina ia ‘aua ne i toe tautatala ma fai fua tala o isi tagata, aua o le mea lava lea e tutupu ai fa’alavelave.”

 

Ua alu aso sau fo’i aso, ua amata lava ona le toe talatalanoa Lilo ia Loleta, o le mana’oga fo’i o matua o Loleta ua taofi e le toeaina o Mose ma Malia, ma le tala e fa’apea, se i sau se taimi, ae tu’u pea se i fa’ata’ata’a, ma ia lava fo’i se mafutaga a Lilo ma Loleta, ma ua fa’apea lava ona fai.

 

Ae fai mai, ina ua o’o ane Loleta i le aiga o Lilo, se e le pupula sa’o ane i ai le lo’omatua o Malia, e u ane i ai ona autafa. Ae fai mai le tala, i le aso na o’o ane ai Loleta i le aiga o Lilo, ua matua’i fai lelei le puletasi fe’ila’ila a le tamata’ita’i, ae e le ave’esea lava ana vali, ma ona se’evae muliu’umi.

 

Fai mai, po’o le a lava sikaili a Loleta na fai ane i lea aso, e pei o le ‘selo i le mafaufau o le lo’omatua o Malia. Na matua’i fuli Lilo e polili teuteu mea uma, ina ia malilie loto o ona matua i a Loleta. Fai mai, e le i saofafa’i lelei ifo i lalo Lilo ma Loleta, ae oso ane loa ma le teine o Filipina.

 

“Lilo, oi ua ta fa’apea, ai o le lalelei o amoa lea ua oulua o mai, a’o lenei e sili ai……” Ua toe tu le teine ma tilotilo ane i si ona tuagane e pele i lona loto. “Oi Lilo, o Loleta le na ua lua o mai.” Ua le tautala le tama ae ua na o le punou ifo i lalo ma lona loto fa’anoanoa i lona tuafafine.

 

E moni lava le upu, e nana lava le tama’i moa, ae ioio mai lava, na iloa mamao atu lava e le lo’omatua o Malia, le savali mai a Loleta, ua ma’i tagata. Fai mai na suia ai i’ina mea uma, i le mafaufau o le lo’omatua o Malia. Ua oso a’e le alofa ma le naunau i lona loto ina ia fai vave loa le fa’aipoipoga.

 

O le manatu fo’i o le lo’omatua, e fa’apea, leitioa fo’i a naunau le lo’omatua o Susitina ia fai loa le fa’aipoipoga, ona o lea ua aliali a’e lava si tama’i Lilo a le teine o Loleta. Ae se i o tatou va’ai pea ma o tatou fa’atalitali pe o se mea moni, ia pe o se mea fo’i tau ina fai a’i, lea vaitaimi o le soifuaga, ae fai mai le tala a le toeaina o si o matou nu’u, “E lo’u fiafia e, ua liua, talu ai lou fia pi’ipi’i i a ita.”

 

E faia pea...