Onosa’i I Mea Tiga

Vaega: 60

 

Ae alo maia, o le a toe fa’aauau atu la tatou tala mo lenei aso. Na muta mai, ina ua va’aia e le teine o Filipina le maligi ifo o loimata o si ona tuagane, le tama o Lilo, ona le mau tonu ai lea o le loto o le tama’ita’i, pe o le a le uiga, pe i ai fo’i se mea o mamafa i le loto o si ona tuagane e pele ia te ia. Ae se i o tatou tulituliloaina, pe o le a le mea ua mamafa i le loto o le afioga i a Lilomaiava.

 

“Pina, ua ou lagona le mafatia o lo’u loto, ma ua fa’aluafesasi fo’i o’u manatu, ona o le mea na o’o i ai le matou malaga ma Lefefe ma Vesi. Ua le mafai e le tama ona taofiofi ona loimata i lea taimi.

 

“Pina, na ‘ese lava le mea na ou va’ai i ai, ua lagona ai le mafatia o lo’u loto, o uiga o Loleta na ou va’ai i ai, ae maise o ona lavalava, sa ou va’ai i ai, i uiga ua le talafeagai i lo’u mafaufau. O uiga fo’i o lona tina, e matua’i le lelei lava, ma ua ou le iloa pe o le a lava le mea ua naunau ai le lo’omatua ia fai loa le ma fa’aipoipoga.”

 

Ua le tautala Filipina i lea taimi, ae ua usi lelei lana fa’alogo i tala o lo’o tautala ane ai lona tuagane i lea taimi. Ua fa’aauau pea le tala a Lilo, “Pina, e ‘ese lava le mea na ou manatu i ai, ‘ese le mea na ou va’ai i ai, e fai fo’i o Loleta, a’o lona tina, ua le mautonu ai lo’u mafaufau.”

 

“O le aiga, e tu lelei le aiga, e fai le faleoloa e mau mea le aiga, ae sa le i ta’ua ia mea ia te a’u, pau lava le mea na ou manatu i ai, ia fa’ataunu’u le mea na ou mana’o i ai, ou te le mana’o i se mea, ae ua ou alofa ia Loleta, o a fo’i ona uiga e fa’aali i le ofisa, ae ua ou alofa lava i ai.”

 

Ua punou ifo Lilo ma soloi ona loimata ma toe fa’apea ane i lona tuafafine, “Fili, e lagona lava lo’u popole, e foliga mai, ua i ai se mea ua tupu ia Loleta, ou te le o iloa, ae talosia ia ‘aua ne i sa’o o’u manatu.”

 

Ua lagona le alofa o Filipina i si ona tuagane, aua o lea ua va’ai atu nei ma fa’alogo, ua ‘ese le talanoa ane a Lilo ia te ia i lea taimi. “Lilo, va’ai oe le tuagane, afai lava o i ai ni ou masalosaloga i lea tulaga, e sili pea fa’ata’atia, e sau se taimi ma e fai lava e le Ali’i le taimi ma le aso o mea uma, e le aoga fo’i lou naunau atu, ae o lo’o i ai se mea o fa’aluafesasi ai lou mafaufau, ae ta’atia se i sau se taimi.”

 

E le i umi, ae fa’alogo atu o sau le vala’au a lo la tina, le lo’omatua o Malia, “Lilo, Filipina, o mai i le fale, o lea e fa’atali atu le faiga o le mea’ai.” Na tutu a’e nei i luga  Lilo ma Filipina ma savavali atu loa i le fale tele o lo’o nonofo mai ai lo la tina ma le lo’omatua o Lonisi, ae o lo’o pisi solo Luisa i le faiga o feau.

 

Na toe fa’apea ane Lilo i lona tuafafine, “Fili, ae alofa mai ia te a’u, ‘aua lava ne i e tautala i se tala e tasi, ae o lea ou faia le mea ua e fai mai ai, ia ‘aua lava ne i iloa e o ta matua, ua e fa’alogo mai.”

 

Na tali Filipina ua lelei, ma ua fa’apea lava ona fai. Ua ulufale nei Lilo ma Filipina ma ua saofafa’i ifo nei ma amata loa le mea’ai a le aiga i lea afiafi. E fai lava la le mea’ai a lo’omatutua o Malia ma Lonisi, ae o lo’o fai pea le talatalanoaga a Mose ma Lefefe fa’apea ma Vesi. Fai mai, ua fia iloa lelei e le toeaina o Mose le mea na tupu i le aiga o Loleta. E le i fai ane se tala a Lefefe, ae oso a’e le tala a Vesi, “Mose, a e va’ai..” Toe titi mutu le vae o si tamaloa o Vesi i le feini a le toeaina o Lefefe ma lulu ane i ai lona ulu.

 

E faia pea...

Comment Here