Ads by Google Ads by Google

Onosa’i I Mea Tiga

Vaega: 59

 

Alo maia, o lea toe fa’aauau atu la tatou tala mo lenei aso. Fai mai, na tutu a’e nei i luga le toeaina o Mose ma Lefefe ma ua savavali loa i le isi itu o le fale, ae toe vala’au ane lava le toeaina o Mose ia Vesi, e avatu le la meatausami ma Lefefe i le itu lea. Ua fa’apea lava ona fai, ae o le taimi lea i le mafaufau o Vesi, pe o le a le mataupu o le a talanoa ai Mose ma Lefefe, e fia iloa fo’i e ia latou.

 

Na ona tu’u lava i luma o Lefefe ma Mose le la meatausami, sa’ofa’i ifo loa ma Vesi e le i toe fa’atali. Na fiu Luisa e tau va’ala’u ane ia Vesi, ae fa’apea ane i ai lona to’alua, “Se fai ane e oulua feau a lo’omatutua o lea ou te pisi.” Ua ‘ata Luisa ma tilotilo ane i si ona to’alua, ua valu tausaga o nonofo. Ua iloa lelei lava e Luisa, o lona to’alua fa’apelepele, toe lava o sona papa ma sona mu’umu’u, e le iloga se mau tala e sau mai le gutu o Vesi.

 

O le isi lea mea e matua’i selau pasese ai lona to’alua o Vesi. Ua ‘ata nei Luisa ma tilotilo ane ia Malia ma Lonisi, ae fai mai, ua alu le talanoaga a lo’omatutua i lea taimi. O lea ua fa’amatal uma nei e Lonisi ia Malia le fono a tina o le nu’u na fai i lea aso, ae sa le i auai le lo’omatua o Malia.

 

O lea la e ‘ata ai le lo’omatua, ina ua ta’u ane e Lonisi fai mai, na toe titi fo’i lava a pa’i lima ai lo’omatutua i lea fono. E fai o le sau a le isi, ae fa’afetoa’i ane e le isi. A’o tala na fai i lea fono, e fa’apea, ana i ai fo’i Malia, e leai se mea e tupu, aua e tu a’e fo’i i luga le lo’omatua fepalea’i solo mata o lo’omatutu.

 

“Lilo, Lilo, sau loa e fai le mea’ai.” O le tauvala’au ane lea a lona tuafafine o Filipina. Ae fai mai, na fiu le teine e tau vala’au, ae e le i tali ane lona tuagane. Na i’u lava ina savali ane Filipina i le fale o lo’o moe ai Lilo. E fetaui lava le taunu’u ane o Filipina ma saofa’i ifo loa i luga o Lilo sa fai lana malologa.

 

“Lilo, ua a mai oe, ua e ma’i, oi a o o fo’i,e sau e moe, o le la o le a fai le mea’ai, sau loa ta o,o lo’o fa’atali mai le lo’omatua ma le toeaina.” Fai mai le tala, na tali atu Lilo ma ona foliga fa’anoanoa i lona tuafafine. “Lilo, e i ai se mea ua tupu, tautala mai ia te a’u, ou te fia  iloa.”

 

E fai ane lava tala a Filipina ma saofa’i ifo i talane o lona tuagane i lea taimi. Na va’aia e Filipina foliga fa’anoanoa o lona tuagane. Na a’apa atu nei ma u’u mai lona lima, “Lilo, talanoa mai ia te a’u, e i ai se mea o mamafa i lou loto, o tala e fai e ta’ua, e tanu lava, ae talanoa mai.”

 

Fai mai, na va’aia e Filipina le maligi ifo o loimata o si ona tuagane i lea taimi, ma na lagona ai le popole alofa o le teine i lona tuagane, aua ua ‘ese lava le va’ai a Filipina ia Lilo i lea taimi. “Lilo, tautala mai, e i ai se mea ua tupu, tautala mai.”

 

E faia pea...