Ads by Google Ads by Google

Onosa’i I Mea Tiga

Vaega: 58

 

Alo maia, o le a toe fa’aauau atu la tatou tala mo lenei aso. 

 

Ua pei o ni ufi e tutupu manatu ua lofia ai nei le tama o Lilo i lea taimi, aua ua le mautonu pe o le a tonu le mea o le a fai. ina ua uma le feiloa’iga ma le aiga o Loleta, e le i toe maua se isi  taimi e toe talanoa ai. Ae fai mai le tala, na fa’ate’ia Lilo i le va’ai atu i lavalava na ofuina e Loleta, na ona iloa ai le le lelei o uiga o le tama’ita’i. O le mea na tupu, e taunu’u ane Lilo, ae savali ane Loleta ma lona ofuae vae pupu’u, ma ana vali mata ua pei o vali a se teine o le ata.

 

Na lagona le matamuli o Lilo i lea taimi, ona o lea ua o atu ma Lefefe ma Vesi, ae ua ‘ese le mea ua ia va’ai i ai. E le i manatu le tama o le a tupu ia mea, ae sa ia toe manatua, uiga ma aga a Loleta i totonu o le falefaigaluega, e matua’i le fiafia lava i i ai le to’atele o tagata faigaluega. O lea la ua manino le mata o le vai, e so’o uma lava Loleta i lona tina, aua o uiga ia o le lo’omatua na va’aia e Lilo i lea aso.

 

Na fa’asolo fa’asolo lava mafaufauga o le tama, i’u lava ina ta’oto ifo ua lagona le vaivai, e fai o le vaivai o le tino, ae ua alu atu ai ma lona mafaufau. O le taimi lea, o lo’o alu lava le talanoaga a Malia ma lana fanau, ae maise ai o le toeaina o Lefefe. A fai fai, alu atu se tala a Lefefe ia Malia, ‘ata le lo’omatua.

 

“A Malia, ta tefe i le aso e te lua feiloa’i ai ma le tina o Loleta, oka, e pa pa faititili ma fe’emo uila a ea.” Ua ‘ata le lo’omatua ma lulu lona ulu ma fa’apea ane ia Lefefe. “Lefefe, ta’ilo fo’i i le mea e o’o i ai, e tele a mea e ono o’o i ai, aua fai mai le tala a le toeaina o si o matou nu’u, “Se o’o i ai.” ia se i o tatou va’ai la po’o le a le mea o le a o’o i ai, ae ou te va’ai atu, e muamua lavea i lo’u lima.”

 

Ua uma le talanoaga ae ua alo nei mo le meatausami, ae fai mai, o lo’o laulau e Vesi le meatausami o le afiafi, ae ulufale loa ma le lo’omatua o Lonisi. “Oi se leitioa fo’i a lagilagia le afiafi, lea ua afio mai le afioga ia Punipuao.” Ua ‘ata le lo’omatua o Lonisi ma saofa’i ifo i talane o le lo’omatua o Malia.

 

“Ia fa’afetai lava, a lailoa lava i le tau fai mai o le lena tala, se e le o Punipuao, Punimatagi, aua o lea ua ou sau e punimatagi i fetauiga a Lefefe ma Malia lea o le a fai nei.”

 

Ua ‘ata le lo’omatua o Malia ma tilotilo ane ia Mose, a’o le toeaina i lea taimi, ua na o le ‘ata ma tilotilo ane i a Lonisi. “Lonisi, ia afio maia ma tala mai a’ao, o a mai oe le tina.?” Ua le tautala Lonisi ae ua ‘ata ma tilotilo ane ia Lefefe, ae fai mai le tala ua le iloga se mea e feliuliua’i solo ai Lefefe i lea taimi. Ae na mata’i lelei lava e le lo’omatua o Malia ia uiga fa’atama mamafa o Lefefe i lea taimi.

 

Ua te’i lava ua le tautala le toeaina, ae ua amata ona taletale, ma feliuliua’i solo, fai mai, o lea e mata’i uma ane lava e le lo’omatua o Mali ma Vesi. Ua na o le ‘ata o Vesi ma punou i lea taimi ma laulau le latou meatausami o le afiafi. Na i’u lava ina liliu ane le lo’omatua o Lonisi ma fa’apea ane, “Oi talofa Lepopoi, oi talofa Lefefe, o a mai oe le toeaina i lenei afiafi.?”

 

Ua ‘ata le lo’omatua o Malia ma tilotilo ane ia Lefefe, “E Lefefe, ua te’i lava lea ua e le tautala, e i ai se mea ua tupu, ua ‘ai e le isumu lou gutu.” Ua atili ai ona punou ifo Lefefe i lea taimi. Ae na va’aia e le toeaina o Mose, le le fiafia o Lefefe o lea na oso ane ai loa ma lana tala.

 

“Lefefe, e i ai se mea o e popole ai, ta o e i ai le mea ou te fia talanoa atu ai ia te oe, ae e te le i toe alu.” Fai mai e le i uma ane le tala a Mose, ae mane’e a’e loa i luga ma Lefefe e le i toe fa’atali. Ua ‘ata’ata le lo’omatua o Lonisi ma tilotilo ane ia Lefefe. Na fa’apea mafaufauga o le lo’omatua o Lonisi, “E Fefe, ta fe fe ia sefe malepe, ua te’i lava lea ua fa’apea mai, ai o se mea na matamata ai i se ata tifaga.”

 

E faia pea...