Ads by Google Ads by Google

Onosa’i I Mea Tiga

Vaega: 55

 

Na muta mai la tatou tala, i le itu o le aiga o Susitina ma le toeaina o Falaniko, o matua ia o le tama’ita’i o Loleta, lea na alu i ai le fa’amalamalamaga a le tama o Lilomaiava. Ae fa’auau pea lau faitau, o le a tatou liliu atu i le aiga o Mose ma Malia o matua ia o Lilo, ia po’o a fo’i se mulumuluga veve o lo’o fai i lenei taimi, ona o lea ua toe fo’i ane le malaga a Lilo, Lefefe ma le tamaloa o Vesi.

 

Fai mai le tala, o lo’o vevesi nei le aiga o Falaniko ma Susitina, ae o lea ua ta le faleaitu a le lo’omatua o Malia. Ua le iloga se fesili ua tu’u ane nei i si toeaina o Lefefe i lea taimi. Ua tau le iloa ai e Lefefe ona tali, fai mai, ua ‘ata ta’afilifili le lo’omatua o Malia, ae ua fa’amatala nei e Vesi le lo’omatua o Susitina, le tina lea o Loleta, i le tulaga ua naunau i ai le lo’omatua, ia fai loa le talanoaga i le fa’aipoipoga a Lilo ma lana tama.

 

Ua na o le ‘ata ta’afilifili o le lo’omatua o Malia ma fa’apea ane lana tala i lona to’alua ma lana fanau lea ua i ai nei, “Ua a la Mose, na ou fai atu lava ia te oe, ta te tapua’i filemu, ia mau le ‘afa, o lea la, oi ta fe fe, ai ua va’ai le lo’omatua i le lalelei o si a’u tama o Lilo, aua e so’o uma lava Lilo ia te a’u, ai o le mea lea ua mana’o ai le na ‘aumatua e fai loa le fa’aipoipoga, e talofa e, i lota no’o pei a pa.”

 

Ua na o le punou o le tama o Lilo ma tilotilo ane i si ona tina, ua lagona e le tama le fiafia o lona loto, i le va’ai atu i lona tina, ua fiafia mai. Ae o le toeaina o Mose, ua na o le punou ma lulu lona ulu. Fai mai le tomumu le leoa a le toeaina o Mose, “Leaga lava le lo’omatua e mimita tele, se i toe sau ea se sunami se i avatu ai, ua na o le tiga o lo’u ulu ma lo’u fai’ai se.”

 

Fai mai, na alualu lava tala a le tamaloa o Vesi, o’o loa i le tulaga fo’i lea, na ona va’ai ai uiga fitagata o le tina o Loleta, fa’apea loa ma Vesi, “Malia, a e va’ai i le lo’omatua, se o le matua’i fia tagata lava ma ona uiga, o lae lava e tau fai mai le tala a le matai o lo latou aiga, ae ‘oso mai lava le lotomatua, a ali’i Lefefe?”

 

“E a ea Vesi, oi ia e sau fo’i la ma lona fia tagata, ae ou alu atu ma lo’u fiatagata, fai i ai i si lo’omatua e le i taitai lava o’o i luga o le maea. Afai o uiga na, ia talofa e, na o le to’ulu ai o lona ulu ma ta’ei ona mata, ia fai i ai e fai fai lamu fai fai lamu mai.”

 

Na toe fesili ane lava le lo’omatua o Malia, “Lefefe, o le a la lau tali na fai i ai, aua o lea e le i o’o i le tulaga e pei ona i ai le mana’oga o le lo’omatua, o le a la lau tala na fai i ai i matua o Loleta ea, po’o ai.?” Na tali Lefefe, ua uma ona fai i ai lana tala, e fa’atali, se fo’i ane e fai sa latou tala ona toe fa’ailoa atu ai lea.

 

“O le na tonu lava Lefefe, fa’afetai tele, ma fai i ai lau tala le na, aua e fai fo’i o le fia fifiti mai o le lo’omatua, ae muamua ta i ai la’u fiti i si lo’omatua le na, e le ‘afa i ai lo’u lima, e ta fia faipele lava i lenei taimi.”

 

E faia pea...