Vaega: 51

Aalo maia, o le a toe fa’aauau atu la tatou tala mo lenei aso, na muta mai ina ua fai nei le talatalanoaga a Mose, Malia, Lefefe, Lilo, Vesi, Luisa ma Filipina. E le o iloa e le nu’u atoa le mea lea e tupu, ma ua uma fo’i ona fa’ailoa e Mose i a Lefefe, ia sa sa lava ona tautala i se tasi e tusa ai ma le mataupu e pei ona i ai le manatu o Lilo.

O le ala fo’i lea, ua leai ai ni ‘au faitatala ma ni ‘au lalo o le isu i lea taimi, aua na tanumia lava e Lefefe e le i fa’ailoa i se tasi. Ua amata nei le fetufa’aiga a Mose ma Malia ma Lefefe fa’apea ma le fanau. “Lefefe, ia saunoa ia, po’o le a le tulaga na o’o i ai le tou malaga, ua ma fia fa’alogo lava i se tala, pe a mai.”

Na tilotilo muamua lava Lefefe ia Lilo, ae na geno ane i ai le ulu o le tama e tautala ia e tusa ai ma le latou savali na alu nei i le aiga o le tama’ita’i o Loleta. “ia ua lelei Mose ma Malia, e muamua lava ona ou fa’afetai atu i la oulua tapua’iga, e moni lava le upu e le sili le ta’i na i lo le tapua’i, fa’afetai atu.

Ae o le tulaga nao’o i ai le matou savali, na fesasia’i lava matou uma ona o lea fo’i ua silafa e Lilo fa’apea fo’i Vesi, na ou le mautonu, pe o le a le mea na tupu, ae ina ia fai se tala ia fa’apu’upu’u, ua mana’o le lo’omatua le tina o Loleta ia talanoa loa mo se aso o le fa’aipoipoga a Lilo ma lana tama,“Na ou tali i ai, e le mafai ona faia e matou se fa’aiuga, o lo’o fa’atali mai matua o Lilo, ma o mea fo’i fa’apenei, e muamua lava felogoa’i matua, ona fa’atino ai lea o nisi fuafuaga.”

“Oi, e a ea Lefefe, a’o ai le na olomakua ua tautala ane, oi na tou o atu e fai le fa’amalamalamaga a’o le na ua fai ane e fai le fa’aipoipoga, oi ta fe fe se, ia soia ia, ai ua va’ai si lo’omatua i le lalelei o Lilomaiava, a ea.”

Ua ‘ata le lo’omatua o Malia ma a’apa ane lona lima ua u’u atu le lima o lana tama. Fai mai, e ‘ese le fa’amaualuga o le lo’omatua i lana tama lea, ae o le tala a tagata o le nu’u e moni lava e lalelei Lilo, ae e ta i tua i le ‘aulelei o le tama’ita’i o Filipina. O le tala lava a le lo’omatua, “E Mose, ne i e fa’apea lava e so’o le ta fanau ia te oe, e leai, e so’o uma lava ia te a’u tamaiti.”

Fai mai, na o le ‘ata o Mose ma tilotilo ane i si ona to’alua ua tolusefulu tausaga o mafuta. Ae fai mai, e tutusa lelei lava le lalelei o le lo’omatua o Malia ma le toeaina o Mose. E ui lava ina fa’apea ua matutua, ae e iloa atu lava e tagata le tutusa lelei o lenei ulugali’i, o le ala fo’i la lea, e aulelei ai si a la fanau, o Lilo ma Filipina.

O si a la tama fai o Luisa, manatua fo’i, o Luisa o lona tama o le Palagi, lea na nonofo ma si ona tina, le tuafafine o le toeaina o Mose, ae ua alu lava le Palagi i fafo ma alu atu ai lava i le va’a tu’u sa’o, ae tu’u ai Luisa ma si ona tina. Ae fai mai le tala, o le mafua’aga, ona e le fia alu le teine, le tina lea o Luisa i se isi lava atunu’u, o lona loto, e nofo ma oti i Samoa. O lea la ua taulau lona fa’amoemoe, ua maliu le tina o Luisa, ma o lea ua avea ma tama moni a Mose ma Malia.

O le tulaga ua i ai le aiga, e tutusa lelei lava le lalelei o Lilo ma ona tuafafine e to’alua o Filipina ma Luisa. Ae fai mai, o Vesi, e moni lava e lalelei, ae ua matua si taule’ale’a, na fai ai fo’i finauga a le lo’omatua o Malia ma le aiga o Vesi. Ae fai mai le tala, na to’a filemu lava mea uma, ona ua iloa e Malia ma Mose le alofa fa’amaoni o Vesi ia Luisa, fa’apena fo’i Luisa ia Vesi.

“Oka, oka e, ia o a fo’i na faiga fa’apena, na tou o’o atu e fa’ailoa le faigauo a Lilo ma Loleta, ae ua ‘ese na tulaga ua o’o i ai, ia ‘ai ua mana’o le lo’omatua e fa’anonofo loa, ona o le va’ai i le lalelei o si a’u tama o Lilo. ia fai i si na lo’omatua e teuteu mai si ana va’alele, aua e muliga fo’i ana va’alele i va’alele lea e maua i le tatou aiga.”

E faia pea...