Ads by Google Ads by Google

Onosa’i I Mea Tiga

Vaega: 50

 

Alo maia o le a toe fa’aauau atu la taotu tala mo lenei aso. Na muta mai la tatou tala ina ua toe tu’umuli le fa’amalamalamaga le toeaina o Lefefe, Lilo ma Vesi. O lea la ua taunu’u nei i le fale o le toeaina ma le lo’omatua o Mose ma Malia.

 

Fai mai, na ona iloa mai lava e le toeaina o Mose le alu atu o le ta’avale, e le i toe fa’atali, tu a’e loa i luga ma savali mai e fa’afetaui le alu atu o le ta’avale. Na iloa lelei mai lava e le tama o Lilo le tu atu a si ona tama, ua lagona le alofa, aua ua iloa lelei e Lilo, e o fua i lea aso, ae o se avega mamafa i nai ona matua, ona sa mana’o lava si ona tama latou te o, peita’i, na aunagi ane lona tina, e tapua’i la’ua, ae ua lava Lefefe e o ma Lilo i le aiga o Loleta.

 

O lea lava na fa’atino le mana’oga o le lo’omatua, ona ua manatu fo’i le toeaina, e le tatau ona alu ia, e tatau lava ona o Lilo ma Lefefe ma Vesi, ina ne i te’i ua tula’i mai nisi tulaga, ona le manuia lea o le savali a si ona atali’i. Ua tu le ta’avale, ona oso mai lea i fafo o le tamaloa o Vesi, “Mose, malo le tapua’i ia te oe le tama, ua taunu’u manuia mea uma, ae se i o’o mai Lefefe, ona fai atu lea o se tala e tusa ai ma le matou savali.”

 

Na tu nei le toeaina ma tilotilo ane ia Lefefe ma Lilo lea ua savavali ane latou te feiloa’i, fai mai le tala, na ona taunu’u ane lava o lona atali’i, a’apa ane loa le tama ma fusi mau si ona tama. Ua le mautonu le loto o Mose, pe o le a le uiga o lea mea, na oso a’e ai loa ma lona popole i lea taimi, pe o le mea o fiafia si ona atali’i pe leai.

 

Na fa’ate’ia mafaufauga o le toeaina, ina ua fa’alogo atu o sau le tau vala’au a le lo’omatua o Malia, “Se o mai i totonu o le fale, o lea ou te fa’atali atu, ua ou fia maua se tala, o mai i totonu o le fale, ia o a fo’i ga mea fa’apena a tou o, tou o, tou o mai tou tutu mai i fafo, o lea fo’i sa ou tapua’i ma le malosi, o mai i totonu o le fale.”

 

Ua tuanu’u ane Lefefe i le mea o lo’o i ai Mose ma lona atali’i o Lilo fa’apea ma le tamaloa o Vesi, e le i toe fa’atali le toeaina, na fesili loa ia Lefefe, pe o le a le tulaga na o’o i ai le latou malaga. Na fa’apea ane le tali a Lefefe, “Mose, e ‘ese le mea na matou o atu e fai, ‘ese le mea na fai ane ai le lo’omatua, le tina o Loleta, o lea la ua o matou o mai, ae e sili pe a tatou o o lo’o vala’au mai le lo’omatua, aua e i’u ina ‘agi fa’atasi ai tatou e Malia i le mataupu lenei.”

 

Na liliu nei le toeaina ma savali i totonu o le fale ma lona loto ua pei ua le mautonu. Na ulufale nei le au malaga, ae na savali atu lava Lilo feiloa’i i si ona tina, “Malia, fa’afetai lava ia te oe le tina mo lau tapua’iga.”

 

Fai mai, ua tu a’e i luga le lo’omatua ua fusi lana tama ma tagi, “Lilo, si a’u tama, o lea ua fai lava le mea ua e loto i ai, ae fai maia se tala ou te fia fa’alogo i ai, pe o le a le tulaga na o’o i ai le tou savali.”

 

Na ofo ifo nei i lalo Lilo i talane o lona tina, ae ua saofafa’i ifo nei ma Mose, Lefefe ma Vesi. Fai mai e le i umi lava, ae taunu’u ane loa ma Luisa ma lana fanau, fa’apea ma le tama’ita’i o Filipina. Ua fetilotilofa’i nei le tasi i le isi, ae ua na o le pupula ane o le teine i lona tuagane, ua fia fa’alogo i se tala e pei ona masi’i ai le fala si’i gata o le afioga ia Lilomaiava.

 

E faia pea...