Onosa’i I Mea Tiga

Vaega: 49

 

“Le Atua e, o Lau Afio o lo’o i ai upu o le ola, upu o le fa’amaoni, o upu o le alofa, ia e foa’i mai i a i matou le loto fa’amaualalo, le loto fa’amagalo ina ia mafai ai ona o matou lagona pea Lou alofa ma Lou agalelei i mea uma lava. Mua’au ma mulia’u Lau Afio i fuafuaga uma lava o le a feagai ai ma si o matou atunu’u i lenei aso, a’o le vi’iga o le fa’afetai ma le fa’amanu matou te fa’afo’i atu lava i Lau Afio, e fa’avavau, fa’avavau lava, Amene.”

 

Ia manuia lou alo atu i faiva ma tiute o le a feagi ai i lenei aso, ae alo maia mo le toe fa’auauaina o la tatou tala mo lenei aso. Na muta mai la tatou tala, ina ua fai le feiloa’iga a Lefefe ma le aiga o Loleta lea o lo’o i ai ona matua ma le tmatai o le aiga. O lea fo’i ua pei o le a sui ai le mea i le va lea, ona sa o’o aane Lilo ma Lefefe ma Vesi, e fa’ailoa i le aiga o Loleta a’o lea ua ‘ese le tulaga lea ua o’o i ai.

 

Ua mana’o lava le lo’omatua, le tina o Loleta ina ia fai loa ma le talanoaga mo aso e fai ai le fa’aipoipoga a Lilo ma lana tama o Loleta.  O lea ua fai nei finauga a Lefefe ma le lo’omatua o Susitina, a’o lea e nonofo Falaniko le tama o Loleta ma le matai o le aiga.

 

Na tasi lava le tala a Falaniko nofo loa ma le lo’omatua, “Susitina, na ou fai atu ia te oe, ia to’a le tai, fai fai malie, a’o lea ou te fa’alogo atu lava ‘ese lava au tala ia e fai mai. E leai lava se faigata ia te a’u Susitina, ae o lea e malotia le fale, onosa’i mai, se i tu’umuli le susuga i le failauga fa’apea ma Lilo ona tatou talatalanoa ai lea.”

 

Ua le toe tautala le lo’omatua i lea taimi, aua ua fa’alogo atu nei i le leo o le teoaina, ua saoasaoa mai ia te ia. Fai mai le totomumu le leoa a le lo’omatua, “E, ua toetiti fo’i le mau la ‘afa, la lea, la lea, a tau o mea o lou aiga ua pei o le alu a pe’ape’a le alu o ou vae e ave uma mea, ae a fai atu i fa’alavelave o si o’u aiga, ae ua e oso i luga, fai fai la mu mai, fai fai lamu.”

 

E l e i faia se tausamiga o le afiafi, ona ua naunau le loto o Lilo, ia tula’i ‘ese loa mai le fale o matua o Loleta. O a lava nisi mea o lo’o i ai lona mafaufau, ua le aoga mea uma, ona o lea ua na iloa ma mautinoa nei, o le matua’i fa’amaualuga, fiatagata, fiamata muamua o le tina o Loleta.

 

Ua fa’apea lava ona fai, ua tula’i ‘ese nei Lilo ma lana vaega na o latou o atu, o tapenapenaga uma na fai e tuagane o Loleta, ua na o ni nai me itiiti lava na o ma Lilo, ae ua tu’u mea uma. Fai mai, na ona lilo ‘ese lava o le ta’avale, tatope loa ma le manava a le toeaina o Lefefe, o Vesi fo’i ia, ua le mautonu lona mafaufau i lea taimi.

 

Ua leai se isi na toe tautala, ae ina ua ta’u to’a mai le toeaina o Lefefe, ua na o le tilotilo ane nei i si ona atali’i o Lilo. Fai mai, le tala, e ‘ese le auau o Lefefe i a Lilo, mai lava i aso o la’ititi le tama, o Lefefe lava la te fa’afesagai. O mea uma tau i le tautuaina o le aiga, o Lefefe lava na a’oa’oina, e le gata i le a’o le to’alua o si ona tuafafine o Vesi.

 

Na fa’ate’ia Lilo ma Lefefe i le fa’apea ane a Vesi, “Lefefe, malo lava, matagofie mea uma, ae ua ‘ese lava la ta fa’alogo i totonu o le fale o le aiga, ia e le fai atu lava sa ta tala Lilo, se i o tatou taunu’u i le fale, o lo’o tu’i mai le mulipapaga ma tapua’i mai le toeaina ma le lo’omatua, ae fa’afetai lava le onosa’i, malo fo’i le fa’apaleaple, ae alu fa’alelei le tatou ta’avale, va’ai se lo’omatua i lavea, va’ai se lo’omatua i lavea ane i lou lima ali’i Lefefe.”

 

E faia pea...

Comment Here