Vaega: 48

Fa’atalofa atu ma fa’afeiloa’i atu i le mamalu o le atunu’u, i lou alafa’i mai i fanuga lelei o lenei aso fou, o se aso e fa’aopoopo i lou soifua ma si o’u nei ola vaivai.

Fai mai, o le mea ua tupu nei, na o’o ane Lefefe e fai le fa’amalamalamaga, a’o lea ua ‘ese le tulaga ua tual’i mai, ua mana’o le lo’omatua o Susitina ia talanoa loa le aso e fai ai le fa’aipoipoga a Lilo ma Loleta.

Ua fiu lava le toeaina o Falaniko ma le matai o lo latou aiga e fai ane i le lo’omatua ae ua finau mai lava ia talanoa loa mo le aso e fai ai le fa’aipoipoga a Lilo ma Loleta, e le toe faia lava nisi tala. Na tilotilo ane nei Lilo ia Lefefe ma lulu ane i ai lona ulu, e leai, na iloa lelei e Lefefe le uiga o le ta’aga lea a Lilo ua fai ane ia te ia. O lea na ia toe fa’apea ane ai i a Falaniko ma le matai o le aiga, “Ia e fa’apenei, ou te fa’amalulu atu lava i lau tofa ‘Ave, fa’apea fo’i le tama o le aiga Falaniko, o le mea ou te fia fa’ailoa atu, ia outou finagalo malilie, o lo’o tapua’i mai matua o Lilo ma fa’atali mai mo se tala.

“E le mafai la ona ou fa’apea atu, tatou fetufa’ai i tulaga ia, ae e sili ia pe a moe le toa, ona tatou toe talanoa ai lea mo le tulaga e pei ona au mai le finagalo o le tina o le aiga, ou te fa’amalie atu ai ma lo’u loto maualalo.”

E le i toe i ai lava ni upu na tali mai nei le tofa ia ‘Ave, le matai o le aiga o Loleta, “Lefefe, o mea lava fa’apenei e tatau lava ona o tatou soalaupule lelei ai, ae o le a fai lou fingalo, tatou auai ia fa’apea.”

Fai mai, e le i uma atu tala a le matai o le aiga oi Falaniko, ae puna mai le lo’omatua o Susitina, “O le a le mea ua tupu, ‘Avemaoe, o lea ua ou fai atu e talanoa loa le aso e fai ai le fa’aipoipoga a Loleta, afai la tou te le faia le mea ua ou mana’o i ai, o le a ou alu i lo’u aiga e fai ai le fa’aipoipoga a la’u tama, ou te le popole lava i se mea, o le na fo’i tou te silafia, e le o se aiga fa’atauva’a ma se aiga maualalo lo’u aiga, ma e fa’alogo fo’i o’u tuagane ia te a’u, afai la o le mea lena ua lua manana’o i ai ma Falaniko, o le a fai lava le mea lea ou te mana’o i ai.”

E le i uma mai tala a le lo’omatua, ae fa’alave ane loa ma Lefefe, “Susitina, alofa maia oe le tina, e fai fo’i o i’ina a’o i’inei, e pei lava ona ou fai atu, o lo’o fa’atali mai matua o Lilo, e le mafai ona ou faia se fa’ai’uga se i vagana matua o Lilo, o le ala lea, ou te soso atu lava i ou tafatafa, malie maia lou fingalo, e sau se taimi ona tatou toe felogoa’i lea, malie maia oe le lo’omatua faigata.”

Ua le toe tali mai le lo’omatua i a Lefefe, ae fai mai, e le mafai ona ave’ese mata o le lo’omatua mai ia Lilo. Ua iloa ma ua mautinoa nei e le lo’omatua, o se taule’ale’a e agamalu, o se taule’ale’a fo’i e tausa’afia ona uiga, ae o se taule’ale’a ua matua’i matagofie i le va’ai, o ona foliga fa’apea ma lona faitino, ua matua’i selau pasasa pasene i le va’ai a le lo’omatua.

A tonu o le mafua’aga lea ua naunau ai lona loto ia fai loa le talanoaga i le aso mo le fa’aipoipoga a lana tama ma Lilo, aua ua musu le lo’omatua e toe tu’u ‘ese atu Lilo ma ona tafatafa. Ae fai mai le tala a Vesi lea na musumusu ane ia Lefefe, “Fefe, o le matua’i palu vai lava o le lo’omatua lenei, tatou o, ua leva le afiafi.”

E faia pea...