Vaega: 46

Na muta mai la tatou tala, ina ua feiloa’i nei matua o Loleta ma le toeaina o Lefefe lea na alu e fai le fa’amalamalamaga i matua o Loleta e uiga ia Lilo. Ae se i o tatou tulituliloaina pea po’o fea o le a o’o i ai lenei mataupu, pe o le a talia e matua o Loleta pe leai.

Ua savalivali atu nei i totonu o le fale i a Vesi, Lilo ma Loleta, fai mai le tala ua na o le mata’i mai nei e le lo’omatua o Susitina le solo lea ua alu atu i totonu. Na muamua lava ulufale Loleta, soso’o atu ai ma Vesi, ae mulimuli ulufale le tama o Lilo na ona tilotilo mai lava o le lo’omatua ua ‘ese le isi tagata lea ua toatolu ai le solo lea ua alu atu i totonu, pupula to’a ane loa i a Lilo.

Fai mai le tala, ua pei e ‘ai e ni pi le lo’omatua o Susitina i lea taimi, ua pei ua va’ai le lo’omatua i se aloali’i, ua le tautala le lo’omatua i lea taimi, ae ua na o le sioa ane nei i a Lilo. Na fa’ate’ia le toeaina o Falaniko ma le matai o lona aiga ina ua fa’apea ane le tala a Lefefe, “Afio maia lau afioga Lilomaiava, o lea ua tatou fesilafa’i i le manuia ma matua o Loleta, afio mai i lou talaluma atoa lea.”

Na musumusu ane nei le matai o le aiga ia Falaniko, po’o ai lenei taule’ale’a ua ulufale nei i totonu o le fale, ua le tautala le toeaina o Falaniko, ae ua pupula to’a ane nei ia Lilo. Na savali sa’o atu lava Lilo ua feiloa’I i le tama o Loleta, aua o lea ua fa’asino ane i ai e le teine lona tama. Ua feiloa’i fo’i ma le matai o le aiga, ae fai mai, e le i o’o ane Lilo i le lo’omatua o Susitina, ae ua tu i luga le lo’omatua ma fa’apea ana tala, “E, leitio fo’i a lagilagia le aso, o lenei ua afio mai le afioga i a Lilomaiava, ua  masi’i mai le fala si’i gata, ua mamalu fo’i le aitu i le aoa, e letioa fo’i a mimita si a’u tama, ona o lenei ta’u aulelei lenei taule’ale’a ua ulufale mai i le fale nei.”

Fai mai, na tilotilo ane nei Vesi ia Lefefe, ua ‘ata ma lulu lona ulu, ona ua ‘ese lava upu ia ua ta’u nei e le lo’omatua, ‘ese upu ma ona uiga na fa’aali muamua ane ia la’ua i le taimi na ulufale ai i totonu o le fale. E pei o le ‘emo o le uila i le mafaufau o Lefefe uiga o le lo’omatua lea ua fa’aali nei. Ua tonu fo’i o le mafaufau o Lefefe, a tonu na i ai le manatu o le lo’omatua o Susitina, o Vesi lea o le a nonofo ma lana tama.

Ua ‘ata’ata le toeaina o Lefefe ma fa’apea ifo ona manatu, “E silo’o, ua ma’imau lo’u atali’i i lau tama, ailoga e te iloa o le afioga ia Lilomaiava lea ua afio mai, talofa e, ta’ino’ino e, ia a’o ai oe, teu teu mai la’u va’alele, teu teu mai lau va’alele.”

Fai mai le tala, ua tu mai i luga le lo’omatua ma fusi atu Lilo i lea taimi, ma tagi lotulotu ai lava, ua pei o se tagata ua segia le muauli, aua o lea ua ia mautinoa nei, le lalelei ma le aulelei o lenei taule’ale’a o le a nonofo ma lana tama. Ua oso a’e le mimita ma le loto fiafia i le lo’omatua, ma o le mea ua tupu, ua le toe mana’o le lo’omatua e toe alu ‘ese Lilo, ne i te’i ua u’u atu e se isi tama’ita’i ma alu atu ai lava, ae tia’i ai lana tama.

Fai mai, na fa’ate’ia le toeaina o Falaniko ma le matai o le latou aiga, ina ua fa’aogo ato ua ‘ese le gagana lea ua tautala ai le lo’omatua, “E, leitioa a lagilagia le aso, o lea ua ma si’i mai le fala si’igata o le afioga ia Lilomaiava, e , le lalolagia e, ma mea o tumu ai, afio maia lau afioga Lilomaiava, a’o ai ea lenei aiga ua e manatu mai i ai.”

Na si’usi’u mata ane nei le toeaina o Lefefe ia Vesi, na i’u lava ina musumusu ane, “Vesi, ou te fai atu, o le matua’i palu vai lava o le lo’omatua lenei, o le lau salako, o le lau fuafue saina, ua le iloga se ituaiga lauala’u ua papalu ai vai a le lo’omatua.”

E faia pea...