Ads by Google Ads by Google

Onosa’i I Mea Tiga

Vaega: 42

 

Tatou a’ea’e ia lea manu ua ulu, aua ua o tatou va’aia ataata o ta’uleleia i lenei aso fou, o se aso e fa’aopoopo i lou soifua fa’apea ma si o’u nei ola vaivai, e i ai le fa’amoemoe o lo’o sologa lelei pea galuega ae maise o fiva ma tiute o lo’o feagai ai ma le atunu’u i lenei aso, ae alo maia o le a toe fa’aauau atu la tatou tala mo  lenei aso.

 

Na muta mai la tatou tala ina ua feiloa’i nei Loleta ma ona matua, o lea fo’i la ua lagona ai e le lo’omatua o Susitina le faigata, ona o lea fa’atoa fa’ailoa ane e lana tama le mea o lo’o mana’o i ai. Ae manatua fo’i, o lea ua leva ona iloa e lona tama le toeaina o Falaniko le mea, ae sa leai se taimi e fetufa’ai ai ma le lo’omatua e tusa ai ma le mana’oga o si a la tama teine e to’atasi.

 

Ae fai mai le tala, o le fa’atamo’ega e Susitina o lana tama teine o Loleta e leai se tagata o le nu’u ma le Ekalesia e le iloa. Pe fai mai lava e to’atasi, e le fo’i ai le fa’atonu ma le ‘ote a le lo’omatua, mai lava i le amataga. A tonu o le ala fo’i lea, ua atamai ai Loleta, a’o nai ona tuagane, e vaivai lava tama.

 

E na na le alofa o Susitina i lana tama, aua ua na iloa lelei e fai fa’apito loa, soli loa e Loleta la’ua. O le mea fo’i lea e va’ai atu i ai le lo’omatua, e fa’aaliali lava le alofa o le toeaina i lona afafine, e fai ai lava tala a tagata, aua ua va’ai o latou mata i le alofa fa’aaliali o le toeaina o Falaniko i lona afafine.

 

Ua fai nei le tonu a Falaniko ma Susitina, o le a tapena e fa’atali ai le o’o mai o le tama o le a avea ma manamea a Loleta. Ua tapena mea uma, o tagata faigaluega fo’i a le ulugali’i, ua leai se isi e toe nofonofo, aua ua vave le taimi.

 

Na tu le lo’omatua ma fai le fa’atonuga o mea uma, ua logo fo’i lana fanau tama o lo’o i uta i le vao, e tapena se suavai aua le o’o ane o le uo a Loleta. Fai mai le tala, o le tama ulumatua o Lolesio, e auau lava i lona tuafafine o Loleta, a’o tama la’iti, toetoe a pa’i o latou lima ia Loleta.

 

Fai mai, na ona iloa lava e Lolesio le mea lea o le a tupu, e le i toe fa’atali le tama, ae ua tomumu ane nei isi ona uso, “Sio, o le a fo’i le mea ua mana’o mai i ai le lo’omatua ma le toeaina, e fou i lo’u mafaufau lenei mea, ae va’ai oe le uso, sa i ai lo’u manatu ma lo’u loto fa’amaualuga, o le a nofo lo tatou tuafafine i se Palagi, a’o lenei, oka, ia o ai le na amo popo ua sau i lo tatou aiga.”

 

Na pupula to’a ane nei Lolesio i lona uso lona lua, “Ponifasio, fa’alogo, tasi lava le fa’alogo e le lua, ua uma ona ou fai atu ia te outou, e to’atasi lava si o tatou tuafafie, o ioimata o le tama tane o lona tuafafine, e sa sa lava ona o’o se lima o se isi o tatou ia Loleta, ua e fa’alogo mai.”

 

Ua le tautala le tama o Poni i lea taimi, ae ua na o le lulu o lona ulu, ma tali ane i lona uso matua, “ia ua lelei Lolesio, matou te fai mea fa’alogo lava ia te oe, ae pau lava lea o le mea o lo’o fa’afatu’ulu i o matou mafaufau, e moni lava oe, e to’atasi, ae o faiga e fai e lo tatou tama e le taitai talafeagai ma lou mafaufau.

 

“E leaga le faiga o Loleta, ae soia ia, atonu o le a sau lenei tama o se tama e lelei, ou te le mana’o lava i se isi lava mea, pau lava lea, ia alofa fa’amaoni i si o tatou tuafafine, pau lea, aua a ou va’ai atu e fa’aletonu mai ana faiga, ia e matua’i ‘afu ia te a’u pe a ulavale si ali’i, ae ua lelei, fai le tonu le na.

 

Ua amata loa le fa’atonuga a Lolesio i tama faigaluega ina ia vave ona gao’o le umu, ona o lo’o fa’atali mai le lo’omatua ma le toeaina. Ua fa’apea lava ona fai, ua lava tapena mea uma, ua teu atoa le fale e tagata faigaluega ma ua matua’i selau pasene mea uma.  E faia pea…..