Vaega: 41

Fa’atalofa atu i lou alafa’i mai i le manuia i lenei taeao fou, i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Ali’i e, e tumau atu lava i Lau Afio le vi’iga, o le fa’amanu ma le fa’ane’etaga, aua o Lau Afio e pule aoao i mea uma lava. ia e alofa mai mo i matou i lenei aso, foa’i mai le loto onosa’i i mafatiaga ma puapuaga o lo’o feagai pea ma i matou i aso uma lava. E vi’ia lava Oe Tama i aso uma o lo matou ola, Amene.”

Ua taunu’u le teine o Loleta i lo latou fale i lea afiafi, na iloa lelei mai lava e lona tama ua i ai le mea ua tupu, ona i lana va’ai mai i le savali atua lona afafifine, e foliga, o lo’o i ai se mea o lo’o mamafa i lona mafaufau. Na savali atu nei Loleta ma saofa’i ifo loa i le isi nofoa o lo’o i talane o lona tama. Manatua fo’i, ua iloa e le tama o Loleta le toeaina o Falaniko aua ua uma ona talatalanoa i ai lona afafine, ae e le i iloa e le lo’omatua o Susitina.

E le i mau le nofo a le tama’ita’i, ae fa’alogo mai ua alu atu le ‘ote a lona tina. “Leka, fa’alogo lelei mai lava oe, va’ai, na o le to’atasi lava oe, ae o au faiga oka, oka e, ua o’o i le lagi, o a na uiga fa’apena e te faia, e alu le po atoa o alu e te ta’a, ua  ou iloa, e nan a lava e lou tama mea uma.

“Talofa e, Loleta i lou olaga, po’o ai se tama o le a pologa i au amio, ua uma ona ta’u mai e lau uo ia te a’u, mea uma e te lua o i ai, se na o mea lava e leaga ifo ai ma lo’u ulu. Loleta, e leai sou ‘ate a, e fai uma e le nu’u ou tala, e le tiga ai lou loto i na mea, ae va’ai i lou tina, ou te finau malosi ma ou ‘ote e o’o fo’i lava a’u tala i nai tina o le nu’u, aisea, o lo’u puipui ia te oe, a’o lea ou te va’ai atu, sole, ma’imau alofa ia te oe.

“O le isi itu, ua leva ona fia tago lima tama ia te oe, ae e fa’alogo mai ia te a’u, e sa sa ona o’o o latou lima i l o latou tuafafine e sa, sa lava, aua e  malaia ai. A’o lea ou te va’ai atu, siaula, ua matua’i ova au amio ua tau le o’o i se va’a afi, tau polili teuteu mai au amio Loleta, aua e tasi lava la’u tagolima ia te oe, ona e va’ai lea i ai ua ‘oti po’o ma lou ulu, ua e fa’alogo mai, tu’u le fia ta’a, ae toaga e fai mea o le aiga, ae ua fai uma e tama feau ma mea uma, ae fa’amaepaepa oe ua pei o se purinisese, Loleta fai fa’alelei mai au mea, fai fai lamu, fai fai lamu.”

Ua uma le ‘ote a le lo’omatua, ae o le toeaina o Falaniko, ua na o le punou e leai se upu na tali ane ai i le lo’omatua. Na toe fesili le lo’omatua i lana tama, “O le a le mea ua e vave sau ai e le i manava galuega, ai fo’i ua fai sau mea valea i le fale faigaluega, o le a le mea ua tupu.?”

E le i uma le tala a lona tina, ae fa’alogo mai le lo’omatua ua tagi Loleta, “Mama, Papa, ua ou sau e logo mai oulua, o le a sau la’u uo e fa’amalamalama i le afiafi nei, fa’atoa fa’ailoa mai ia te a’u analela, o le mea lea ua ou vave sau ai i le fale.”

Ua pupula to’a ane nei le lo’omatua o Susitina i lana tama, “Loleta, o ai le tama, a’o anafea na fai ai sau uo, o oe fo’i, ai ana e fanau, o le Kolea, o le Saina o le Filipino o le Palagi, oka, oka e, Loleta, na o mea lava e oso a’e ai lo ta toto maualuga i au faiga se, tautala mai, o lea ma te fa’alogologo atu ma lou tama, tautala mai.”

Ua na o le tagi nei o Loleta i lea taimi, ua le mafai ona toe fai ane se tala, na a’apa ane nei lona tama ua u’u atu lona lima. Na liliu nei Falaniko ma tilotilo ane i le lo’omatua, “Susi, ia va’ai oe le lo’omatua, ua uma ona fa’ailoa mai e le teine ia te a’u, ae malie oe le tina o le aiga, sa tau sema lava se taimi ta te talatalanoa ai, ae ua le maua, ona o le tele o mea e fai, ae maise fo’i o le tulaga na o’o i ai i totonu o le Ekalesia, ae malie maia lou loto, va’ai oe e to’atasi lava Loleta, atonu o le mea fo’i lea ou te auau ai i si o’u afafine, ae ia e talia le fanoga o si a ta tama, lea ua sau lava e logo mai ta’ua.”

Ua na o le nofo o le lo’omatua o Susitina ma lulu lona ulu, “ia o le a la le mea o le a fai, tautala mai Loleta, o le a le mea ua e mana’o i ai, ua e mana’o lava la e sau le tama e o’o mai i a ma’ua, ia afai o lou loto lea ma ua e alofa fa’amaoni i le tama, fai i ai e sau, o le a ma fa’atalitali atu i ai.”

E faia pea...