Onosa’i I Mea Tiga

Vaega: 38

 

Fa’atalofa atu i lou falafa’i mai i le manuia i lenei taeao i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Atua e, o Lau Afio o lo’o i ai lo matou olataga ma lo matou fa’amoemoe i mea lelei, ia E alofa ma silasila mai i si o matou atunu’u, o a lava faigata ma puapuaga e o’o mai ae ia lalago pea lo matou va’a e ala i lo matou fa’atuatua ia te Oe lo matou Atua, aua o Oe o le pule aoao i mea uma lava, o le vi’iga ma le fa’amanu matou te fa’afo’i atu i Lau Afio i lenei aso ma aso uma o lo matou ola, Amene.”

 

Fa’amalo le onosa’i i le mamalu o le atunu’u i faiva ma tiute o lo’o feagai ai i lenei aso, po’o fea lava o lo’o e galue ai, ia tumau pea le puipuiga a le Atua Soifua i si ou soifua fa’apea ma si o’u nei ola vaivai. Ae alo maia, o le a toe fa’aauau atu la tatou tala mo lenei aso.

 

Ua suiga malie le finagalo o le lo’omatua o Malia e ala lea i fautuaga ma tima’iga a folasia e le tama o le aiga, o Mose, lalago ane i ai ma le matai o le aiga o Mose le toeaina o Lefefe, ae alu atu ai i tua ma fautuaga ae maise o le fa’atoe’esega a si ana tama o Lilo lea, la ua to’a ai le tai i le finagalo ma’ale’ale o le lo’omatua o Malia.

 

Ua ma’ea nei le tonu, o le a alu le savali a Lilo ma le toeaina o Lefefe, e fai le fa’amalamalamaga i matua ma le aiga o Loleta. Ae ua fia alu ai fo’i ma le tamaloa o Vesi, ona ua fai mai lana tala, e tatau lava ona i ai se isi e aga’ia le fetala’iga maualuga ia Lefefe, o lea na malilie ai loa Mose ma Malia i le tonu lea.

 

O le tulaga ua i ai nei le tama’ita’i o Filipina, ua toe oso lona manatu alofa i si ona tuagane e to’atasi o Lilo, ma o lea na ma’ea fo’i ona teuteu mea uma, ua uma fo’i ona fa’alogologo Malia, Mose, Lefefe, Vesi ma Luisa i se manatu na lafo ane e le teine o Filipina. Ua manino le mata o le vai, ma ua ma’ea ona teuteu mea uma, ma o le tonu mautu ua fai nei, o lea tapua’i atu Mose ma Malia ma teine, ae o le a alu se fa’amalamalamaga a Lilo lea o le a ta’ita’ia e le toeaina o Lefefe ae fa’amalumalu ai le tama o Vesi.

 

Ua ma’ea ona fa’ailoa e Lilo ia Loleta le tulaga ua o’o i ai ma ua malilie fo’i ona matua, o le a alu atu le fa’amalamalamaga a le afiafi lava lea pea ma’ea galuega. Ua fai fo’i le tonu, a manava galuega, ona fa’atali mai lea o Lilo se i o’o atu Vesi ma Lefefe ona o latou o ai lea i le aiga o Loleta.

 

Ua fa’apea lava ona fai, fai mai o le aso atoa na matua’i liliu le toeaina o Lefefe e tapena lelei lana lauga e fai i matua o Loleta. Fai mai le tala, e ‘ese fo’i le alofa o le toeaina lenei o Lefefe i le tama o Lilo, ona o uiga tausa’afia o lenei tama, e leai se mea e ta’u seseina ai le igoa o Lilo i totonu o le nu’u ma le Ekalesia. E o’o fo’i i le Faifeau ma lona Faletua, e auau lava i le tama o Lilo.

 

Fai mai le tala, o teine ma tama’ita’i e leai se isi e le fa’ananau lona loto i le tama o Lilo, ae e le ano lava i ai le tama, o lana lava tala e fai so’o, o le a toe o i teine o le nu’u, e iloa le tama e leai sona loto. O lea lava la ua ta mau i le loto o le tama, e le mafai ona toe nofo i se tama’ita’i o lona lava nu’u, ma le isi itu, ua aiga uma lava tagata.

 

Ia se i o tatou tulituliloaina le tulaga o le a o’o i ai le fa’amalamalamaga a Lilo ma lana matai o Lefefe, pe o le a feagia’i solo e matua o Loleta, ia pe o le a talia fo’i le fanoga o si ali’i e tusa ai ma ia tulaga, ae afai o tau sauna sau fa’amalamalamaga i se tama’ita’i ua fa’ananau i ai lou loto, ia fa’avela lelei le size two, velo i ai ma talo, ae polili teuteu e le ta’isi, ia va’ai la’ia o mea lelei uma lava na mea, ae sa’o ai le tala a le toeaina o si o matou nu’u, “Se velo mai so’o se mea, la lea, la lea.”

 

E faia pea...

Comment Here