Onosa’i I Mea Tiga

Vaega: 35

 

“Le Atua e, o Lau Afio o lo matou ‘olo maualuga ma lo matou malosi’aga i so’o se mea, matou te fa’anaunau atu i Lau Afio ma o matou loto maualalo i lenei aso ma aso uma o lo matou ola, alofa mai mo i matou Lau fanau vaivai, ia foa’i mai pea ia i matou le loto fa’amagalo, le onosa’i ma le fa’apalepale, ina ia  mafai ai ona o matou faia mea silisili ua E finagalo ia o matou faia, ae ia fo’i atu lava le vi’iga ma le fa’amanu i Lau Afio nei ma aso uma, se ia o’o i le fa’avavau, fa’avavau lava, Amene.”

 

Malo le soifua laulelei i le mamalu o le atunu’u, ae maise o i latou o lo’o fiafia pea e faitau i a tatou tala fa’asolo, o a fo’i ni upu ua le tau tamali’i i lau faitau, ia malu i pu’ega i lou finagalo, o le taumafaiga lava o le auauna fa’atauva’a, ina ia momoli atu se feau taua mo i tatou tatou te manatua ai pea le alofa o le Atua, ae maise o Ana fa’amanuiaga i aso uma o lou soifua fa’apea ma si o’u nei ola vaivai. Ae alo maia, o le a toe fa’aauau atu la tatou tala.

 

Fai mai, ina ua taunu’u ane le toeaina o Lefefe i le fale o Mose ma Malia, ua toe fa’aosofia le fiafia o le loto o le lo’omatuua o Malia, ma ua te’i lava ua uma fa’afuase’i le agi o le afa fulifao lea na agi fa’asolo atoa nei i totonu o le latou fale. Ae ua tau oso ai masalosaloga o si toeaina o Mose, po’o le mea o fai se fa’anice a le lo’omatua ma le toeaina o Lefefe, peita’i, na vave lava ona ave’ese e le toeaina ia manatu, aua ua na iloa lelei, e au lava Malia ma Lefefe i so’o se tonu e fai o le latou aiga.

 

“Malia, se sa ou fa’apea e tele ma malosi lou loto se, a’o lea ua ou va’ai atu nei, se ua ta Down the Vaisinago ia te oe ma au mea. Se loto tele, o le mea e ta i ai le pute, a’o lea o le a avea ma mea o le a tele ai fua le vevesi, o mea e faigofie ona fai, a lava lou onosa’i ma lou fa’apalepale, ua matua’i selau pasene mea uma, ae afai loa ua e le to’a, ia ua oti fa’asolo atoa le mea, onosa’i mai, va’ai ia Mose ma nai tamaiti, ae maise o si au tama o Lilo, fa’ato’ato’a mea uma Malia, alofa mai oe le tina ua ta ta’u tina atu lava oe le faletua o le Sa’o.”

 

Ua le tautala Malia i lea taimi, ae ua liliu ane nei ma tilotilo ane i si ona to’alua o Mose lea e fai so’o i ai ana tala, o Mose ma le ‘ato ‘ofe, ua soloi mata o le toeaina i lea taimi. O le mea na popole i ai le toeaina, ina ne i avea nei mea ma ala e toe oso ai le ma’i o le lo’omatua, ona le aoga lava lea o mea uma. Ua toe fa’asolo le va’ai a le lo’omatua i si ana fanau si tamaloa ua afu le tautua i le aiga, o Vesi, e alofa fo’i i ai le lo’omatua i a Vesi, e tilotilo ane Malia, o lo’o punou lava Vesi ma tagi.

 

Ae fai mai, na tau loa le pupula a le lo’omatua i lana tama fa’apelepele o Lilo, ua toe oso a’e ma le tiapolo o le lo’omatua, a’o le taimi lea, ua le matu loimata o Lilo ua na o le soloi nei ma tilotilo agai i fafo, ua le fia tilotilo ane i lona tina. Na toe oso a’e le toeaina o Lefefe.

 

“Malia, ia e alofa mai, fai mai fo’i o lou suafa o Malia, ia a tatou manatu i ai, o Malia o le tina o lo tatou fa’aola, na talia e Malia tiga ma faigata ma puapuaga na o’o i si ana tama pele e to’atasi, fai mai, na tuia i le pelu o le fa’anoanoa le finagalo o Malia ina ua vaai atu i puapuaga ma tiga na o’o i si ana tama, a’o lea ua ou va’ai atu ia te oe, sole, se e le o se Malia lelei fo’i se lou Malia.”

 

Ua ‘ata le lo’omatua o Malia i lea taimi, “Ia Lefefe, va’ai oe, e ‘ese a Malia le na, e ‘ese le Malia lenei, anusa, ua ta le lava onosa’i, onosa’i, ua ta le iloa ai po’o fea le lelei, a’o fea le leaga. Se o nei tamaiti se, ua fai ma avega mamafa i lo ta loto ma lo ta mafaufau.”

 

Ua leai se isi e toe tautala, ae ua toe tuli tatao ane lava Lefefe, “Malia, ia onosa’i ma saga onosa’i, o le vituti le na ua sili ona taua, fai mai fo’i na e tau alu e te fa’amonike, a’o lena fo’i ua e toe fa’apena mai ma ou ua tau oso ai lo ta fefe.”

 

Ua ‘ata ne’e le lo’omatua i lea taimi ma tilotilo ane i si ona to’alua o Mose, ua tau to’a mai le toeaina i lea taimi, fa’apea fo’i ma nai tamaiti, ae ua fai nei tauga a Malia ma le toeaina o Lefefe. Na lagona e Mose lona loto fa’afetai ia Lefefe, ona ua avea o ia ma fa’amama avega i lea taimi, ae a toe mafaufau le toeaina i uiga o Lefefe e fai pe a fai fa’alavelave o le latou aiga, ua tau oso ai le ma’i fatu o le toeaina ma tau alu ai i luga lona ma’i suka.

 

E faia pea...

Comment Here