Onosa’i I Mea Tiga

Vaega: 6

 

Fa’amalo le soifua manuia i le mamalu o le atunu’u, ae maise fo’i o i latou o lo’o alaala ma papaa’ao i atunu’u mamao, o fea lava o e alaala ai, aua le sa’iliga  manuia, ou te fa’atalofa atu ma ou fa’afeiloa’i atu i lenei taeao fou. “Le Ali’i lo matou Atua, e le fa’atusalia lava mafatiaga ma tiga o lo’o feagai ma i matou, i Lau fa’aolataga na e maliu ai i luga o le Sataro, ae tau ia o se mea e iloga ai lo matou o’o atu i Ou luma i lenei aso, ia paia lou suafa le Ali’i, ia maua pea e i matou le onosa’i ma le fa’apalepale i taimi o mafatiaga ma tiga o le soifuaga nei, amene.

 

Ae alo maia, o le a toe fa’auaua atu la tatou tala mo lenei aso, ae ia manuia lou alo atu i faiva ma tiute o le a feagai ai. Na muta mai la tatou tala, ina ua toe fa’amuolu le pelaue a le Fa’afeagaiga ma toe alu lana savaliga e aga’i atu i le fale o le toeaina o Mose ma le lo’omatua o Malia. Fai mai, na fa’ate’ia le toeaina ma le lo’omatua i le taunu’u ane o le Fa’afeagaiga i lo la fale. Ae manatua fo’i, o lea na alu nei le asuasu o le lo’omatua o Malia, ma ua i’u ai ina lafo upu le manuia ma upu e le maua ai se filemu.

 

E le i taunu’u lelei ane le Fa’afeagaiga, ae ona fa’alogoina le sau o le leo ua pei o pesega a Agelu i le lagi, “Oi, ta fe fe, Talofa e, i le susuga i le Fa’afeagaiga ia Maselino, afio maia, se letioa fo’i a lagilagia le aso, o lea ua asiasi mai le Fa’afeagaga i lenei aiga, afio maia ma tala mai a’ao.”

 

Ua le tautala le toeaina o Mose i lea taimi, aua ua fa’ate’ia fo’i ia, i le taunu’u ane o le Faifeau i lo la fale, ua manatua vave e le toeaina o Mose, le pi tautau Samoa a le lo’omatua lea na fa’aalualu e uiga i le Fa’afeagaiga ma lona faletua, a’o lea ua va’ai mai, ua lotulotu atu le Faifeau e asi atu la’ua.

 

O le mea ua tupu, ua le iloga se mea e gaioi i ai le lo’omatua, ua pei o se tagata ua po’ia fa’aofaga i lea taimi. Ua le mafai ai la ona fai ane se tala a le toeaina i le Fa’afeagaiga lea ua nofoia nei le talaluma o lo la faleo’o. ina ua iloa e le toeaina o Mose ua uma le sauniga mata’utia a le lo’omatua, na ia fa’afeiloa’i ane loa i le auauna a le Atua. “Lau susuga Maselino, ia afio maia ma tala mai a’ao o lau susuga i le Fa’afeagaiga, fa’afetai i le alofa ma le agalelei o le Atua, o lo’o maua pea le soifua laulelei o lau susuga ae maise fo’i le faletua. Ua tau to le sela o le Faifeau, ia ma na tali ane ai loa i le fa’afeiloa’iga a le toeaina o Mose. “ia fa’apena fo’i oe le tama fa’apea fo’i le tina ia Malia, tatou te tau fa’afetai lava, ona o le matalasi o le alofa o le Atua, mo i tatou, fa’afetai fo’i o lo’o manuia fo’i oulua, ae ua o tamaiti i le aoga.? O le toe fesili ane lea a le Fa’afeagaiga. Na toe tali le toeaina o Mose.

 

Ua talatalanoa fa’asamasamanoa nei, i mea o lo’o tutupu i totonu o le nu’u fa’apea ma le Ekalesia. A’o fai le talatalanoaga a le Fa’afeagaiga ma Mose ma Malia, na fa’ate’ia ina ua tu ane Vesi ma le taumafataga. Fai mai, e pei e siva le lo’omatua o Malia, ina ua va’ai ane ia Vesi, ua lagona le fiafia, aua o upu moni lava, e leai se mea’ai na saunia i lea aso. A’o lea ua fa’atei’a i le tu ane o Vesi ma le taumafataga o lea aso.

 

Ua motusia fa’afuase’i le talatalanoaga, ae ua na o le tilotilo ane o le toeaina o Mose i a Vesi, ma lona loto fa’afetai, ona e le i iloa lava e se tasi le tulaga se manu e o’o i ai i lea aso. Na fa’apea mafaufauga lililo o le toeaina, “Talofa e, i si o’u atali’i, se manu lava e tupu se fa’alavelave ogaoga, talu ai lo’u le to’a ma lo’u le mafaufau muamua i le mea e ao ona fai, ua oso mai lava Satani ma fa’aosooso, a’o lea ua fa’aleleia e le Atua mea uma. E moni lava le upu, o manatu o le tagata, e le o le finagalo lea o le Atua ma e i ai lava le taimi o le Atua, pe afai tatou te maua le loto onosa’i i mea uma.

 

E faia pea…..

Comment Here