Vaega: 32

Tatou fa’afetaia pea le alofa ma le agalelei o lo tatou Matai oi le lagi, ona o Lana tausiga ma lana puipuiga alofa mo i tatou e le mavae, e ao ai ona o tatou fa’apea ifo i l enei aso, “Le Atua e, matou te fa’afo’i atu lava le vi’iga ia te Oe lo matou Atua, ia ‘aua lava ne ia te’i matou, a’o le vi’iga ma le fa’afetai fa’apea ma le fa’amanu matou te fa’afo’i atu lava i Lau Afio i mea uma lava, ia e alofa fa’atasi mai ma i matou i lenei aso, ina ia sao ma uli a matou fuafuaga uma, a’o le vi’iga ma le fa’afetai e fo’i atu lava i Lau Afio e le mavae, Amene.”

Alo maia mo le fa’auauina o la tatou tala mo lenei aso, na muta mai la tatou tala ina ua fa’asolosolo mafaufauga o le tama o Lilo, lea o lo’o ta’oto’oto nei i totonu o si ona faleo’o, ae o le taimi lea, ua amata le fetufa’aiga a ona matua e tusa ai ma le tulaga ua o’o i ai lona tuafafine o Filipina.

I le taimi lea, e le o iloa mai e Lilo le mea lea e tupu, o lea lava e fa’asolosolo malie ona mafaufauga ma lona le iloa le tulaga ua o’o i ai si ona aiga i lea afiafi, ae maise ai lona tuafafine o Filipina.

Na fa’apea mafaufauga o Lilo, afai e taunu’u ona mo’omo’oga e nonofo ma mafuta ma Loleta, atonu o lona fesoasoani lea i le taumafaiga o lona aiga. Afai fo’i e malie mai Loleta e fa’ataunu’u o la mana’oga, o le a galue malosi e fa’amautu mea uma mo nai ona matua, e le gata i lea, ae o le a avea Loleta ma ona fesoasoani i mea uma lava, pe afai lava e lelei le tama’ita’i ua ia filifilia e fai ma ona fesoasoani i aso uma ma taimi, uma se ia tu’u ifo lona tino i le tu’ugamau.

Na fa’asolosolo fa’asolosolo lava mafaufauga o le tama o Lilo, i’u lava ina tu a’e i luga ma savali ane loa i le faletele lea ua ia iloa mai nei o lo’o nonofo atu ai nai ona matua e pele i lona loto. Ua liliu nei le toeaina o Mose ma tilotilo ane i le savali atu a lona atali’i i lea taimi, na va’aia e le toeaina le malosi toe fa’afouina o Lilo, ma o se tama e lalelei i le va’ai, o lona faitino ua matua’i selau pasene, o ona uiga ma ana aga, ua matua’i luaselau pasene, ma ua lagona le mimita o le toeaina i lea taimi i le tilotilo ane i le savali atu a lona atali’i e pele i lona loto ma lona mafaufau.

“Lilo, ia sau ia oe si o’u atali’i, saofa’i ane i talane o lona tina, e i ai le mea ma te fia talanoa atu ai ia te oe, ae e le i faia le talanoaga a le tatou aiga i lenei afiafi.” Ua nofo ifo i lalo l e tama i talane o lona tina, a’o le taimi lea, fa’atoa ia iloa ai, e pei lava e i ai se mea o lo’o tupu i ona matua.

Na a’apa ane nei le lo’omatua ma u’u atu le lima o lana tama, ua ia toe manatua, o le isi lea mea o lo’o mimilo ai le loto o Filipina,  ona ua iloa lelei e le teine, e ‘ese le fai tama leaga o le lo’omatua o Malia ia Lilo, ae ua fa’atuatuana’i lava ia. O le isi lea itu, na lagona ai e Filipina le tiga o lona loto, peita’i, sa ia onosa’i pea, ona o lona alofa i si ona tama, ma ia Filipina lava ia, e tutusa uma ona matua, e le fa’asilia lava e ia le tasi ae tia’i le isi, e leai, o a fo’i faiga a lona tina ua ia iloaina, e le amanaia lava e le teine.

Ua sa’ofa’i ifo nei i lalo le tama i talane o lona tina, ma ua amata loa le fetufa’aiga a Lilo ma ona matua. Ae manatua fo’i, o lea ua ta mau i le loto o le tama, o le a ia talanoa i ona matua ina ia alu lana fa’amalamalamaga i matua o Loleta, ma e tatau lava ona i ai se matai o lona aiga la te o fa’atasi e fai le tala i matua o Loleta.

Ua iloa lelei e Lilo, o le avanoa lelei lea e talatalanoa ai i ona matua e tusa ai ma lona mana’oga. O le tala muamua na fai, ia o’o ane Lilo ma le tama’ita’i se i feiloa’i muamua ma le toeaina ma le lo’omatua ona fai ai lea o nisi tulaga e pei ona mana’o i ai Lilo.

“Mose ma Malia, ua i ai lo’u manatu ia oulua malilie maia, e tatau ona ma o’o muamua i matua o Loleta se i fai i ai se tala, ona ma o mai ai lea e va’ai oulua, ma se i tou feiloa’i ona fai ai lea o nisi fuafuaga.” Fai mai, e le i uma atu le tala a Lilo, ae sau loa ma le leo o lona tina, ma o se leo lava ua iloa e le tama o Lilo, o le leo tuai o lona tina.

“Lilo, oi ta fe fe, a’o ai, se i e fai mai ia te a’u, o ai, oka, e sili ifo matua o le na tama’i isumu ia ma’ua, Lilo, ou te le mana’o i ai i lau tonu lena, o mai muamua e va’ai ma’ua, ou te fia va’ai fo’i i ai, po’o ai lena isumu e ta’u mai ia te a’u.”

E faia pea...