Ads by Google Ads by Google

Onosa’i I Mea Tiga

Vaega: 31

 

O le vi’iga ma le fa’afetai tatou te fa’afo’i i le Atua Soifua, ona o Lana tuasiga ma Lana puipuiga e le mavae mo i tatou i aso uma o lo tatou ola. E ao ai ona o tatou fa’apea ifo, “Le Ali’i, ia e alofa mai i si o matou atunu’u atoa, ia i ai pea au fa’amanuiga i luga o Samoa atoa, ia matou manatua pea, o le fa’avae o si o matou atunu’u ia o matou fa’amuamua pea Oe Tama e le aunoa i mea uma lava, afio mai tatou ma Oe i lenei aso, ina ia sao ma uli a matou fuafuaga uma, a’o le vi’iga ma le fa’afetai e fo’i atu lava i Lau Afio e fa’avavau, fa’avavau lava, Amene.”

 

Ia manuia lou alo atu i feau ma galuega o le a feagai ai i lenei aso, ae alo maia, o le a toe fa’auau atu la tatou tala mo lenei aso. Na muta mai la tatou tala, ina ua uma ona talatalanoa le lo’omatuao Malia i lana fanau teine o Filipina ma Luisa, ae e le o iloa atu e le lo’omatua, o lea fo’i ua uma ona talatalanoa le toeaina o Mose ma le to’alua o Luisa, le tamaloa o Vesi.

 

O lea fo’i la ua iloa e le tuafafine o Lilo le teine o Filipina ma ua fa’ate’ia ai le tama’ita’i ina ua fa’alogo atu i tala a lona tina. O le mea ua tupu sa mamao lava ma le mafaufau o Filipina se tulaga fa’apea o le a tupu mai i lona tuagane, ma o le ala fo’i lea ua le talia ai e le teine le manatu o lona tina.

 

Fai mai, ua tu a’e nei i luga Filipina ua tagi ma savali atu i le isi itu o le faletele o lo’o nonofo ai ma ona matua. O na fo’i aso, sa le tagolima le tele o nai aiga, e leai fo’i se mea e maua ai se seleni, se i vagana o galuega o lo’o faigaluega ai le fanau ua i’u mai a’oa’oga, ona fa’atoa maua lea o se seleni e tausi ai aiga.

 

Ua taunu’u ane le toeaina o Mose ma le tamaloa o Vesi, ma o mea mase’i na va’ai nei i ai le toeaina i lea taimi, aua ua uma le fa’afiafiaga le totogia a le lo’omatua o Malia, a’o lea ua va’ai mai, ua tu a’e i luga lona afafine o Filipina ma savali ‘ese ma ta tu ona vae. Ua le iloa ai la e le toeaina le mafua’aga o le mea ua tupu, o lea na ia fai ane ai ia Vesi.

 

“Vesi, o a fo’i ia ituaiga mea fa’apea, a tali e, tali e, te’i lava ua fa’ai’u masei le talie’ega.” Ua ‘ata Vesi ma fa’apea ane i le toeaina, “Mose, ia ai o se mea na matamata ai le lo’omatua ma lana fanau teine i se tifaga.”

 

Ua ata le toeaina o Mose ma tilotilo atu i le faletele lea o lo’o nofo nofo mai ai si ona to’alua fa’apelepele i lona loto ma lona agaga o Malia. E le i toe fa’atali le toeaina, “Malia, o le a le mea ua tupu, oka, se pei oe o se tiapolo se, e te le a’oa’oina teine i ni tu lelei, ae ua solomua ia te oe le fai mea valea, ia o le a la le mea ua tupu, o le a le mea ua teva ai Pina.?”

 

Ua le tautala le lo’omatua o Malia, ae ua fa’alogo ifo ua o’o le vaivai i lona loto, ma na tali atu ai i le toeaina, “Mose, sau ia, sa i ai lava lo’u manatu, a ou fa’ailoa ia Filipina ma Luisa le tulaga e pei ona talanoa mai ai Lilo, o le a talia gofie i o la mafaufau, a’o lea ua ou va’ai atu, ua ‘ese lava le tulaga ua o’o i ai Filipina. Ua tu sasa’e lava alu ‘ese, a’o lea e tau fa’amalamalama atu i ai le tulaga ua mana’o i ai Lilo. Ua ou le iloa ai la po’o le a le mea o lea fai Mose. Ae a tonu e sau se taimi e malamalama ai le mafaufau o Filipina i tulaga fa’apenei, na pau lana tala na lafo mai, e le i taitai lava ona uma ona totogi le la aitalafu ma Lilo i a ta’ua, a’o lea ua mana’o Lilo e fai lona to’alua.”

 

Ua tu le toeaina o Mose ua le tautala, au ua na o le lulu o lona ulu ma tilotilo ane ia Malia i lea taimi. “Malia, ia onosa’i ia oe le lo’omatua, ae e tatau lava ona e fa’atali se i o’u sau, ona ta talanoa fa’atasi lea i tamaiti, atonu e malamalama ai le mataupu, ae ta’atia se i uma ona fai le mea’ai o le afiafi ona ta talanoa ai lea i tamaiti.”

 

Ua fa’apea lava ona fai, a’o le taimi atoa lava lea, o lo’o fa’asolosolo pea mafaufauga o le tama o Lilo i totonu o si ona faleo’o o lo’o nofo ai nei. Ua tau lana va’ai i pou o le fale, e tagi le loto, fa’asolo ane i la’au o lo’o tau so’oso’o ai le isi itu o le faleo’o, ua maligi ifo ona loimata. Na fa’apea lana tala, “E, se mea a leaga o le mativa ma le le tagolima.”

 

E faia pea...