Ads by Google Ads by Google

Onosa’i I Mea Tiga

Vaega: 29

 

Fa’atalofa atu ma fa’afeiloa’i atu i le mamalu o le atunu’u i lenei taeao fou, malo le soifua, malo fo’i le onosa’i i faiva ma tiute o lo’o feagai. E ao ai ona o tatou fa’apea ifo, “Le Alii e, ia e alofa, foma’i mai ia i matou le loto salamo moni, ina ia o matou maua ai pea le fa’atuatua ola matou te tapua’i atu ai i Lau Afio ma o matou loto maualalo, a’o le vi’iga ma le fa’afetai e fo’i atu lava i Lau Afio e fa’avavau, fa’avavau lava, Amene.”

 

Na muta mai la tatou tala, ina ua fai nei le fa’afiafiaga a le lo’omatua o Malia ma lana fanau teine o Luisa ma Filipina, a’o le taimi lea ua o’o i vaimauga o Aikupito miti a le tama o Lilo. O lea ua fa’aigoa nei e le lo’omatua o Malia si tama o lo’o sau i ata tifaga ia Pusali, ae le iloa o le igoa moni o le tama o Bruce Lee, le tama ua ta’uta’ua i le kalate.

 

Ia a tonu e lelei lima o le lo’omatua i le kalate fua i le fiafia e fa’atino kalate, a’o lea la ua talie ane i ai lana fanau. O le taimi tonu lea ua taunu’u ane le solo a le toeaina o Mose ma le tama o Vesi. Fai mai, na fetaui tonu lava le pau o le ie o le lo’omatua o Malia ma le taunu’u ane o le toeaina.

 

“Vesi, se i va’ai atu ia oe, se o mea a nei, o mea a nei, o lea fo’i ua ou va’ai atu, ua toe fo’i lava le lo’omatua i ona uiga tuai sa i ai, se i va’ai atu ia, oka, oka e, a ou fiu lava e tau nana atu fa’afanua a Aferika o lae e tau su’e, ae fa’aaliali lava e le lo’omatua.”

 

Ua ‘ata Vesi ma tilotilo ane i le toeaina o Mose, “E a Mose, o a fa’afanua na e te ta’u maia.?” Ua ‘ata ne’e le toeaina ma fa’apea ane ia Vesi, “Vesi ia tu’u la’ia, la lea, la lea.”

 

Ua ‘ata Vesi ma tilotilo ane i a Mose i lea taimi, ae toe fa’alogo atu Vesi ua toe sau le talie mai i lo latou fale. Ua tau autilo atu nei Vesi po’o ai, ae ona iloa atu ai lona to’alua o Lusia ma Filipina, ae va’ai atu i le isi itu, o lo’o ‘ata mai ai le lo’omatua o Malia, a tilotilo ane i lana fanau teine. Na fa’ateia Luisa ma Filipina Ina ua fa’apea ane lo la tina, “Ia Pina ma Isa, fa’alogo mai oulua si a’u fanau, e i ai le mataupu ou te fia talanoa atu ai ia te oulua, ae fa’alogo lelei mai lava oulua. Ua uma ona talanoa mai si o oulua tuagane o Lilo, o ia ua i ai le tama’ita’i ua fai le la uo, ma ua mana’o fo’i e fa’aipoipo.”

 

Ua toe fa’aauau le tala a le lo’omatua, ae na fa’ate’ia teine, ina ua tau le manino tala a lo la tina, aua ua va’ai atu nei teine ua maligi ifo loimata o si o la tina. “Pina ma isa, ia e sau se taimi ona tautala atu lea o le lua tama, pe a taunu’u mai, ae ua fai le ma tala ma le toeaina ia Lilo, e au mai le teine se i o ma va’ai i ai ma ma feiloa’i fo’i iai, ona ma iloa ai lea pe lelei pe a.”

 

“Ua tau le mafai e le lo’omatua ona tautala i lea taimi, ae sa taumafai ane pea se tala ina ia fa’amalamalama ai i teine le mea ua loto i ai lo la tuagane. “Isa ma Pina, afai lava o le mea lea ua loto i ai Lilo, ua o ma malilie fo’i i ai, ae pau lava lenei, ou te fia va’ai i le tama’ita’i o le a avea ma fesoasoani mo si o oulua tuagane e o’o mai le fa’avavau, sa i ai lava lo’u manatu e le o aso nei, ae ui i lea, tatou te le mau pea, e alu aso, sau fo’i aso, tatou te mavae ai ma tatou tete’a ai, ae ia oulua au mai se fa’amama avega i a ma ua ma le lua tama.”

 

Ua leai se isi e toe tautala i lea taimi, ae ua na o le nonofo nei o teine, ma tilotilo ane i lo la tina, e ui fo’i o i la’ua, ae ua iloa lelei e teine, o le au o lo la tina o le la tuagane o Lilo. O le ala fo’i lea ua leai ai se isi e toe tautala. Ua fa’asi’usi’u mata ane nei Filipina i lona uso o Luisa e fai sana tala, ma o lea na tautala ane ai loa Luisa i lo la tina.

 

“Malia, ia fa’afetai lava ia te oe le tina, ina ua e fa’aali maia lenei mataupu, pau la’u fautuaga ma la’u tu’ualalo, ia e loto tele Mama, afai lava o le mea lea ua loto i ai Lilo, ia fai le mea ua loto  i ai ia, ua ou malie fo’i i ai. O lea fo’i ua fai lo’u to’alua ma la’u fanau, e le o se mea faigofie, ae o le onosa’i lava e fai ai mea uma.”

 

“Ae se i taunu’u mai lo ma tama ona tatou toe fai upu ai lea, ae ia e loto tele Mama, fa’afetai atu mo mea uma lava, ae tatou auai ia fa’apea.”

 

E faia pea…..