Vaega: 28

Fa’afeiloa’i atu ma fa’atalofa atu i lou alafa’i mai i le manuia i lenei taeao fou i le tausiga alofa a lo tatou Matai oi le lagi, e ao ai ona o tatou fa’apea ifo i lenei aso, “Le Ali’i, au maia Lou filemu mo i matou i lenei aso, aua a o’o mai tiga ma mafatiaga ua o matou tapena e talia mea uma ma le loto onosa’i ma le fa’apalepale, ia vi’ia lava Lau Afio e fa’avavau, fa’avavau lava, Amene.”

Na muta mai la tatou tala, ina ua fai le talatalanoaga a le toeaina o Mose ma le tama o Vesi, lea na fai ai le tala a le toeaina, ua sili pe a toe su’e se isi tama’i simolo se sui ai fo’i le fa’amafanafana a le toeaina. Fai mai, ua ‘ata ne’e Vesi i lea taimi i le fa’alogologo atu ua ‘ese le tala lea ua fai ane e le toeaina. Na toe tuli tatao ane lava e Vesi, “Ia onosa’i lou loto, onosa’i lou loto, po’o a lava nisi fa’amafanafana o lo’o e mana’o i ai, e sili lava le mafanafana le na ua e maua i si lo’omatua, ma o lau fa’amafanafana lava le na se i o’o ina tu’u ifo lou tino i le tu’ugamau, e le toe maua lava se isi.”

Ua ‘ata le toeaina o Mose ma fa’apea ane ia Vesi, “Ia Vesi, se na o tala lava ta te to e ai, a’o le mea moni lava ia, ua lava ma totoe le fa’amafanafana a le lo’omatua e sa’o lava oe, e o’o mai le fa’avavau, ae leai se amene.” Ua alu nei le talie a Mose ma Vesi, a’o le taimi lea, ua taoto ifo Lilo i luga o lona aluga ua o’o le vaivai i le fa’asolosologa o ona mafaufauga.

Ia e sa’o lava, a o’o lava i le taimi e fa’asolosolo ai o tatou mafaufauga, e tami ane i tua pa o ierusalema, tami ane i Aikupito, o’o atu i isalaelu, alu ane i Manono Tai, ae fa’ai’u i le mafa i Lotofaga. Ona lagona ai lava lea o le vaivai, ma pei ua gagase tino. O le tulaga tonu lava lea ua o’o i ai le tama o Lilo i lea taimi. Ma na i’u ai lava ina taoto ifo ma ua fa’asolosolo loa ma nai ana miti malie. Ae fai mai le isumu la’ititi, “La lea, la lea, Lilo, mimiti lava oe, ‘aua lava le fa’aitiitia, matua’i fuli e mimiti, agusa ua e fia fai to’alua e ke le i kaikai lava, kausi muamua gai ou makua, ona fai ai lea o le mea o lo’o e loko i ai.”

Ua amo ane nei amoga a Vesi ae savalivali ane le toeaina o Mose, ua toe fo’i ane i le fale, ua ma’ea le la galuega fita na feagai ma i la’ua i le afiafi. Ua taunu’u ane nei i le fale, ae fa’alogo mai o alu atu le talie a tagata, ua tu le toeaina o Mose ma fa’apea ane ia Vesi, “Se Vesi, pei uma lava o le tatou fale lea o lo’o sau ai le taliega lea, ai fo’i ua ta le faleaitu a le lo’omatua, se na fai mai nei fo’i ia te a’u, ua sui, a’o lea lava e fai lava, se na o mea gau lava ma mea nuti lea e maua nei.”

Ua ‘ata Vesi, “Se ai fo’i o fai ni tala malie a le lo’omatua e fa’atoea ai lana fanau teine, ua uma fo’i lava ona tatou iloa, o fea lava e i ai le lo’omatua, tatou te fa’alogo atu o sau se taliega a tagata, ia soia ia, ua pau lava o ona uiga fiafia.”

Ua lulu le ulu o le toeaina o Mose ma la’a lava, e leai ni ona se’evae, ae o lona manatu o lo’o i ai, a toe maua le siaki a lona atali’i o Lilo, ona fa’atau ai lea o ni ona se’evae. O le taimi lea, o lo’o fai le fa’agogo a le lo’omatua o Malia i lana fanau teine o Luisa ma Filipina. Ua na o le talie nei o teine ae ua tu i luga le lo’omatua ma siva, ua sisi i luga le ie, ae fa’aaliali le malu matagofie a le lo’omatua. A uma, ua tamo’e ua a’e i luga o le pou o le fale, o lea la ua pau nei le ie, lea la e alu ai le talie a Luisa ma Filipina.

Ona e va’ai atu teine, e leai se afei o le lo’omatua o faia, ua ‘ata ta’afilifili le teine o Filipina, ae ua tu nei le lo’omatua ma fa’apea ane i lana fanau, “Ia oulua malilie ia, o le mea na sau i le ata tifaga na ou matamata ai i aso o o’u la’ititi. A oulua va’ai i le ata o le tama o Pusali, ou te fai atu e le toe maua e se tagata.” Ua ‘ata Filipina ma fesili ane i lona tina. “O ai le igoa o le tama.? Ua toe tali le lo’omatua, “Se o Pusali.” Na toe tali ane Filipina ma lona ‘ata tele, “Mama, e le o Pusali le igoa o le tama, o Bruce Lee.” Ua toe tali ane lona tina, “Ia o Pusali pe a fa’aSamoa.”

E faia pea...