Onosa’i I Mea Tiga

ausage@samoanews.com

Vaega: 25

 

“Le Ali’i e, sa E talia tiga ma puapuaga uma a’o e sagai atu i Lau galuega togiola mo i matou le tagata agasala. ia malu Lou Finagalo ma fa’amagalo mai ia i matou, matou te tutu pea ma o matou loto atoa ma lo matou fa’atuatua ia toe Oe, ua na o Oe o lo matou olataga i taimi o faigata o le olaga nei. A’o le vi’iga ma le fa’afetai matou te fa’afo’i atu le Ali’i e, maualuga pea Lou vi’iga e fa’avavau, fa’avavau lava, Amene.

 

Na gata mai la tatou tala ina ua uma nei le tonu a Lilo ma Leta, o le a o muamua i matua o Loleta e fa’ailoa ai le tulaga ua o’o i ai o la manatu, o le fia fa’atasi lea se i o’o mai le i’uga. Ua fa’apea lava ona fai, o a fo’i fautuaga na tu’u ane e le uo a Lilo le tama o Pule ia Lilo, ae ua le mafai ona toe suia ai le mafaufau o Lilo, ua alofa fa’amaoni ia Leta.

 

Ua o’o nei i le aso e o ai Lilo ma Leta i matua o Leta, na lagona le popole o le tama fa’atasi ai ma si ana tatalo le leoa, aua o se tupua lilo le mea lea ua fai nei. E le o iloa e matua o Lilo o lea o le a o i matua o Loleta. Fai mai na a’o lelei e si ana uo o Pule le lauga a Lilo e fai pe a o’o i le taimi e fa’afesaga’i ai ma matua o Loleta. Ua matua’i sauna lelei le tama o Lilo i lana lauga e fai i matua o Loleta.

 

O Loleta, o lona tama o lo’o va’aia le nu’u po’o le sa’o fo’i o le aiga ua lauiloa i Samoa, fa’atasi ai ma le aiga o lona tina. O lona tama fai mai le tala na masaesae ai le lagi, a’o lona tina e sau mai le aiga paia, e fai lava la si faigata o le tulaga ua o’o ne i ai Lilo.

 

O matua fo’i o Loleta fai mai le tala e fai faleoloa, ma pa povi, ma fa’atoaga a le aiga, o le ala fo’i lea e fa’amaualuga a Loleta na te maua mea uma. O le isi itu, ua iloa uma e tama’ita’i o lo’o galulue fa’atasi ma Loleta ma Lilo le tulaga o lo’o i ai le aiga o Loleta.

 

Ae fai mai le tala ua matua’i tu’u atoa le loto ma le mafaufau o Lilo i lana lauga, o upu foi o l lauga a le tama ua matua’i selau pasene, aua o le lauga na tusi e si ana uo mamae o Pule. O Pule e lelei tele le lafolafo a le tama, ma e a’o lava e lona tama, o lona aiga fo’i, e le o si tama’i aiga, o se aiga ua lauiloa fo’i i a Samoa atoa.

 

Ae peita’i, na toe tau lava i le loto ma le mafaufau o Lilo, e tatau ona i ai se tasi la te o fa’atasi i le fale o matua o Loleta mo le fa’amalamalamaga, e le tatau ona alu na o ia. O tu fo’i ia ma le aganu’u a Samoa e tatau lava ona fai. O lea na toe talosaga ai loa Lilo i lana uo o Pule, pe mafai ona la o e fai le tala i matua o Loleta. “Pule sau ia si o’u uso, malie lou loto, sau ta o e fai le tala i matua o Loleta, ua ou iloa lava o le mea e tatau ona fai, aua o lona uiga a ou alu na o a’u, e lililu mai le toeaina feagia’i solo a’u i fafo pe a va’ai mai le toeaina na o a’u o lo’o atu atu, ae malie maia oe, sau ta o e fai le tala i matua o Loleta.”

 

E le i uma atu le tala a Lilo ae liliu mai lana uo o Pule, “Lilo, va’ai oe le uso se o mea faigofie mea na, e pei o le selo ia te a’u, ae va’ai oe, afai ta te o, o lona uiga e agi fa’atasi ai ta’ua e matua o Loleta, e tatau lava ona oulua o ma se matai o lou aiga, ma o mea sasa’o lava mea na, e le tatau ona ta o, ae va’ai se isi o lou aiga e te lua o e va’ai matua o Loleta, ma ta’u fo’i i ai le tulaga ua e mana’o i ai.”

 

Ua le tautala Lilo, ae ua mafaufau nei, ua utia i le va lea, ona e le o iloa e ona matua o le a alu e va’ai muamua matua o Loleta, e leai fo’i sa latou tala na fai e uiga i ia mea, a’o lea o le a alu na o ia. Na toe tali Lilo, “Pule ia ua lelei, e sa’o fo’i oe, e tatau lava ona ma o ma se matai o lo’u aiga, aua o le mea e tatau ona fai.”

 

Ua manava Lilo i le afiafi, ma ua aga’i atu loa i lo latou aiga, e pei o se ao fa’aniutu i le mafaufau o le tama le tulaga o le a o’o i ai, ae fai mai, na to’a lava lona loto, aua ua na iloa, ua suia uiga o lona tina, ua le toe pei o le mea sa i ai muamua, ma ua loto tele ai fo’i, e fa’ailoa lona manatu i ona matua e tusa ai ma lona mana’oga.

 

E faia pea….

Comment Here