Ads by Google Ads by Google

Onosa’i I Mea Tiga

ausage@samoanews.com

Vaega: 24

 

Taeao manuia, i lou alafa’i mai i fanuga lelei o lenei aso fou, o se aso e fa’aopoopo i lou soifua fa’apea ma si o’u nei ola vaivai, e ao ai ona o tatou fa’afo’i pea le vi’iga ma le fa’amanu i le Atua Soifua, ona o Lana tausiga alofa ma Lona agalelei mo i tatou i aso uma o lo tatou ola. Ae alo maia, o le a toe fa’aauau atu la tatou tala fa’asolo, ae ia manuia le alo atu o le atunu’u i faiva ma tiute o le a feagai ai i lenei aso.

 

Na muta mai la tatou tala, ina ua le sao le mea na i le ulu o le tama o Lilo, ina ia o la o’o muamua e va’ai ona matua ma le tama’ita’i, ua fa’ananau i ai lona loto, a’o lea ua manumalo Loleta i le la finauga, e tatau ona muamua o’o i ona matua. Ae se i tatou tulituliloaina, po’o fea o le a o’o i ai lenei mea.

 

Fai mai le tala, na alu le na aso atoa ua le iloga se tama’ita’i o le ofisa o lo’o galulue fa’atasi ai Lilo ma Leta, e le i tala’i i ai e Loleta le fa’aiuga o le la talanoaga ma Lilo. Ua avea la tulaga ia ma ala ua tau matamuli ai le tama, ona ua so’o se mea lava e savali i ai, aua o ia ua supavaisa i le aufaigaluega atoa, e ave uma i ai mata o le au faigaluega.

 

Ae e i ai la si ana uo, o le tama e ioga ia Pule, fai mai na o le pau lea o le tama na fai sa’o lava i a Lilo, e le i fa’aaloaloa ana fa’amatalaga. Ina ua o’o i le taimi e malolo aim o le vai’aiga o le aoauli, na a’ai fa’atasi ai Lilo ma Pule. Na ona saofa’i ifo lava i lalo o Pule, lulu ma lona ulu ma tilotilo ane i a Lilo. Na tau mafaufau nei Lilo, po’o le a le uiga o le mea lea ua lulu ane ai le ulu o lana uo ia te ia.

 

“Pule, o le a fo’i le mea ua mamafa i lou mafaufau, se tautala mai, ona ou iloa ai lea, ae ‘aua le u maia lou ulu, e le o a’u o se fa’atagata, gagana mai, ona manino lava lea o le mata o le vai, e a e sa’o.? Ua le tautala Pule, ae ua toe lulu fo’i lona ulu ma tilotilo ane i lana uo o Lilo.

 

“Lilo, se fa’atoa ou iloa lava lea o si tama’i fai’ai lava lena e te fealua’i ma oe, o e iloa ua uma ona tala’i e Loleta i tagata faigaluega, le lua tala na fai, o lea o le a oulua o maumau i ona matua e ta’u i ai le lua fa’aipoipoga, se na o mea to’ilalo lava e te faia e oe ia, sa ou fa’apea, e lava le tofa ma le fa’autautaga i a te oe, a’o lea ua ou iloa atu nei, e leai sole, na o si atigi pupu lava lena e te fealua’i ma oe se.”

 

Fai mai, o le taimi lea, ua tau le taofiofia Lilo, “E a Pule, se talanoa fa’alelei mai, o lea ou te fia iloa le mea o lo’o tupu, ae ‘aua e te talanoa mai fa’apena, o lea fo’i ou te tau matemate atu lau tala, tau polili teuteu mai, ae le o le fa’apena mai o au fa’amatalaga.”

 

Ua toe punou i lalo Pule ma lulu lona ulu ua ea a’e nei i luga ma fa’apea ane i a Lilo, se Lilomaiava,  se tu’u ia au tala, se na o mea lava e le mau ai la ta ‘afa se i a te oe, na ou fautua atu lava i a te oe, e tu’u Loleta, ae ia lua feoa’i ma Lasi, o fea nei la, ia o lea, o lona uiga e uma mea a le tou aiga ona tala’i solo e Loleta, e le o se teine lelei, e ma’imau ai oe, piliota, uma upu.”

 

“O le isi itu, Lilo, e uma au tupe ona fa’atau ai lipisitiki, o vali atigilima, o se’evae muli u’umi ma lavalava o Loleta, ae le a’ai ou matua, e le o pupula atu lava i ai ou mata, a usu mai i aso uma, e leai se mea e fa’aletonu, ae va’ai ia Lasi, ma teine uma o le ofisa, o le a le mea e maua, ae maua le agaga fa’afetai, ona o pau o se mea ua o’o i ai le malosi, a’o Loleta, ia ta’ilo fo’i.”

 

E faia pea….