Vaega: 23

Ua va’aia ‘ata’ata o le aso fou, e fa’ailoa mai ai le mamana ma le silisili’ese o galuea a le Atua Soifua, ona o tatou fa’apea ifo ai lea, “Le Ali’i, fa’afetai, fa’afetai tele i Lou alofa ma Lou agalelei mo i matou, o a lava mafatiaga ma faigata o lo’o matou fa’afeagai i aso uma, ae e le mavae lou alofa, ae matou te fa’afo’i atu lava le vi’iga ma le fa’ane’etaga i Lau Afio e fa’avavau, fa’avavau lava, Amene.”

Ia alo maia, mo le vaega lona luasefulutolu lenei o la tatou tala fa’asolo e pei ona masani ai, ae ia manuia le alo atu o le atunu’u i feau ma galuega o le a feagai ai i lenei aso. Na muta mai la tatou tala, ina ua malilie nei Mose ma Malia e tusa ma le fanoga o si a la tama o Lilo, ina ia mafai ona o’o ane lana manamea i lo latou fale, se i o latou feiloa’i ma se i va’ai fo’i le lo’omatua ma le toeaina, i si fasiteine a le tama o Lilo.

Fai mai le tala, ina ua feiloa’i Lilo ma Loleta i le aso e soso’o ai, na fa’ailoa loa i ai e Lilo le latou talatalanoaga ma ona matua o Mose ma Malia, ma ua fa’ailoa fo’i e Lilo i a Loleta, ua malilie ona matua e o’o atu i lo latou fale. Fai mai le tala, e le i uma atu tala a Lilo, ae fa’asalavei ane e Loleta, “A Lilo, o lea ua e fai mai ta te o i ou matua, a’o lea ua ou fiu e tauanau oe ta te o muamua i o’u matua, ae e foliga mai e te musu, ua ou le iloa ai la po’o fea le lelei, a’o fea le leaga, aua o lea ua ou iloa atu nei, ua e mana’o ta te o muamua i ou matua, ae tatau ona ta o muamua i o’u matua, e fa’ailoa i ai oe.”

Ua le tautala Lilo i lea taimi, ae ua fa’asolosolo ona mafaufauga i se tala o le a fai ane i a Loleta, si ana manamea fa’apelepele, ua ia alofa fa’alausoso’o i ai, ae never fa’amotumotu. Na i’u ina tali ane Lilo, “Leta, ia malie ia oe le tama’ita’i, va’ai o mea e tatau lava ona fai, e tatau ona ta o muamua i o’u matua, ae mulimuli ai ou matua, e a le na tonu.” Ua le tautala Loleta, ae foliga mai ua tau oso a’e le fa’ali’i, “ali’i Lilo, ia o a na mea fa’alupelupeina fa’apena, e muamua o taua i matua o oe, ae tia’i o’u matua, e leai se mea fa’apena, e muamua o ta’ua i o’u matua, ona fa’atoa ta o ai lea i ou matua, ma o mea sasa’o lava mea na e le o ni mea pipi’o.”

Na tau manava i totonu Loleta ona toe fa’apea ane lea, “Lilo, se fai fa’alelei mai ea a ta mea, aua o upu moni lava, e te sasi mai loa i a te a’u i le va lea, the end loa ma le mea a ta’ua, ua e fa’alogo mai, fa’aaoga lou mafaufau, ae le o le fa’aaoga o le isi mea e le manogi lelei ai le ea, fa’asa’osa’o ae le o le fa’api’opi’o fa’apena, aua ta te o pi’o ai lava fa’apea.”

Fai mai e fa’alogo atu si tama o Lilo, ua ‘ese le sau lea e sau ai Loleta, o lea na ia tau apata ai loa, e tau su’e sina avanoa e toe fa’ato’ato’a ai le mea, aua o lea ua fa’alogo atu, e foliga mai ua tau musu Loleta. “ia Leta, malie lou loto, se e aoga lava mafaufauga ma manatu uma, a fo’i o le aoga lea o le ta mafutaga, e te fautua mai i a te a’u i mea e tatau ona fai, o le aoga lea, ae ua lelei, o le a fai le ta tonu le na, e sa’o fo’i oe e tatau ona ta o muamua i ou matua, ae mulimuli ane ai nai o’u matua, e a le na tonu, e sa’o pe se se.”

Ua ‘ata ne’e Leta i lea taimi, aua ua tau tonu i le fai’ai o si tama o Lilo lana tala, o lea fo’i la ua iloa ai e Loleta i le va lea, e leai, o le amataga lea o le mafutaga, o le a fa’alogo lava Lilo i ana fautuaga, e o’o lava i le fa’avavau fa’avavau lava amene. Ua atili ai ona si’i i luga tau’au o Leta, ua mafaufau i le la mafutaga ma Lilo, aua ua iloa lelei lava e Leta, e to’atele tama’ita’i o le ofisa, o lo’o fa’amata tasi ane i a Lilo, a’o lea ua soli i ona vae.

“Leta, fa’avavevave le tonu, aua o lo’o fa’atali mai o’u matua, sa i ai lou manatu ta te o taeao, a’o lea ua toe sui le tonu, e tatau lava ona ta o e va’ai ou matua taeao, ae ta’atia nai o’u matua i le aso e soso’o ai.” Na tali Leta, “Ioe, Lilo, o le a fai lava le mea ua e finagalo i ai, oe le tama faigata.”

E faia pea...