Vaega: 22

Fa’atalofa atu i le alafa’i mai o le atunu’u i fanuga lelei o lenei aso fou, o se aso e fa’aopoopo i lou soifua fa’apea ma si o’u nei ola. E ao ai ona o tatou fa’apea ifo, Le Atua e, e silisili lava Lau Afio i mea uma matou te manatu i ai, e leoleoina ai i matou mai faigata ma puapuaga o le soifuaga nei, fa’afetai i Lou alofa, a’o le vi’iga matou te fa’afo’i atu i Lau Afio e fa’avavau fa’avavau lava, Amene.

Ua fa’asolosolo pea aso o le mafutaga, ma o le ma’i o le lo’omatua o Malia, sa i ai le manatu o se ma’i tumau, ae ina ua va’ai e le foma’i, na iloa ai, e le o se ma’i tumau, ae o le ma’i e mafai ona togafitia. Ae fai mai le tala, ua le mavae le lotu ma talotaloga a le lo’omatua ma lana fanau. Ua le mapu fo’i le pese o le lotu i afiafi uma, atonu o le mafua’aga lea ua toe malosi ai le lo’omatua, ua alu le lavea’i i le Fa’afeagaiga ma lona Faletua, ua o’o fo’i i le Autalavou, ua le misi faigalotu, ona i ai lea o le manatu maumau tutu, atonu o le mafua’aga lea ua toe fa’afo’isia ai i le manuia le ma’i o le lo’omatua o Malia.

Ina ua mautinoa ua malosi le lo’omatua o Malia, fai mai le tala, o ona uiga fa’amaualuga ma ona uiga fia sili, ua le toe i ai, ua va’aia nei e tagata o le nu’u le suiga lelei ma se suiga maualalo. Ua le toe pei o se tiapolo le lo’omatua, ae ua pei nei o se tagata ua toe fa’afouina le malosi. Fai mai, e pese le lotu o le vaveao, toe pese le lotu o le afiafi, o a fo’i ona uiga sa fai, ua le toe faia e le lo’omatua, ae ua liliu ane nei e fai lelei mea o le nu’u, fa’apea ma le aulotu o lo’o tautua ai.

Ua moni ai le upu, ua seu i lagi le filifili o lupe mau, ma ua tu ai nei i le laga’ali lupe o fa’amoemoega lelei. E avea lava mea e tutupu, tatou te lagona ai le fa’amaualalo o tatou loto, ma tatou va’ai ai i le Ali’i e ala i ana fa’amanuiaga ma lona alofa mo i tatou, ua fa’apena uiga ua iloa nei e le toeaina o Mose ma le la fanau. Ua le toe talia e Malia se upu a le toeaina o Mose, o aso uma fo’i o le mafutaga ua fetufa’ai i mea e lelei ai aiga, nu’u ma Ekalesia.

Fai mai, ina ua mautinoa e le tama o Lilo ua malosi ma ua toe fo’i i le manuia le ma’i o si ona tina, o lea na tonu ai loa i lona mafaufau, o le a folasia i malae lona mana’oga, atonu fo’i, o se fiafiaga sili lea mo nai ona matua. Ma ua fa’apea lava ona fai, ua fa’ailoa nei e Lilo lona mana’oga i luma o ona matua, ae fai mai sa tau liu ai fo’i le lo’omatua o Malia i le tala lea a lana tama, peita’i, sa ia toe mafaufau ifo, ua matutua si a la fanau, o lea fo’i ua fai aiga Luisa, ae maise o le tautua vae a si tamaloa o Vesi, ia a tonu o le finagalo lea o le Atua.

Ina ua uma le mea’ai a le aiga i le isi afiafi, na folasia ai loa le mana’oga o Vesi, ma ua fa’ailoa i ona matua, ua i ai se tama’ita’i ua ia mana’o ia o’o ane i lo latou fale, ina ia feiloa’i i ai ona matua, ma ua tonu fo’i i lona loto, o le a avea ma ona fesoasoani i aso uma o lona olaga. Fai mai e fai ane le tala a Lilo, ae ua leva fo’i ona tau mafaufau lona tuafafine o Filipina mo lona ia fo’i mana’oga. O lea la ua folasia muamua le mana’o o Lilo, o lea ua taofi ai loa le mana’oga o Filipina, se i sau se taimi.

Sa lagona e le toeaina ma le lo’omatua le faigata, peita’i, ua la iloa fo’i, e i ai se aso e o ‘ese ai si a la fanau, ma e le mafai ona taofia e i la’ua lea tulaga, ona ua la iloaina, o le soifuaga lenei, e le mafuta pea i aso uma, e sau aso, alu aso, ona fa’asino mai lea o le tofi o le tagata latou.

Ua tali ioe matua o Lilo, ma ua fa’apea lava ona fai, ua fai fo’i ma le tonu, o le vaiaso e soso’o ai, o le a o’o ane ai le tama’ita’i, se i feiloa’i i matua o Lilo, e pei ona i ai le mana’oga o le tama. Ina ua tao’oto Mose ma Malia i o la tofaga, na toe musumusu ane ai le lo’omatua i le toeaina, “Mose, talosia ia sau le teine, o se teine e malie ai lo’u loto, aua e vave lava ona ou ‘asua i fafo ma le fale”. Na tali le toeaina, “Malia, se soia ia, mafaufau o lea ua e malosi, fa’afetai i le Atua, ae tu’u ia na manatu, o le a lava le mea ua loto i ai Lilo, o le mea lena e fai, tu’u loa, ua matua’i o’u lailai lava i au faiga.”

E faia pea…