Onosa’i I Mea Tiga

Vaega: 4

 

Fa’atalofa atu i lou alafa’i mai i fanuga lelei o lenei aso fou, o se aso tatou te manatunatu ai i le foa’i a le Atua  mo i tatou, e ala lea i le taulaga ola na molia e Lona Alo Pele o Iesu Keriso mo i tatou tagata agasala. ia tatou fa’afo’i le mua ma sunu’i lapalapa o malo, ona o Lana tausiga e le mavae mo i tatou.

 

Ae alo maia mo le toe fa’aauauina o la tala mo lenei aso, na muta mai la tatou tala, ina ua toe mafaufau nei le toeaina o Mose i lana mea na tau fai nei. Ae sa galue pea le Agaga o le Atua e ala i auala filemu ma le fa’ato’ato’a lelei, lea na suiga malie ai lona loto ita ma lona loto tiga, i le onosa’i ma le fa’apalepale.

 

Fai mai le tala ina ua toe fo’i ane le toeaina o Mose i lo latou fale, o le taimi lea ua usu lana fanau o Lilo ma Filipina i le a’oga, ae na o le lo’omatua o Malia o lo’o nofonofo atu i le fale. Na tilotilo ane nei i ai le lo’omatua ma fesili loa po’o fea na alu i ai, ae sau le tala a le toeaina, “Sa ou alu atu e asi Vesi ma si ana fanau, ia ae ou te alu atu o lo’o i ai le asiasiga a le Faifeau, ia o’u toe sau ai loa.”

 

E le i toe fa’atali le lo’omatua o Malia, “Oi, ia o a fo’i na ituaiga mea fa’apena, e asiasi le Faifeau na o isi aiga, ae fa’afefea le ta’ua aiga, e le o faia ni mea fa’alelotu, e le o tausi atu la’ua, o ituaiga mea a nei e vave ona liu lotu ai isi tagata, ona o faiga fa’apea e le sa’osa’o a Faifeau. O ai isi mamoe e afisi, a’o ai isi mamoe e tu’u ia fano. Ae o le Faifeau o lana galuega o le tausi, puipui ma fafaga ana mamoe uma.”

 

Ua le tautala le toeaina o Mose i lea taimi, ae ua na o le nofo ifo i lalo ma a’apa atu i lana paipa. Na toe oso a’e satani i le mafaufau o le toeaina, ina ua a’apa atu au  mai le paipa, ua leai se utufaga o totoe. Na i’u lava ina tu a’e i luga ma savali loa aga’i atu i tuafale, lea o lo’o lauusiusi ai le toga tapa’a a le toeaina ma le lo’omatua. Ua le mautonu le mafaufau o Mose i lea taimi, ae na taumafai lava le toeaina ia fa’ato’ato’a mea uma.

 

Na toe mafaufau nei Mose e fa’apea, “Ana tupu nei se fa’alavelave e pei ona ia mafaufau i ai, ona o faiga leaga a le tiapolo, se manu fa’apenei ua nofonofo i le falepuipui. Ua manatua vave e le toeaina si ana fanau, e ui lava e na o le to’alua, ae o se fanau e usita’i, e atamamai ma e leai se upu e tali.

 

Ua nofo ifo nei i lalo le toeaina i lalo tonu lava o le pupu fa’i, lea e i talane o le mea o lo’o toto ai le la toga tapa’a Samoa ma le lo’omatua. Ua mafaufau i ona uso ma ona tuafafine, lea e i ai le tina o le to’alua o Vesi, aua o le tama a lona tuafafine. O si ona tuafafine e igoa ia Si’aula, o le igoa taupou lea o le nu’u, ua maliu, e oti lona tuafafine lea, a’o la’ititi lava Luisa, ma na o la tausia mai lava ma Malia ia Luisa a’o la’ititi, ua le toe ta’u’esea, la Luisa, ua ta’u lava o le la tama, ma e ulumatua fo’i Luisa i le la fanau.

 

Fai mai, ina ua tau mafaufauga o le toeaina o Mose i si ona tuafafine lea, na i’u lava ina maligi ifo ona loimata i lea taimi, fa’atasi ai ma ona mafaufauga e fa’apea, ana o’o le tulaga lea na  mafaufau i ai, o lona uiga, ua leai se aoga o mea uma. O a fo’i tala a Vesi na lafo, atonu e ‘ese lona fa’auigaina na i lo le tala a lona atali’i o Lilo na fai ane i a te ia. Na fa’atei’a mafaufauga o le toeaina ina ua fa’alogo atu o sau le vala’au a le lo’omatua, “Mose, Mose, o fea ea oe, ia a e saga nofonofo lava i totonu o le ‘ato ‘ofe, ua fia ula a’e tagata, sau ia.”

 

E faia pea….

Comment Here