Ads by Google Ads by Google

Onosa’i I Mea Tiga

Vaega: 21

 

Tatou fa’afetaia pea le alofa ma le agalelei o lo tatou Matai oi le lagi, ona o Lana tausiga alofa ma Ana fa’amanuiaga o lo’o tatou maua pea i aso uma o lo tatou ola. E ao ai ona o tatou fa’apea ifo, “Le Ali’i Iesu Keriso, o lou maliu tiga ma Lau fa’aolataga, o lea ua o matou maua ai le filemu ma le onosa’i, fa’afetai, fa’afetai tele, Amene.”

 

Ae alo maia, o le a toe taumafai atu le vaega lona lusefulu tasi o la tatou tala fa’asolo, ae ia manuia lou alo atu i feau ma galuega o le a feagai ai i lenei aso. Na muta mai la tatou tala ina ua moe le lo’omatua o Lonisi i le fale o Malia ma Mose, a’o lea ua nofonofo ai ma le toeaina o Lefefe. Fai mai, ua aliali ai ma le misitelo lilo a le to’alua lea. Ua fai nei ma fa’afiafia loto i le lo’omatua o Malia i lea po.

 

Ua pei o le faleaitu a Petelo ma Sumeo lea ua toe ta i lea afiafi, aua ua na o le toe nei ma fa’atalitali po’o le a le i’uga o faigatala lea ua fai nei. A alu atu le tala a Lefefe, ua tali mai le lo’omatua o Lonisi, a alu atu le tala a Lonisi, ua tali mai le toeaina o Lefefe. O le tala la a le lo’omatua o Lonisi, na tau le malie ai Lefefe, o le fa’aupuga lea a le lo’omatua e fa’apea, ua le toe suasua aile a si toeaina o Lefefe. O lea la e fia malamalama Lefefe po’o a aile lea e ta’u ane e Lonisi i a te ia.

 

A’o le taimi lea, e pei o le ‘emo o le uila le mafaufau o Vesi, i le uiga o le tala a Lonisi, ma ua le mafai ai loa ona taofiofi le ‘ata a Vesi. Na fa’apea ane nei Vesi, “ E a ali’i Lonisi e sa’o lau tala, oe se ua leai la se aoga o la’u tama o Lefefe, ua uma upu, e le toe i ai lava nisi tala, o lea ua e ta’u maia, ia o le a la le isi mea o lea fai nei.” E fai ane lava tala a Vesi ma ‘ata lava. Ua oso ai le fa’ali’i o le toeaina o Lefefe, ae o le mea ua tupu, ua toe tau nei i le mafaufau o Lefefe le uiga o le tala a le lo’omatua o Lonisi, o lea na ia toe tali ane ai.

 

“Lonisi, ia fa’afofoga lelei mai lava oe le tama’ita’i faigata, na e tago i ai, aua ana fa’apea ua e tago i ai, ona e mautinoa ai lea, ae o la’u tala lea o le a fai atu i a te oe le lo’omatua, o lo’o A-Okay lava aile a le tama, e le fa’apea lava e fa’avaivai. Afai o le mea le na ua tuai mai ai sau tali i a te a’u, ia ua lelei, o le a ou alu e fa’atau i le faleoloa o Kimi se vaila’au e toe faga ai a’u aile, ia fa’asuasua.”

 

E pei e ‘ene e se tagata le lo’omatua o Malia i lea taimi, ua na o le ‘ata ma taoto ifo i lona moega. O lea ua iloa atu nei le uiga o le tala a le lo’omatua o Lonisi, ua atili ai ona ‘ata le lo’omatua. Na fa’apea ane le tala a le toeaina o Mose, “Se Lefefe, ua e va’ai la i ai o lea ua tele mai tala, talu talu oe, ia o aile na lelei, a’o lea ua pagatia, talutalu oe, se alu ia i le tou fale ua leva le po.”

 

Ua ‘ata le lo’omatua o Lonisi ma fa’apea ane, “Ia Lefefe, ia malie fo’i lou finagalo, se o tala lava tatou te talie ai, ae le fa’apea o ni tala e leaga ai se tagata, o suaga lava ia fa’atamali’i, a e le iloa la sua ai, o lona uiga e le o oe o se tamali’i.”

 

Ua na o le punou o le toeaina o Lefefe ua le tautala, a’o Vesi, ua le mafai ona taofiofi lana ‘ata. Na toe tali ane Lefefe, “Se ua pei lava ua oso mai se mea fo’i lea o le ma, se o ituaiga mea lava ia e le manuia ai se mea, ia tu’u ia, afai o lo’o fiafia ai le ma’i, ia o le mea lea e sili ona taua, ae ua lelei, afai lava ua le suasua aile a si toeina nei, ia ona ua pau lava, ua o’o fo’i i le vaitimi e le suasua ai aile.”

 

Na sui nei e le lo’omatua o Malia le mataupu e talanoa i ai, “Vesi na ave se suavai a le Faifeau ina ua vela lau mea’ai?” Na tali Vesi ua uma, a tonu o le mafua’aga lea na o’o ane ai le Faletua ma tina i lea afiafi. Ua toe fa’aauau le talanoaga, ma e le i toe taua lava e se isi ia aile le suasua a si toeaina o Lefefe.

 

E faia pea…