Ads by Google Ads by Google

Onosa’i I Mea Tiga

ausage@samoanews.com

Vaega: 19

 

E i ai le fa’amoemoe, o lo’o aoina le masina i le soifua manuia o le atunu’u i lenei taeao fou, e ao ai ona o tatou fa’apea ifo, “Le Ali’i e, sa e onosa’i ma e talia tiga uma i le taimi o ou puapuaga ona o Lou alofa mo i tatou le tagata agasala, ia malu lou finagalo ma fa’amagalo mai ia i matou, a’o le vi’iga ma le fa’amanu matou te fa’afo’i atu ma le agaga maualalo i Lau Afio e fa’avavau, fa’avavau lava, Amene.

 

Ia manuia le alofaiva o le atunu’u i feau ma galuega o le a feagai ai i lenei aso, ae alo maia, o le a toe fa’aauau atu la tatou tala. Na muta mai la tatou tala ina ua toe fo’i le asiasiga a le Faletua o le Fa’afeagaiga ma isi tina o le Aulotu, ae ua nofo nei le lo’omatua o Lonisi e momoe ma Malia, ia ma fai fo’i si a la fa’afaletui i lea afiafi.

 

Manatua fo’i e taunu’u ane le asiasiga a le Faletua ma tina o le aulotu, ua ma’ea le mea’ai a le lo’omatua o Malia, ae na fiu le toeaina o Mose e taofi le Faletua ma tina, se i fai se fa’amalosi tino ona tu’umuli ai lea, peita’i, e le i taliaina e le Faletua, ona o lo’o i ai fo’i tuatuagia o le afiafi. Ua fa’apea lava ona fai, fai mai, ina ua malu ifo le afiafi, ma ua tagi fo’i alisi, na fai ai loa le faigalotu a le aiga.

 

Fai mai, e le i alu fo’i Lefefe latou i lo latou aiga, ua nofonofo ai fo’i mai ia i le fale o Mose ma Malia, ia ai ua fa’atalitali si toeaina i le moaSamoa lea na tunupa’u e Vesi fa’atasi ai ma le fa’alifu talo, ia ua uma mea uma. i le taimi o le faiga lotu, fai mai, ua maualalo leo o le aiga, i le si’ufofoga o le lo’omatua o Malia. Na pesepese Mose, fa’asi’usi’u mata ane i a Malia, ae fai mai, ua le kea ane lava i ai le lo’omatua, ua fuli Malia e pese i vi’iga o le Atua i lea afiafi.

 

Ua ma’ea le faiga lotu, ona alo loa lea i le mea’ai o le afiafi, na fa’apea mafaufauga o le toeaina o Lefefe, “Semanu lava ou te misia le moa ma le fa’alifu talo a Vesi i lenei afiafi.” Ua ‘ata’ata Lefefe ma alo ane loa ua amata le taumafataga o le afiafi, fai mai, ua le iloga le tala a Lefefe ua fai nei, ona ua lagona le fiafia, ua tau tonu le vae o le moaSamoa i taenifo.

 

“Se Vesi, se o oe lava ua numera Uno, leaga lava lenei tama e fai fa’alifu lolo tele.” Ua fa’amatala nei e Lefefe le isi aiga, fai mai e to’afitu tama, a fai faiga lotu a le aiga i afiafi, e fa’apea le lauina o le litania a le toeaina, aua o igoa uma lava o lana fanau e fa’aioga i igoa o le au Sagato, ona fa’apea lea o le lauina o le litania a le toeaina, “O Paulo, e fitu niu e a’e ai e le e’eva, ia tali atu le fanau, “talosia i matou, toe sau le igoa o le isi tama, “O Timoteo, e fai fa’alifu lolo, ia alu atu le tali a le lo’omatua ma isi tama, toe sau le lauina o le litania, “O Simone, e ta to’atasia le vao e le e’eva, alu atu le tali, talosia i matou.” Ua alu le tali e a Mose ma Vesi ae fa’alogo atu ua sau ma le ‘ata a le lo’omatuao Malia.

 

Ua toe fa’aopoopo nei ma le isi pepelo le ‘ata a le toeaina o Lefefe, aua o lea ua fa’alogo atu nei, ua ‘ata mai Malia. Na fa’apea mafaufauga o Lefefe, “O le vai fofo lelei lava lenei i so’o se tagata, o le ‘ata, fiafia lona loto, ia tu’u mai la se i o’u liliu atu e polili teuteu le mea atoa.”

 

Ua tau manava i totonu Lefefe, ona toe alu atu lea ma le isi tala, “ia ua fa’aauau lava le lauina o le litainia a le toeaina, ae fa’alogo atu loa tama ua sau ma le isi vaega o le litania e fa’apea, “O Malia, o le sulufa’iga o e  ua mafatia ma e  ua puapuaga, alu atu le tali a tama, talosia i matou.”Ua ‘ata’ata le lo’omatua o Malia i lea taimi, ae e le i umi, ae fa’alogologo atu Mose ma Lefefe ma tama’iti, ua le toe ‘ata ae ua tagi.

 

Ae oso a’e loa ma le tala a Vesi, “Se Lefefe, leitioa fo’i a fa’aigoa oe i a Lefefe, a uma ona e ‘ai, ona e alu loa lea i le tou fale, ua uma le fa’alifu talo ma le moa ona e ‘aia.”

 

Ua le tautala le toeaina o Lefefe, i lea taimi, ae ua na o le ‘ata ma tilotilo ane i a Mose, ae ua pei e ‘ene e se isi Mose i lea taimi. O tua o le fale lea e tausi ai nei le ma’i o le lo’omatua o Malia, o lo’o i ai le faleo’o la’ititi, o lea o lo’o avea nei ma fale o le tama o Lilo. Fai mai, o aso uma lava e manava ane ai Lilo, e muamua lava feiloa’i i nai ona matua, ona alu ai loa lea i tua i lona fale mo sana malologa. A’o le aso lea, fai mai, ua nofonofo lava ua le tautala, ae ua na o le tilotilo toto’a nei i si ona tina ma le tulaga ua o’o nei i ai.

 

E faia pea...