Onosa’i I Mea Tiga

Vaega: 17

 

Tatou fa’afetai pea le alofa ma le agalelei o lo tatou Matai oi le lagi, ona o Lana tausiga faifai pea mo i tatou i aso uma o lo tatou ola, ae maise ai o Ana fa’amanuiaga lea o lo’o tatou ‘oa’oa ai pea i faleseu ma o tatou sa’a ai i ma’a o malie. E i ai le fa’amoemoe o lo’o fa’apena ona maua e le mamalu o le atunu’u le soifua laulelei, afai fo’i o lo’o feagai nisi ma mafatiaga ma puapuaga o le soifuaga nei, e tasi lava le tali mo i tatou, o Iesu Keriso lea, ia o tatou tumau pea i lo tatou fa’atuatua i a te Ia i mea uma lava.

 

Na muta mai la tatou tala, ina ua fai nei le mea’ai a le lo’omatua o Malia, a’o lea o lo’o nofonofo atu ai ma Luisa ma Filipina. Fai mai, so’o se tagata lava ua o’o i ai le tino ma’i, e toe mafaufau uma tagata o lona aiga i ona uiga, a’o talavou. O le itu la lea ua toe manatunatu nei i ai, Mose ma le la fanau, o uiga ia o le lo’omatua o Malia a’o talavou lona soifuaga.

 

O le tele o mafaufauga o le toeaina, o uiga fa’amaualuga o le lo’omatua i lo la va, ma e leai se tasi o ona iloaina lea tulaga, ua na o ia lava. Ua fa’asolosolo fo’i mafaufauga o tamaiti latou i uiga o lo latou tina, i lona saua ma lona le mana’o e fa’aletonu se mea e tasi o le aiga. Fai mai, o nisi o le a fa’apea o latou mafaufauga, ua mate ai ua ma’i, anusa le lo’omatua ua pei o ia e pule aoao i mea uma lava.

 

O manatu ia o se tagata e le alofa, o manatu ia o se tagata ua ola e aunoa ma le loto fa’amagalo, o manatu fo’i ia o se tagata, ua ola fa’asamasamanoa. Ae fai mai o le tagata, e nofo ma mafaufau loloto i itu lelei o le isi tagata, o le tagata lea ua na maua le loto fa’amagalo. E ‘ese le matagofie o lea upu, “loto fa’amagalo”, o a lava mea tiga e fai mai e le isi tagata, ae o lo’o mau pea le to’ovae, e ala i lona loto fa’amagalo ma lona onosa’i.

 

Ma’imau e, pe ana fa’apea uma tatou, se manu ua ave ola uma tatou i le lagi. Ia, ua na o se tu’ualalo lava ma se fautuaga, ae e le a’oaia e laupua tama faiga, e pule fo’i sitafune i le la o lona va’a, ae fai mai, e ‘ese le matagofie o ia manatu lelei ma le ta’ua, e ‘auga i ai mea uma. Fai mai, ua fai nei le talatalanoaga a Mose ma Lefefe ma Vesi, ua fa’amatala nei e Mose i a Lefefe le amataga o le ma’i o le lo’omatua o Malia. Fai mai, ina ua uma mai le fono a le aulotu i le afiafi, o lea fo’i sa fai ai finauga a Malia ma nisi o tina o le aulotu, fai mai le toeaina o Mose, ua fiu lava e fa’ato’ato’a atu le lo’omatua, ae ua leai lava.

 

Ua fiu fo’i e fa’alalolalo atu i ai, ia maua le onosa’i i a te ia, ae e sau lava i luga le lo’omatua, e le fia to’ilalo i se tagata. Atonu, o le mafua’aga lea, ua oso ai i luga le toto maualuga o le lo’omatua ma ua amata ai loa ona ma’i, ua osofia e le tiapolo le loto, ua le maua ai se filemu. Ae fai mai, o ala o le Atua, o ala o le filemu ma le onosa’i ma le fa’apalepale, o ala o le Atua, o le loto fa’amagalo ma le alofa ma le loto maualalo.

 

Ua fa’amatalatala nei la e Mose i a Lefefe ma Vesi le tulaga na o’o i ai le lo’omatua, ina ua ma’ea mai le fonotaga a le aulotu i lea afiafi. Fai mai le tala a le toeaina, na ona taunu’u ane lava i le fale, e le i toe fa’atali le lo’omatua. “E ta inoino e, po’o ai ia pua’a elo e tautala mai i a te a’u, po’o ai ia ta’ifau ua ou mai i a te a’u, ailoga latou te iloa e to fe uma o’u itu, ta inoino e, i ia maile.” Fai mai ua fiu le toeaina e tau fa’ato’ato’a le lo’omatua, ae ua leai lava, na i’u lava ina taoto ifo i lalo Mose ma ua moe, ae ua le maua se malologa a le lo’omatua o Malia.

 

Fai mai, na mafaufau le lo’omatua, a aulia le taeao, ona alu loa lea ma le sapelu i le fale o Lonisi lea na fai a la tauga upu i le fonotaga a le aulotu. Peita’i, e le i taulau lona manatu, ona ua oso ai ma lona ma’i i le po lava lea, lea la ua tigaina ai lona to’alua ma lana fanau.

 

E faia pea...

Comment Here