Ads by Google Ads by Google

Onosa’i I Mea Tiga

Vaega: 16

 

Tatou fa’afetaia pea le alofa ma le agalelei o lo tatou Tapa’au oi le Lagi, ona o Lana tausiga alofa fa’apea ma lona agalelei mo i tatou e le mavae. Tatou fa’afo’i ai le mua ma sunu’i lapalapa o malo i le Atua Soifua, ona o ia o le Mataisau o mea uma lava. Ae alo maia, mo le vaega lona sefuluono o la tatou tala fa’asolo mo lenei aso, ae ia manuia le alo atu o le atunu’u i faiva ma tiute o le a feagai ai.

 

Na muta mai la tatou tala ina ua fa’ai’uputa le si’iga ma’i a le toeaina o Mose ma lana fanau ma le matai o lo latou aiga o Lefefe ma le la fanau. Ua toe taliu ane nei i lo latou fale, ma ua taunu’u, ae ua alu ane le tamaloa tautua o Vesi, ua fafa le lo’omatua o Malia i totonu o le fale, aua ua iloa lelei e Vesi, ua leva ona alu le si’igama’i, ai loga ua faia se mea’ai.

 

O le ala fo’i lea na manatu ai e sili ona nofo ia, e fai le mea’ai e fa’atali ai le toe taliu mai o le si’igama’i, ma ua fa’apea lava ona fai. Fai mai, ina ua fafa e Vesi le lo’omatua o Malia ina ia avatu i totonu o le fale, fai mai, ua ‘ese lava fa’alogona o Vesi i lea taimi, ina ua fa’alogo i le musumusu ane a le lo’omatua o Malia i lona taliga. Ua tau le iloa e Vesi ma’ama’a ma le gaoa o le ala e alu ai i tua o lo latou fale aua ua lofia ona foliga i ona loimata.

 

Pau le mea lea ua mana’o i ai Vesi, se i tu’u ia i lalo le lo’omatua, aua ua fai lava si mamafa, ae se i va’ai pe o le a foliga o Malia ua i ai i lea taimi, ae maise fo’i pe ua i ai se suiga i le fofo na o ai nei. Na ona taunu’u lava o Vesi ma Malia i totonu o le fale, savali sa’o lava Vesi i le moega ua uma ona teu lelei e Luisa, ua uma fo’i ona tapena isi lavalava lelei o le lo’omatua, ma tu’u ifo loa i lalo.

 

“Vesi, fa’afetai lava i a te oe si a’u tama, fa’afetai i a te oulua ma Luisa i le tausiga o a’u, ae maise fo’i o si toeaina, ia o le na ua uma ona ou tautala atu Vesi, afai lava o lo’u ma’i lenei, ua ou talia lava, afai fo’i o le finagalo lava lenei o le Atua mo a’u, e leai lava so’u loto e faia, aua e pule aoao le Atua  i mea uma lava, ae ia outou loto tetele, ma ia outou va’ai alofa si o outou tama.”

 

Ua le tautala Vesi i lea taimi, ae ua na o le pupula atu nei i le lo’omatua, ua ‘ese lava foliga i lea taimi. Fai mai na ona liliu lava o Vesi, aunagi atu loa ia Luisa e tu’u mea uma ae alu ane e laulau ane le mea’ai a le lo’omatua. Ua fa’apea lava ona fai, fai mai o le taimi atoa na fafaga ai e Luisa ia Malia, ua tau le mafai e le lo’omatua ona ‘ai, i le malifi ifo o ona loimata, ua avea lea ma ala ua loto vaivai atu ai ma Luisa latou. A’o le fanau laiti a Vesi ma Luisa, o lo’o ta’aalo lava tamaiti latou te le o iloa le mea lea e tupu.

 

“Tina, se tausami, ‘aua e te loto vaivai fa’apena, e aoga fo’i le mea’ai latou e malosi ai lou tino, ‘aua e te matagitagi fa’apena, o le taimi lenei, ia ave’ese uma lava isi gaogaosa o lo’o i lou loto ma lou mafaufau, ae ia tu’u tasi atu lou loto i le Ali’i ina ia alofa ma foa’i mai Lana fa’amalologo mo oe.”

 

Ua tau manava i totonu Luisa, ona toe fa’apea ane lea i si ona tina, “Tina, ua leva ona fai le ma ‘anapogi ma Vesi, talu lava ona fa’ataotolia oe i lou ma’i, o le taimi fo’i lea na fai ai le ma ‘anapogi ma Vesi, ia talosia ia i le alofa o le Atua, ia foa’i lou malosi, ma ia e fa’atuatua i le Atua mo Lana fa’amalologa mo oe.”

 

A’o fai le mea’ai a Malia i lea taimi, ma o lo’o nofonofo ai fo’i Luisa, o le taimi lea, o lo’o fai le talatalanoaga a Mose ma Lefefe ma Vesi, i le isi itu o le fale, a’o Filipina o lea ua saofa’i ifo nei i talane o si ona tina fa’atasi ma Luisa. Na va’aia e Luisa foliga fa’anoanoa o Filipina i lea taimi, na a’apa ane nei ma u’u atu le lima o si ona uso, e ui lava ina fa’apea e le i o mai i le laualo e tasi, ae ua avea lava Mose ma Malia, ma matua moni o Luisa.

 

O le ala fo’i lea e le mafai ai ona tu’ua e Luisa ona matua. Ua ta’u matua fo’i Luisa i le fanau a Mose ma Malia, ua le toe ta’u’esea, ae fai mai, e ‘ese lava le pa’epa’e o le tino o Lusia e foliga mai o se tama’ita’i Palagi, o le ala fo’i lea na ‘ina’ina ai lava le lo’omatua o Malia, ina ua nonofo ma si tamaloa o Vesi, ona e lalau lava e Malia le mata i pua’a o Vesi. Fai mai a lalau nei e Malia ia Vesi, na ona liliu mai lava o Vesi velo mai ma le fa’aupuga, “Malia, se i e taga’i mai lava pe i ai se si’usi’u o tautau atu i o’u tua, e le o ni pua’a fo’i nei fanau.”

 

E faia pea...