Onosa’i i Mea Tiga

Vaega: 146

 

Le mamalu o le aufaitau, ae maise o i latou o lo’o lagolagoina si o’u fa’amoemoe, le pulega ma le aufaigaluega atoa a le Samoa News, fa’afetai tele mo le avanoa ua outou tu’uina mai ia te a’u, ua mafai ona ou fa’ailoa ou manatu ma mafaufauga.

 

Mo le mamalu o le atunu’u, ou te fa’amaualalo atu, afai lava sa i ai ni upu ua le tautamali’i i lau faitau ma lau fa’afofoga, ou te tatalo atu, le faiva o Fiti ia lilio, aua e poto lava le tautai ae sese lana atu, ia alofagia fa’amagalo le auauna vaivai ma le fa’atauva’a. O la’u tatalo i le Atua, ia i ai pea Ona manuia i totonu o ou pa, ia si’omia ai ou matoa ma ou laoa, ma ia fa’atutumu pea ou la’oa’i i ana fa’amanuiaga.

 

Ae alo maia, o le vaega mulimuli lenei o la tatou tala fa’asolo, “Onosa’i i Mea Tiga”, e i ai pea lo’u fa’amoemoe sa maua se a’oa’oga lelei mo i tatou uma, ia o tatou maua le onosa’i ma le fa’apalepale i mea uma. O la le Tusi, o puapuaga e tupu ai le onosa’i, o le onosa’i e tupu ai le mautinoa, o le mautinoa e tupu ai le fa’amoemoe i mea lelei. Fa’afetai tele.

 

O mea uma o lo’o feagai ma le aiga o le afioga i a Lilomaiava, o mea lelei mea uma, aua fai mai, ua tagolima ma ua lava le fa’asoasoa i so’o se itu. Ua matutua fanau, ma ua tu lelei fo’i i le tausiga o le aiga i ona itu uma. O a fo’i faigata ma mafatiaga sa feagai ma i latou, ae fai mai, ua filemu mea uma, ona o le galulue fa’atasi ma le nonofo fealofani o aiga.

 

Ua toe fo’i mai le tama o Ali’ioaiga, o le tama lea a Filipina ma Roger mai lana tautua sa fai i totonu o le Malo e ala i le Vaega’au. Ua maua le fanau a le Fa’afeagaiga o Peniamina ma le Faletua i a Onosa’iimeatiga, ma ua sologa lelei mea uma ae maise o le galuega a le Atua o lo’o galulue ai.

 

Ua maua le filemu i totonu o le aiga o le lo’omatua o Filipina ma si ona to’alua o Roger, lea na alu, ae ua toe fo’i mai lava, ona e le galo le alofa, ae sa talia ma le loto fiafia e Lilo mea uma, ona o lona manatu alofa i si ona tuafafine o Filipina, ma ua magalo mea uma i le alofa o le Atua.

 

Ua toe maua le isi tama a le tama’ita’i o Mataniufeagaimaleata ma lona to’alua Palagi, le tamaloa o William, o se fiafiaga sili lea mo i la’ua. Ua toe maua fo’i le isi tama a le tama’ita’i o Ataataota’ulelei ma lona to’alua, ma o lo’o maua pea le filemu i totonu o lo la aiga.

 

O le tama’ita’i o Samala’ulu ma Alofagiaimeauma ua fai fo’i a la ta’ito’alua, ma ua maua fo’i fanau, ua uluola ma ua manuia ai le aiga o le afioga i a Lilomaiava ma lona faletua o Loleta. Ua fai fo’i fanau a fanau a Vesi ma Luisa, ma o lo’o nonofo pea i luga o ‘ele’ele ua fa’asino i a Lilomaiava. E ui ina ua fai i lagi le folauga a Mose ma Malia, ae fai mai, e le mafai ona galo o la uiga lelei ma uiga tausa’afia e lana fanau.

 

O lea fo’i ua ola a’e fanau a fanau, o le uiga lava e tasi, aua sa lelei le amataina o le olaga o le tamaititi, sa fafaga i upu ma tala, e manuia ai o latou olaga. O se aiga ua sili ona tamaoaiga i ona itu uma, ae maise ai, o lea ua tula’i mai Lilomaiava i le tofi o le itumalo ma ua avea nei ma Faipule.

 

O se tama e fa’amuamua ia te ia, le Atua, lua, o Fa’afeagaiga, tolu o lona aiga, ma tagata e mo’omia le fesoasoani. E fa’amafola atu ona a’ao i e e fia maua se fesoasoani, e aunoa ma se manatu e toe maua mai, aua ua ta mau i le loto o Lilomaiava, e tutupu mea e avea, ma e sili fo’i le manuia o le na te foa’i, na i lo le na te talia. O a’oa’oga ia a si ona tina o Malia e fa’ata’imua ai lana galuega i totonu o lona aiga. ia tatou maua le loto onosa’i i mea tiga ma faigata e o’o mai, ae ia maualuga pea le vi’iga o le Atua.

 

Soifua

Comment Here