Onosa’i I Mea Tiga

Vaega: 145

 

Alo maia o le a toe fa’aauau le tatou tala i lenei aso. Ua ma’ea le fa’aipoipoga a le ali’i o Tiaseuoali’i ma le tama’ita’i o Penelope, le afafaine o le Faifeau ma lona Faletua, o lo’o galulue i totonu o le nu’u o lo’o tausi va’atele e le afioga i a Lilomaiava. Fai mai, o se aso fiafia lea aso, mo aiga ga lua, ua matua’i tu’u atoatoa fo’i i ai le malosi o Lilo ma Loleta, ma lo latou aiga e fa’atino le aso fiafia o si ona atali’i e to’atasi.

 

Fai mai, sa i ai fo’i se fe’ese’eseaiga, ona o le manatu o tuafafine o Tiaseu, e le tatau ona nofo le tama i le teine o lo’o galulue ona matua i totonu o le nu’u, peita’i, sa fautua pea i ai o latou matua i lea tulaga, ma na i’u ai ina malilie teine i le mea ua loto i ai lo latou tuagane.

 

Ua nonofo lelei nei Tiaseuoali’i ma lona to’alua i totonu o lau’ele’ele o le aiga o Lilomaiava, ma ua ma’ea fo’i ona fausia lo la fale, ona o le galuega ma le pisinisi o lo’o fa’atino e Tiaseu. Fai mai le tala, na fetaui lava le fa’aipoipoga a Tiaseu ma le malolo mai o Ali’ioaiga i lo latou aiga, ma o ia la sa avea ma uso sili a Tiaseu i lana fa’aipoipoga.

 

I le va’ai a Lilomaiava ma Loleta i totonu o lo latou aiga, ua matua’i lelei mea uma, ua tamaoaiga fo’i lona aiga, e ala i fa’amanuiaga mai le Atua, ua le gata i fua o le ‘ele’ele, ae ua fa’apea fo’i le sami. Ua tali mai i mana’oga o le tama o Tiaseu lea ua sagai ane nei e va’ai le aiga, aua ua pulapula lagoto le soifua o si ona tama, le afioga i a Lilomaiava.

 

O le tofi fo’i o le itumalo lea o lo’o umia pea e Lilomaiava i le taimi lea, ua fa’ateleina ona fa’amautu ai mea uma o le itumalo, ona o le finau malosi o Lilo, i mea e fai mo lona itumalo, ae maise ai o le lautele o le atunu’u.

 

O le tele o taimi e tu’ua ai e Tiaseu lo la aiga ma Penelope, ae fa’ataunu’u lona faiva, fai mai e o uma va’a e lima lea ua i ai nei, ma o se tulaga ua mataina e le nu’u ma le itumalo. E i ai le manatu o nisi, ai o tupe ia o le totogi o Lilomaiava i lana galuega fa’afaipule, ae le iloa o le afu lava o Tiaseu lea e ta’alo ai nei.

 

O se upu i le totogi o Lilomaiava i lana galuega fa’afaipule o lo’o i ai nei, e matua’i le lava ai lava se fa’asoa, i mea e fai o le aiga, peita’i, ua tua lava Lilo i mea o lo’o maua, ae maise ai o le fesoasoani malosi mai a si ana fanau, lea o lo’o tagolima ai nei.

 

Ua amata ona to’atele tagata faigaluega ua galulue nei i fa’atoaga, o tausia o lafu manu, fa’apea tina o lo’o tapenaina le vao, fai mai, e ‘ese le fiafia o tagata faigaluega o lo’o galulue i le aiga o Lilomaiava. Ona ua fai mai le tala, e totogi lelei e Lilo, e fesoasoani malosi i so’o se tasi, a tutupu fa’alavelave i ana tagata faigaluega, fai mai e alu le si’i a Lilomaiava, e le nofonofo.

 

O a’oa’oga ia a si o latou tina, le lo’omatua o Malia na fai i  a Lilo, Luisa ma Filipina, ia outou alolofa atu, ona alofagia mai ai lea o outou, aua e sili lava le manuia o le na te foa’i, na i lo le na te taliaina. O a fo’i faigata ma mafatiaga, ma tiga e fetaia’i ma outou, ia outou maua le onosa’i ma le fa’apalepale i mea uma, ona manuia lea o a outou taumafaiga uma.

 

O a’oa’oga ia o lo’o teu i le loto o le toeaina o Lilomaiava, e o’o mai i le taimi lea, ua va’ai atu ua solosolo lelei mea uma o lona aiga, ae e i ai lava tiga o lo’o tutupu mai, peita’i, e le mafai ona fa’avaivai ai Lilo i na mea. O le i oi mata o Lilomaiava, o si ona afafine o Onosa’iimeauma, lea ua avea nei ma Faletua.

 

E le mafai e le toeaina ona alu i le fale, ae e le i o’o ane e asi lona afafine o Onosa’iimeatiga ma lona to’alua, le Fa’afeagaiga o Peniamina, o se fiafiaga sili lea i a Lilomaiava, ina ua i ai se tasi o lana fanau, ua ta’ase i le galuega a le Atua.

 

E faia pea...

Comment Here