Onosa’i I Mea Tiga

Vaega: 144

 

Ia manuia lou alo atu i faiva ma tiute o le a feagai ai i lenei aso.

 

O lea ua taunu’u le ta’avale a le Faifeau ma le Faletua, o le ta’avale na togi ma’a i ai Mataniufeagaimaleata, o Ali’ioaiga mai Amerika ma le tama o Tiaseuoali’i. O se meaalofa ua o latou faia mo si o latou tei, lea ua alu nei i le galuega a le Atua. Fai mai, ua ofo le aulotu ia ua va’ai mai, ua tu le ta’avale ua sili ona matagofie i luma o le fale o le Faifeau.

 

A’o fa’afesaga’i nei le Faifeau ma le Faletua ma le aiga o le Faletua na o ane e momoli aloa’ia ane le ta’avale, fai mai, na fa’ate’ia, ina ua ulufale matai o le aulotu i totonu o le fale. Ua tilotilo ane nei Tiga i le Faifeau, ua le tautala, ona e fa’atei’a le Faletua ina ua o’o ane.

 

O lea e o ane Filipina ma lona to’alua palagi, le toeaina o Roger ma Mataniu, ae maise fo’i o Tiaseu. Fai mai, e le i tu’u mamaina e le tama o Tiaseu le taliina o matai ia ua ulufale nei i totonu o le maota o le galuega. Fai mai, fa’atoa fa’alogo lea o le lo’omatua o Filipina ma Mataniu i le lafolafo a Tiaseu i lea aso.

 

Na ona uma lava liliu ane loa le tama i lana ‘ato, ae e’ue’u ane e lona tuafafine o Mataniu, “Tia, o lea fo’i e i ai la’u seleni, ia fai lau lauga a fai ni lafo o nai toeai’ina.” Ua fa’apea lava ona fai, fai mai, na tu a’e nei i luga le Faletua o Onosa’iimeatiga ma savali i totonu o le potu. O si seleni lava na maua i le Aso Sa, o lea e teuteu lava e Tiga, aua ni mea e tutupu mai, ae o lo’o sauni i ai la’ua.

 

Na tu a’e nei i luga Mataniu ma savali mai i totonu o le potu lea ua alu i ai lona uso o Tiga. “Tiga, ‘aua e te popole, o lea e lava le seleni o lo’o i a ma’ua ma Tia, malolo oulua ma le lo’omatua, o lea e lava le seleni e fai ai lafo o nai toeai’ina, ‘aua e te popole.”

 

Ua toe savavali mai nei i fafo ma saofa’i ifo loa Mataniu i talane o le la tuagane ma Tiga, le tama o Tiaseu. Fai mai, e to’afa matai o le aulotu na o ane, ae va’ai atu, ua saofafa’i mai i tua lo’omatutua e to’atolu. E le i fa’avaivai ai le ‘ato a le lo’omatua o Mataniu, na fai nei lafo ma ua tu’umuli loa matai ma tina nei.

 

Na liliu ane nei le lo’omatua o Filipina ma fa’ape ane lana tala i le Faifeau, “Peni, o le faiga lava lea o lau aulotu, oka, oka e, o lea lava na matou o mai e momoli mai le lua ta’avale, a’o lea ua o mai ai lava, ia soia ia, o faiga lava ia o se mea,

 

“Ae o le lua ta’avale lea ua tu mai luma, e tasi lava la’u tala e fia fai atu i lau susuga a le Fa’afeagaiga, a ou va’ai o ti’eti’e se small girl i ou talane i totonu o le ta’avale lea, ia e te ‘afu ia te a’u i le to’oto’o.”

 

Ua alu nei le talie e, ae ua tu mai i luga le Fa’afeagaiga ma ona loimata, ua fa’afeiloa’i i a Filipina, o Tiaseu, Roger ma Mataniu. Ua le mafai e Onosa’iimeatiga ona fai ane se tala, ua tagi aue, aue nei, ona sa mamao lava ma lona mafaufau lenei mea ua fai e si ona aiga mo la’ua.

 

Na tu a’e nei i luga lona tuagane o Tiaseuoali’i, ua savali atu ma fusi si ona tuafafine i lea taimi, ua atili ai ona tagi le Faletua. Ua o’o ane fo’i i ai si ona uso matua o Mataniu ma o la feiloa’i. “Tiga, ‘aua e te tagi, ae tatalo mai mo matou, ia lelei pisinisi o lo’o taumafai i ai, aua le manuia o si o tatou aiga, ma alolofa mai ai fo’i ia te oulua, aua o lea ua matou va’ai atu nei, e tu fa’aletonu lava le lua aulotu, a i ai se mea e te lua mo’omia ona tuli atu lea o se isi ia te a’u.”

 

Ua fa’amavae nei ma ua toe fo’i le aiga o le Faletua, ae ua tu’u le ta’avale fou a le Faifeau ma lona Faletua, fai mai na toe fa’amanatu ane i ai e Tiga i lona to’alua, “A ou va’ai o ti’eti’e se small girl i ou talane i totonu o le ta’avale lea, e uma ona ou nunumia, ou liliu atu ia te oe, ua e fa’alogo mai.”

 

E faia pea...

Comment Here