Onosa’i I Mea Tiga

Vaega: 143

 

Alo maia, o le a toe fa’aauau atu la tatou tala mo lenei aso. Na muta mai la tatou tala, ina ua fai nei le  pisinisi a le tama o Tiaseuoali’i, ma o le atili lea o le toeaina o Lilomaiava, e to’asi lava ia, aua e to’afa le fanau teine a Lilo ma Loleta, ae to’atasi le tama.

 

O lea la ua o tatou iloa nei, ua i ai le tama’ita’i ua fa’ananau i ai le loto o Tia, o le afafine lea o le Faifeau o lo’o tausia lo latou nu’u. O le mea e sili ona ta’ua i a Tiaseu, ona o le tama’ita’i lenei, e le o se teine na fanau i totonu o lona nu’u, o le afafine o le Faifeau, lea fa’atoa si’itia ane e tausia le aulotu i totonu o lona nu’u.

 

Fai mai le tala, ua iloa e Tiaseu ma ua mautinoa fo’i i lona loto, o le a lava lona le mana’o e fai sona to’alua, ae sau aso o le olaga, a o’o loa ina matua, ua leai se tasi e tausia ia. O fautuaga fo’i ia a si ona tuafafine o Onosa’iimeatiga, ua tatau ona fai sona to’alua, e tausia ia, ma e fia va’ai fo’i nai o latou matua i sana fanau.

 

Manatua fo’i, o le ulumatua a Lilomaiava ma Loleta o le teine o Mataniufeagaimaleata e le o se afafine moni o Lilo, ae e le o iloa e le teine e o’o mai i le taimi lea. Pau le mea o lo’o iloa e Mataniu, o ona matua o Lilomaiava ma Loleta pau lea. E leai fo’i se leo o lo’omatutua o Filipina ma Luisa, e tau matemate ai e Mataniu e i ai se mea o lo’o tupu.

 

E o’o fo’i la i fanau teine e to’atolu a Lilomaiava ma Loleta fa’apea ma le tama o Tiaseuoali’i, fai mai, ua tanumia lava i le palapala nei mea uma, ona o le alolofa i a Mataniu, ae maise fo’i o Loleta. Pau tagata o lo’o iloaina lenei mea, ua na o Lilo, Loleta, Filipina, Luisa, Vesi ma matua o Lilo, pau lea, a’o a latou fanau, e leai se tasi o iloaina lea tulaga. Ua le toe mana’o lava Lilomaiava, e toe talanoaina lea mataupu, ua uma le taimi, ma ua manuia le olaga o Mataniufeagaimaleata, e ala i si ona to’alua, le ali’i papalagi o William.

 

Ae fai mai, e le mafai ona galo i le teine ona matua, o a mea uma e iloa e Mataniu e tatau ona fai, e alu ane lava e asi ona matua ma o latou talatalanoa ai. E le gata i lea, ae ua fa’apea fo’i lona alofa i si ona uso la’ititi o Tiga. E le mafai ona tu’u ‘ese e Mataniu si ona uso lea, ona ua iloa e le teine, e mativa ma le tagolima si ona uso, i luga o le galuega.

 

O lea e le misi ai atigipusa ma mea uma e fa’amautu ai le galuega a Onosa’iimeatiga ma lona to’alua, le Fa’afeagaiga o Peniamina. E leai se isi o le aulotu e le o iloa lea tulaga, aua ua o latou mautinoa fo’i, e tu lelei le aiga o le Faletua, e ala i pisinisi ma fa’atoaga, ae maise fo’i o le tula’i mai o le tama o le Faletua i le tofi Faipule o le itumalo.

 

Fai mai, o a mea e maua atu e Onosa’iimeatiga mai lona aiga, e tufa uma e le Faletua, se i vagana ai o ni seti nofoa ma le TV po’o nisi mea fa’apena, ona tu’u lea e le Faletua, ae afai o ni mea tausami e le mafai ona taumamafa le Faifeau ma lona Faletua, ae le i tufaina i si a la aulotu, ae maise fo’i o nai tuaoi.

 

Fai mai le tala, na fa’ate’ia le Faifeau ma lona Faletua ina ua sosolo atu se ta’avale fou lava ma le matagofie i luma o le la fale, ae toe va’ai mai i tua, o alu atu ai le ta’avale a le tuafafine o le tama o le Faletua, le lo’omatua o Filipina. Fai mai, na ona tu lava o ta’avale nei e lua i luma o le fale o le Faifeau, tilotilo ane uma i ai tagata.

 

Ua oso mai i fafo le tama o Tiaseuoali’i lea na uliina le ta’avale fou, ma o lo’o ti’eti’e atu ai ma le to’alua o Filipina, le toeaina o Roger, ua tu nei ma le ta’avale a le lo’omatua o Filipina i tua, lea e o atu ai ma Mataniufeagaimaleata. Na ona tu lava o le ta’avale fai mai ua tamo’e mai nei i fafo Onosa’iimeatiga ma tilotilo mai i le solo lea ua alu atu nei.“Oka, ta’i manaia lau ta’avale fou a Tia, ia toaga e faigaluega, e maua ai mea lelei.” Fai mai, ua ‘ata Tiaseuoali’i ma tilotilo ane i si ona tuafafine, e pele i lona loto.

 

E faia pea...

Comment Here