Onosa’i I Mea Tiga

Vaega: 142

 

Alo maia, o le a toe fa’aauau atu la tatou tala. O lea ua feiloa’i nei Tiaseuoali’i ma lona tuafafine o Onosa’iimeatiga lea o lo’o galulue i le galuega a le Atua ma lona to’alua, le Fa’afeagaiga o Peniamina. Fai mai, o le tele o aso, a a’e ane le faiva o le tama, o se fiafiaga sili lea i a Lilo ma Loleta, aua o lea ua toe feiloa’i ma si a la tama.

 

O le va’a fagota na fa’atau e le tuafafine o lona tama mo ia, o lea ua fa’aaoga e le tama mo ona faiva, e to’alima taulele’a o le nu’u ua tofia e Tiaseu latou te fagogota i luga o lona va’a. O aso uma e alu ai le va’a fagota a Tiaseu, fai mai e lagona lava e Lilo le popole o lona loto ma e fai lava i lona atali’i, ae tasi lava le tala a Tiaseu, “Tama, ‘aua e te popole o se mea ou te fiafia e fai, fa’afetai atu i a te oe, i lou onosa’i ae ‘aua e te popole, o lo’o sologa lelei lava mea uma.”

 

Fai mai, o aso uma lava e alu ai le faiva, pei e tau pe le fatu o le toeaina o Lilo, aua e auau lava i lona atali’i lea, aua e to’atasi ia, ae to’afa teine. E le o iloa ane lava e se tasi fa’alogona mafatia o Lilo pe a alu le faiva o si ona atali’i, ona o le popole o lona loto, ne i tupu mai ai se fa’alavelave.

 

Fai mai, e o’o fo’i i a Filipina ma Luisa, e alu le solo a lo’omatutua e fa’ae’e le faiva o Tiaseu i aso uma e alu ai. A uma, ona o mai lea o lo’omatutua ua nofonofo i luga o le taligalu ua ma’ea ona fai, e ala i le finau malosi a si o la tuagane o Lilomaiava i le Malo, o lea ua mafai ai ona maua le taligalu mo si o latou nu’u.

 

Fai mai, e saofafa’i ifo lava le tagata ia ma soloi ona mata, ma tilotilo atu i le alu o le va’a a si o la tei. Fai mai le tala, o isi aso, e ta’i tolu aso o alu le va’a a Tiaseu ma ana tama e to’afa, a a’e mai loa lava, fai mai, e a’ai uma ai le nu’u atoa, e tufa e le tama i nai tama ma tina matutua, ae maise o Fa’afeagaiga o le nu’u. Ae e le misi le ‘ia taumafa a le Fa’afeagaiga o Peniamina ma lona Faletua o Onosa’iimeatiga, i so’o se aso e a’e mai ai le faiva o le tama o Tiaseuoali’i.

 

Fai mai, a a’e mai nei le faiva, e fa’atali uma e tagata o le nu’u, aua, e ‘ese le mau o faiva a le tama o Tiaseuoali’i ma lana au faigaluega. O manuia ia ua uma ona fa’amanuia ai Fa’afeagaiga uma o le nu’u, ae maise o si ona tuafafine o Onosa’iimeatiga lea o lo’o galulue i le galuega a le Atua ma le Fa’afeagaiga o Peniamina.

 

O le faiga a Tiaseu, se i iloga lava ua tofutofusia uma tagata, ona fa’atoa ave lea o ‘ia e fa’atau aua le totogi o ana tama faigaluega lea o lo’o latou galulue fa’atasi. Fai mai, ua aga’i i luma le pisinisi a Tiaseuoali’i, ma ua iloa fo’i e ona matua ae maise o tuafafine ua aoga Tiaseau i le tele o mea e fai o le aiga.

 

Fai mai, na tau ta ai e le lo’omatua o Filipina le ulu o si tama i le isi aso, ina ua tete’i ma lona to’alua o Roger, ua tu ane Tiase ma le teutusi, o le siea lea a Filipina ma Roger ona o le va’a o lo’o ia fa’aaogaina. Fai mai, na tu a’e i luga le lo’omatua ma lona ita tele, “Tia, o le a le mea lea ua e faia, a, oi se ta fe fe se, o lona uiga ua leai se aoga o le ma meaalofa ma Roger ia te oe, o ni mea a ni tagata ‘ese mea nei, fa’aaoga lou mafaufau, ua e fa’alogo mai, o lau tautua i totonu o le aiga, pau lea o le mea ou te mana’o i ai, ma ia e usita’i i ou matua, o le mea lea e sili ona taua i a ma’ua ma Roger, ua e fa’alogo mai.”

 

Fai mai, na fautua ane nei i ai le toeaina Palagi o Roger, e alu e ave le tupe, afai o le a sona manatu, e toe fa’atau se isi ona va’a, e fa’aauau ai lana pisinisi. Ua malilie nei i ai, ma ua fa’ataunu’u fo’i, ua le lua la va’a a Tiaseu, ae ua tolu nei ana va’a fagota.

 

Ua nofonofo nei Tiaseuoali’i ma fa’asolosolo ona mafaufauga, te’i lava ua o’o ona mafaufauga i le afafine o le Faifeau lea ua amata ona fa’ananau i ai lona loto. Fai mai, o Tiaseu lava e alu e momoli ‘ia a le Faifeau lea, ona o lona fia va’ai i le tama’ita’i o Penelope.

 

E faia pea...

Comment Here