Vaega: 141

Aalo maia, o le a toe fa’aauau atu la tatou tala. Se i o tatou asia le atali’i o Lilomaiava ma Loleta, le tama ua fa’aigoa i a Tiaseuoali’i, ma o ia fo’i o le ui’i i le fanau. Ua matua Tia, ae e le i faia lava sona aiga. O le tele o taimi fai mai, e fai a i ai tala a lona tina, le lo’omatua o Loleta, “Tia, agusa, na o lou alu alu, ua ta fa’apea o le a taumulimuli mai se taupou i ou tua, a’o lea e te sau lava na o oe.”

A fai tala ia a lona tina, fai mai, na o le punou o le tama ma ‘ata. E ‘ese fo’i le lalelei o lenei ali’i, fai mai, e fa’amatapusi uma i ai tama’ita’i o le nu’u i a Tiaseuoali’i, ae e le o ano ane lava i ai le ali’i. O le tele fo’i o taimi, e ula lava i ai ona tuafafine ma nai ona tei, i le leai o se teine a Tia, ae tasi lava le tala a Tiaseu,  “E fai e a na mea ma le fa’alavelave i lo’u olaga taumafai.”

Fai mai le tala, e le misi le atigipufa a Tiaseuoali’i e au mai i a Ali’ioaiga lea o lo’o galuega nei i totonu o Vaega ‘Au a le Malo Tele. O se fiafia tele lea i a Tia, ona o lea o lo’o manatua mai lava ia e si ona uso. Manatua, o Ali’ioaiga o le tama a le tuafafine o Lilomaiava, le lo’omatua o Filipina, ma na o le to’alua lava tama, ae e to’atele i teine.

E moni lava le tala e tu tu aiga o tama’ita’i, o lea la ua mafua ai ona lelei le aiga o Lilomaiava, ona ua tu lelei uma tama’ita’I, o ana fanau teine e toafa. O lea foi ua i ai si ona afafine ua avea nei ma Faletua, o Onosa’iimeatiga. O Tiaseuoali’i, fai mai le tala, e ‘ese lava le mea e fiafia i ai, e fiu lona tama e tata’i i le maumaga ma fa’asinosino i ai le faiga o mea, ae e ‘ese lava le mea e alu i ai le mafaufau o Tia. O le tama lenei, e fiafia tele i le fai faiva, po’o le fagota. Ua a’ai fo’i ma taumamafa ona matua, o lona aiga, fa’apea ma ona tuafafine i faiva a le tama e alu, ma e o fa’atasi ma isi taulele’a o le nu’u, ma o lo’o galulue fo’I I lalo o le va’ava’aiga a Tia.

O le mea ua tupu, fai mai, ua iloa nei e le to’alua o Filipina le toeaina o Roger le loto o Tiaseuoali’i, e fiafia tele e fagota. Na fai ai loa ma le la tonu ma Filipina i le isi aso, e sili pe a o la’ua fa’atauina se va’a fagota mo Tiaseuoali’i, ma o le la meaalofa fo’i lea mo si o la tei, aua ua a’ai ma mao’ona i ‘ia o le faiva a Tiaseu.

Ua fa’apea lava ona fai, ua fa’atau nei e Filipina ma Roger le va’a fagota mo Tiaseu, ma sa lagona le fiafia o le loto o le tama. Na fa’ate’ia fo’i ona matua, aua sa mamao lava i o la loto se tulaga fa’apea, o le a faia e Filipina ma lona to’alua mo le la tama.

Fai mai, o le tele o taimi, a mau le faiva o Tiaseu, e muamua lava ave ‘ia ma Fa’afeagaiga, ona tufa loa lea i nai tagata matutua o lo’o i totonu o le nu’u. E l e gata i lea, ae o ‘ia fo’i e ave ma si ona tuafafine lea o lo’o galue nei i le galuega a le Atua, e le mafai ona misi Onosa’iimeatiga ma le Fa’afeagaiga i le tufa a Tiaseu i so’o se faiva.

Fai mai le tala, e va’ai mai loa Onosa’iimeatiga ua tu atu le ta’avale a lona tama, ona iloa fo’i, ua alu atu si ona tuagane ma ni ‘ia mo la’ua, e sa’o lava, e le mafai ona misi i a Tiaseu le tausiga o si ona tuafafine lea. Fai mai, e taunu’u loa Tiaseu ma se ato ‘ia, liliu ane loa Tiga, ua fai le fa’asoa, e tofu uma lava le la aulotu ma tuaoi ma ‘ia. O se va’aiga fiafia lea i le tama o Tiaseu, ona o le faiga e lona tuafafine o le aulotu ma tagata o le nu’u. So’o se taimi e alu ane ai, e talatalanoa fiafia ma lona tuafafine ma le Faifeau, “Tia, fa’afetai lava i lou alofa mai i a ma’ua, fa’afetai tele, ia fa’amanuia le Atua i ou faiva uma lava, ma ia e onosa’i, Tia, o a fo’i tala a le ta tina e fai atu i a te oe, ia e onosa’i ma ia maua le fa’apalepale, ma va’ai se tama’ita’i lelei e te lua nonofo, ua e matua fo’i, ua mo’omia fo’i sou fesoasoani.” Fai mai, a fai ane nei tala ia a lona tuafafine, na o le ‘ata o le tama ma punou.

E faia pea...