Onosa’i I Mea Tiga

Tusia: Akenese Ilalio Zec

Vaega: 139

Alo maia, o le a toe fa’auau atu la tatou tala. Na muta mai la tatou tala, ina ua va’ai mai nei le afioga i a Lilomaiava, o alu atu le solo fa’aniu tu a ona tuafafine, le lo’omatua o Luisa ma le lo’omatua o Filipina e agai atu i lo la fale.

Ua mata’i mai nei e Lilo le solo lea, fai mai, a savavali savavali atu, ua tu tu, ua fa’asinosino le lima o Filipina aga’i i le sami, ae o lo’u lu lu ane i ai le ulu o lona uso. Ua tau mafaufau nei Lilo, po’o le a fo’i se mataupu faigata ua o’o ane ai i lo la fale i lea afiafi, aua fai mai ua tolu aso ua tuana’i, o lea fa’atoa toe o’o ane lo’omatutua e asi ane la’ua.

Na ona tu tu lava i luma o le fale, ae matala loa ma le faitoto’a, “Afifio maia oulua tina faigata, pe i ai se mea ua sasi a lenei aiga ua si’i mai ai le fala si’igata o a oulua afioga.” Ua to e, lo’omatutua ma savavali mai ua feiloa’i i lo la tuagane, a’o le taimi lea, ua fa’agasolo nei e Loleta le faiga o le ti e inu ai sa latou iputi i lea afiafi.

“Malo le soifua i lau afioga Lilomaiava, afio ia lau afioga i le Sa’o, ia fa’apea fo’i lou faletua faigata.” Na fa’alologo atu nei lo’omatutua, o sau le ‘ata a Loleta mai tua o le umukuka i lea taimi. Na toe fa’apea ane le lo’omatua o Filipina, “Se Loleta, ‘aua le faia na mea ‘ai, o le a e tigaina, ne i ma o fo’i, ae toe tomumu atu lou to’alua i a te oe, ua uma mea’ai ona ma a’ia.”

Ua ‘ata Lilo ma tilotilo ane i lona tuafafine lea, fai mai, a ta nei le faleaitu a Filipina, na o le ‘ata o Luisa ma fa’apea ona mafaufauga, “E leai se mea o l o matou tina e aveesea i lenei tagata, e alu alu fo’i, o ta tau maasiasi i ana mea e fai.”

Ua saofafa’i ifo nei, ae fa’alogo atu lava o ‘ata mai Loleta i tua. Ua lagona le fiafia o le lo’omatua, ina ua asiasi ane tuafafine o Lilo i lo la fale, o lona uiga, e alu le po atoa o fai talatalanoaga, na muamua talanoa i mea o le aiga, ae mulimuli ane, ua tami ane i Aikupito, oso ane i Ierusalema, ta’amilo ane i Aleipata, ae fa’ai’u i Manono Tai.

Fai mai, na tu a’e nei i luga Luisa ua savali mai i tua i le umukuka lea e tapena atu ai e Loleta le latou ti o le afiafi. Ae fa’alogo mai, o alu atu le tali e, a Lilo ma Filipina, “Lilo, e ‘ese le manaia o lau sau lea na e sau nei, na ou fa’alogologo atu lava, ia o lea fo’i na fa’alogologo i ai Luisa, malo lava le taumafai i lau afioga, se o mea lelei lava na mea uma.”

“Ia fa’afetai atu fo’i ia te oulua tuafafine, fa’afetai i le lua tapua’iga, ia fa’apea fo’i si o’u to’alua o Loleta, fa’afetai atu i a te outou, o upu lava a le atunu’u, e le sili le ta’i, na i lo le tapua’i, ia o lea fo’i ua fai le malologa a le Fono mo le masina atoa, ia ua ta fiafia fo’i, o le a maua ai le taimi e fai ai mea o le aiga.”

Na fesili nei Filipina i lona tuagane, pe na afe ane e asi le Fa’afeagaiga ma lona Faletua, na tali i ai Lilo, ioe, ae o  lo’o i ai lava mea fa’aletonu o lo’o tutupu i totonu o le aulotu, ua uma fo’i ona talatalanoa ane ai si ona afafine ia te ia.

Fai mai, e le i uma ane tala a Lilo ae oso a’e Filipina “Oi se ta fe fe ali’i, o se aulotu ina a mata’utia tele, ailoga ua o’o i  ai le malamalama i na tagata, fa’atoa uma atu fo’i le isi mea na tupu mai ai, a’o le na fo’i ua toe fai, se na o lo’u fia tagolima lava i se tagata, ai fo’i o fafine, o fafine lava e ‘ese le faitatala, e le o e fai ni mea aoga mo aiga, ae o’o ane fai tala o lea, fai tala o lea, e leai lava se mea lelei e maua ai.”

Fai mai, ua musumusu ane nei Luisa i a Loleta, “Loleta, o ai fo’i na kiina le leo o le la’au, ua malomalo ai fa’apela.?” Ua tali e nei Luisa ma Loleta, ae na lagona ane e le lo’omatua o Filipina, “La lea, la lea, e te lu fiu lava e fai o’u tala, ou te le mafo’e ai lava, e lo ta fatu e, o le a malepe.”

E faia pea...