Ads by Google Ads by Google

Onosa’i I Mea Tiga

Vaega: 138

 

Alo maia, o le a toe fa’aauau atu la tatou tala. Ua feagai nei Lilomaiava ma ona tiute fa’aFaipule e tautua ai i lona itumalo, fai mai, e alu alu lava tala a le toeaina i totonu o le Maota Fono fa’alogo atu isi Faipule ua alu ai ma tala malie a le toeaina. “Ia e fa’apenei, afai e fiafia isi itumalo e ‘ai le steak, ia e fa’apena foi ona fiafia si o’u itumalo e ‘ai le steak, tatou galulue fa’atasi, ma ia tutusa le faiga o mea uma, ona malilie lava lea o le atunu’u ma toa’aga e susu’e le vao, ma fagota le sami mo le fofoga taumafa,

 

“Ae a fai o lo’o manuia na o nisi itumalo, ae valiano uma le to’atele, o le a le nonofo lelei fo’i tagata nu’u o le na itumalo, aua e fia a’ai steak fo’i nai na tagata, o si o’u itumalo, e ‘ese le fiafia o tagata e tausasami i le fuamoa ma le egg, ia o fua ia o galuega o lo’o galulue ai si o’u itumalo,

 

“A fiafia e tausasami i le fuamoa and egg, ia toa’aga fo’i e fai lafu manu e ola ai le aiga ma fai ai mea fa’alelotu fa’apea ma fa’alavelave.” Fai mai, ua alu le talie a isi Faipule i tala a Lilomaiava,

 

“Lau afioga i le Fofoga Featalai, o la’u folasaga le na ua taoto atu i lumamea, o le agaga lava, ia mautu ma ia lelei le fa’asoasoaina o tupe, ia laugatasia ai tagata uma, ae le na o se itumalo e tasi pe lua, ia fa’asalafa le alofa, ma tu’u atu le fesoasoani i nai o tatou tagata, aua le lumana’i manuia, o aiga, nu’u ma Ekalesia.”

 

O fonotaga uma nei ua alo i ai le Maota Fono, o lo’o fa’asalalau i luga o leitio, ae a ma’ea ona tusitusia fo’i lea i luga o nusipepa, aua le silafia e le atunu’u, o taualumaga a le Fono. Fai mai, e le mafai ona tapeina la’au fa’alogologo a le itumalo o lo’o galue malosi ai le afioga i a Lilomaiava, ina ia fa’amautu mea uma. Fai mai, o se fiafiaga tele i le faletua i a Loleta, ae maise o tuafafine o Lilo, le fa’alogologo i taualumaga a le Fono, ae maise ai, o se manatu e folasia e si o la tuagane mo le lelei o le itumalo.

 

A manava ane la galuega a Lilo, fai mai, e lolofi ane i ai ona tuafafine o Luisa ma Filipina i lo la fia iloa ma talatalanoa i nisi mataupu e ao ona folasia e Lilo i luma o le Fono Faitulafono. Fai mai le tala, e va’ai atu loa Loleta ua alu atu le solo fa’aniutu a lo’omatutua, musumusu ane loa i lona to’alua, “Lilo, va’ai atu fo’i oe, ai fo’i o le a o mai e momoli mai ni o la manatu, sa sili ai pe ana o e fa’aFaipule ae e malolo.”

 

Fai mai, e ‘ata Lilo ma tilotilo atu i le solo a lo’omatutua ua alu ane i lo la fale, e iloa mamao mai lava e Lilomaiava, le alu o gutu o lo’o matutua, ma le lima lava o le isi, toetiti tau i le isu o le isi. Ua iloa lelei e Lilo, ua tia’i fo’i e Filipina i si toeaina o Roger ma si teine o Samalaulu le faleoloa ae sola ane le lo’omatua i lo la fale, e faitatala ai.

 

O le taimi lea, ua amata ona pisi solo Loleta e fai le vaiinu mo le solo lea e alu ane nei, fai mai, ua masani Loleta i le teuteuina o le mea atoa, pe a malotia lo la fale. O le mea ua fiafia ai nei Loleta, i le solo lea e alu ane nei, e maua ai ma lana pauna ‘ata i le va lea, aua fai mai, a o’o nei i na ta le faleaitu a Filipina i si ona tuagane, na o le ‘ata o Lilo, ma fa’asolosolo ona mafaufauga, “E leai se ‘ese’esega o le lo’omatua lenei ma si o matou tina, ma’imau e, pe ana fa’apea o lea e soifua mai Malia, se i va’ai i nei mea ua maua, ae maise ai o lenei tofi ua ou pale ai, i le alofa o le Atua ma Ana fa’amanuiaga i totonu o si o’u aiga.”

 

O tulaga ia a tau loa i ai mafaufauga o le afioga i a Lilomaiava, ona maligi ifo lea o ona loimata. Ua susu’e le fa’amalamala ma va’ava’ai atu i si ona nu’u e pele i lona loto, fa’atasi ai ma lona loto fa’afetai, ina ua to mai le pule a lona itumalo, lea ua pale ai i le tofi Faipule.

 

E faia pea...