Ads by Google Ads by Google

Onosa’i I Mea Tiga

Vaega: 14

 

Tatou fa’afo’i pea le vi’iga ma le fa’afetai i le Atua Soifua, ona o Lana tausiga alofa ma Ana fa’amanuiaga o lo’o o tatou oaoa ai pea i Faleseu ma o tatou sa’a ai i ma’a o malie i aso uma o lo tatou ola. E i ai le fa’amoemoe o lo’o aoina pea le masina i le soifua laulelelei o le atunu’u i lenei taeao fou. Ae alo maia, o lea toe fa’aauau atu la tatou tala mo lenei aso.

 

Na muta mai la tatou tala ina ua toe tu’umuli le si’iga ma’i a le toeaina o Mose ma lana fanau, fa’apea le matai o lo latou aiga, lea na o i le lo’omatua fai vai, mo se fesoasoani i le gasegase o le lo’omatua o Malia, peita’i, ua le taulau le fa’amoemoe, ona ua ‘ese le togafiti ua o’o i ai. Ae ui i lea, se i o tatou tulituliloaina po’o fea ua fai i ai. Fai mai, e le o iloa atu lava e le toeaina o Mose ma le matai lea e i luma o le ta’avale ia le mea lea e tupu i tua.

 

Ua va’aia e Lilo ma Filipina le maligi ifo o loimata o si o la tina, ma a’apa ane ua fusi atu i la’ua. “Lilo ma Filipina, afai lava o lo’u ma’i lenei, ia oulua loto tetele, ma ia oulua alolofa i lo oulua tama, ae maise o Luisa ma Vesi ma si a la fanau. “Ia outou maua le nonofo fealofani, Lilo, ia e alofa i si ou tuafafine o Filipina, e mo’i lava o Luisa, ae ua fai lona to’alua, a’o Filipina, ia e va’ai ma puipui lelei si ou tuafafine…” E fai lava tala a le lo’omatua ma a’apa ifo ua toso a’e i luga le pito o le ie’afu lea e ufiufi ai lona tino ma soloi ai ona mata.

 

Ua le to’a le teine o Filipina i lea taimi, ona ua ‘ese lagona ua o’o i ai, sa mamao lava ma lona mafaufau se tulaga fa’apea o le a o’o i ai si ona tina, peita’i, o lea ua pei fa’atoa iloa lea e ia tulaga o mea fa’apea. Ua le mafai ona taofiofi loimata o Lesina i lea taimi, ua tagi masu su nei ma fa’apena ane i si ona tina, “Malia, ‘aua e te tautala fa’apea, e le o lou taimi lenei, ‘aua e te loto vaivai……” Ua le maua se to’a filemu o le loto ma le mafaufau i lea taimi, ae ua lagona fa’alogona tiga ma le matuitui o le alofa.

 

Ua le lagona se leo o le tama o Lilo i lea taimi, aua ua taumafai nei e nana lona loto vaivai, ia ‘aua ne i iloa ane e lona tina. Ua faliu nei ma tilotilo i le isi itu, ae o lo’o alu pea le ta’avale, ma ua toetiti taunu’u i lo latou fale, ae o le taimi lea, e le o iloa mai lava e Mose ma le toeaina o Lefefe lea e nonofo i luma, ia le tulaga lea ua o’o i ai le si’igama’i.

 

Fai mai, ua alu nei le muimuiga o si lo’omatua o Malia i lea taimi, na fa’apea ane nei le toeaina o Lefefe, “Ali’i Mose, se o le to’alua o oe se ua le iloa po’o se tagata ola po’o se tiapolo, o a’u ua lagona lo’u fefe tele, ua le maua ni manatu lelei, ona ua ou va’ai atu ua ‘ese uiga o le lo’omatua, mata ua ulufia e ni agaga leaga?” O le fesili ane lea a Lefefe. E fesili ane Lefefe, ae ua afe maila lea ua o’o i ai mafaufauga o le toeaina o Mose, e fai o le le i maua o se fofo mo Malia, ae o lo’o tau mafaufau pe o le a le mea ua tupu.

 

E le gata ina fesousoua’i le mafaufau o Mose i lea taimi, a’o lea ua toe fesili ane fa’apea Lefefe, ua atili ai ona mimini fa’asolo atoa le mafaufau o le toeaina o Mose i lea taimi. E ui lava la ia mau mafaufauga ua o’o i le toeaina, ae na tali ane lava i le fesili a Lefefe.

 

“Lefefe, o lea ua ou iloa atu nei, se o oe lava o le tagata pala’ai, e leai sou ‘ate, sa i ai lou manatu e te le fefe, e pei ona fa’aioga matai ai oe e le tatou aiga, a’o lea ua ou iloa atu nei, e leai sole, o lou matua’i pala’ai lava, ‘aua e te toe fa’alavelave mai, o lea e fa’asolosolo o’u mafaufauga.”

 

a ‘ata Lefefe ma alu pea le ta’avale, ma ua uma ai ma fesili a Lefefe, aua o lea ua lavea i a Mose ma ua iloa fo’i e Mose le pala’ai o Lefefe i lea aso. O lea lava la e fai le talatalanoaga a Mose ma Lefefe i le pito i luma o le ta’avale, a’o lea ua fai le mavaega oti a le lo’omatua o Malia i lana fanau.

 

E faia pea...