Ads by Google Ads by Google

Onosa’i I Mea Tiga

Vaega: 136

 

Alo maia, o le a toe fa’aauau atu la tatou tala e pei ona masani ai. Na muta mai la tatou tala, ina ua tula’i mai nei le afioga ia Lilomaiava mo le tofi Faipule o lona itumalo. Fai mai, o le galuega fa’aFaipule, e le o se galuega faigofie, ua lagona fo’i e Lilo lea tulaga, peita’i, sa le i fa’avaivai ai lona tu malosi ma lona finau i luma o le Fono, ina ia fa’amatu’u se vaega tupe mo auala galulue mo si ona itumalo.

 

Ua le gata i lona finau mo ia galuega lelei mo lona itumalo, ae ua fa’apea fo’i ona aofia ai ma le tele o itumalo, o lo’o mo’omia lea fesoasoani, mo le fa’alauleleina o auala galulue aua le tausiga o aiga. Oisi mataupu lelei sa folasia e Lilomaiava, o le fa’aleleia lea o le suavai taumafa i totonu o lona itumalo ma isi fo’i itumalo o lo’o mo’omia lea tautua a le Malo.

 

Fai mai, o pili ia e lua sa finau malosi ai Lilomaiava i lona fa’atoa tula’i mai i le tofi, ae le taulia ai le tele o isi fesoasoani ua ia tu’uina atu i lona itumalo ae maise o lona nu’u. E ui lava ina tele ana galuega o lo’o feagai ma ia, ae fai mai, e le mafai ona tu’ulafoaina e Lilomaiava, le taumafaiga o lona fatuaiga.

 

O le tele o mea ua ia tu’u atu i a Vesi, le to’alua o lona tuafafine o Luisa, aua ua mautinoa e Lilo, o lona fa’amoemoe lea, i mea e fai o le aiga. O le mea ua tupu, ua tu’u atoa e Lilo lona fa’atuatuaga i a Vesi, ae le iloa atu, e ta’i lua, ta’i tolu fagu a le toeaina o Vesi e inu i aso uma lava, pe a ma’ea galuega a le aufaigaluega.

 

Na i’u lava ina o’o ane Luisa i le fale o lona tuagane o Lilo ma ta’u i a Lilo le niuava a lona to’alua. Fai mai le tala, e masau ane Luisa e ta’u ia Lilo, ae liliu ane i ai le tama i lona tuafafine. “Luisa, ‘aua e te fa’apena, va’ai oe le tuafafine, o Vesi lea o lo’o feagai ma mea uma lava o le aiga,

 

“O a’u, o le na ua e iloa, e tele lava mataupu ma mea o lo’o feagai ma a’u i le taimi lenei, afai o fai se fa’amalosi tino a Vesi, ua tatau, leaga e faigata le taumafaiga o aiga Luisa, ia e malamala lelei i le itu le na,

 

“Tu’u ai pea Vesi, se’i iloga lava ou te va’ai atu ua fa’aletonu le faiga o mea o le aiga, ona ou tautala lea i a Vesi, ae tu’u ai pea ia Luisa, ia e alofa i si ou to’alua, ua afu liligi ma afu toto Vesi i mea uma o le tatou aiga, tu’u si tamaloa e fiafia, aua a fiafia le loto o le tagata, o lona malosi fo’i lea e fa’atino mea o le aiga.”

 

Fai mai le tala, o Luisa na alu ane ma lona ita ma lona popole ina ne i iloa mulimuli ane e lona tuagane amio a lona to’alua, ae o lea ua fa’alogologo atu i tala a lona tuagane e leai, e alofa lava Lilo i a Vesi.

 

“Lilo, malie lou finagalo, afai fo’i o le a so’u ma’ema’ea na ou sau ma a’u, ia fa’amalie atu ia te oe le tuagane, o lo’u va’ai mai ia te oe, ae maise o si o tatou aiga,

 

“O a’u fo’i, ua ou malie lava e tuli e alu i lo latou aiga, ae ‘aua lava ne i ona faia maia ni uiga e ta’uvalea ai lou iloga, ae maise o le aiga, o le mea lava lea Lilo, ou te nofo popole ai i uiga o Vesi, ua matua, ae e le uma le amio fa’atamaititi, ana ola mai le lo’omatua, ia ta’ilo fo’i, e asu fa’asolo atoa e Malia i fafo, velo i fafo ma le ‘ato pa’u lavalava.”

 

Ua ‘ata Lilo ma tilotilo ane i lona tuafafine matua, “Luisa, ‘aua e te fa’apena, ua matutua tamaiti, ua aoga fo’i tamaiti i so’o se mea, tu’u ai pea si toeaina, e fai lona fiafia, ‘aua e te toe fa’alavelave i ai.”

 

“Ia ua lelei Lilomaiava, ae a e va’ai atu ua ou siou mai ai ma le lua i le fa, ia e malie, a le o le na fo’i, ua savali i le auala ma ona lavalava e tu’u i le ‘ato fu’e umu.”

 

E faia pea...