Ads by Google Ads by Google

Onosa’i I Mea Tiga

Vaega: 135

 

Alo maia, o le a toe fa’aauau atu la tatou tala e pei ona masani ai. Fai mai, o le mana’oga o le afioga i a Lilomaiava, na sapaia e le itumalo atoa. O le matai fo’i sa ia tauavea le tofi, fai mai, ua malolo nei, aua ua o gata finagalo o le a tula’i mai Lilomaiava e tauavea le tofi Faipule o le itumalo.

 

Ioe, e moni lava, o le e tele lana lulu, e tele fo’i lana selesele. Ua tula’i mai nei Lilo e tauavea le tofi o le itumalo, sa i ai le manatu o nisi, o le avea o Lilomaiava ma Faipule, o le a mou malie ‘ese ai mea uma. Peita’i, e matua’i se se lava, aua sa finau malosi lana fanau, ae maise o ona tuafafine o Filipina ma Luisa, ia lelei pea le fa’afoefoeina o mea uma.

 

Ua lagona le fiafia o le loto ma le mafaufau, ina ua fa’aeaina si o la tuagane, ma o se mea fo’i e fa’aloto teleina ai i latou, ma taumafai pea mo mea lelei e fa’amausali atili ai si o latou aiga. O le mea ua tupu fai mai, e le ‘asa le o’o ane o tagata mo se fesoasoani, ma e le mafai ona talitualimaina e Lilomaiava ma lona aiga.

 

Ae fai mai, ua atili ai ona manuia mea uma i totonu o le aiga o Lilomaiava, e fai o faleoloa ua toe fa’aopoopo, ae o fa’atoaga ma mea fafaga, lea o lo’o feagai nei male toeaina o Vesi, ua matua’i selau pasene mea uma. E ui lava i le pisi o Lilomaiava, ae fai mai, e le mafai ona galo le tausiga o Fa’afeagaiga o le nu’u, fa’apea le itumalo.

 

Ua mafaufau Lilomaiava, i si ona afafine o lo’o galue i le galuega a le Atua, fai mai, e matitiva lava, ae o le loto tele o Onosa’iimeatiga, o le mafua’aga lea o lo’o sologa lelei ai mea uma o le galuega.

 

Fai mai le tala, e le misi le asiasi ane o Lilomaiava i si ona afafine lea ua avea nei ma Faletua o a mea e mo’omia e Tiga, e maua lava, ona ua atili ona mautu lona aiga. Ua toe fa’aopoopo isi faleoloa tetele i le nofoaga o lo’o i ai Mataniufeagamaleata ma lona to’alua o Viliamu, ma ua to’alua nei le la fanau, o le tama ma le teine, e le misi fo’i i le toeaina o Lilo ona asiasi atu i si ona afafine lea.

 

O le tele o taimi, e fiu Loleta e fa’atali mai Lilo, ae ua afe ane e asiasi i Fa’afeagaiga o le nu’u ma momoli i ai teutusi, o lo’o i ai i totonu seleni mo se meatausami a Fa’afeagaiga. O uiga ia o Lilomaiava, ua alofagia ai e tagata o le nu’u, e i ai fo’i nai aiga, o lo’o fia maua le fesoasoani, fai mai, e le fo’i ai le a’ao mafola ma le alofa o le afioga i a Lilomaiava ma lona aiga.

 

Ua toe tatala le isi faleoloa tele o le lo’omatua o Filipina ma lona to’alua Palagi o Roger. O a fo’i mea na tutupu i le amataga, ua le toe fia manatua, ua maua le agaga o le fefa’amagaloa’i, ma le alofa o le tasi i le isi. Fai mai, e tau agi fo’i le afa fulifao a le lo’omatua o Filipina i si ona to’alua Palagi, ma e uma ona ta’u e Roger ia Lilo.

 

Fai mai, ua tu nei le lo’omatua o Loleta i ona tiute, aua e fai o le tausiga o le aiga, a’o lea ua tula’i mai Lilo i le tofi, o le isi fo’i lea avega mamafa i a Loleta, ae o totonu o le loto, o lo’o i ai le manatu e tasi, fa’afetai fa’aeaea. Fai mai, e leai se mea e ga se i le lo’omatua o Loleta, o a fo’i ona uiga sa i ai muamua, ae ua avea pea fautuaga a Filipina ma Luisa e tua i ai i le tausiga o le aiga.

 

Fai mai, o se aiga e fealofani le aiga o le afioga i a Lilomaiava, ona o le lelei ma le to’a o le fautua ma le tu’ualalo a lona faletua, ae maise fo’i o ona tuafafine o Filipina ma Luisa, o fanau fo’i, fai mai, e ‘ese le fealofani ma loto gatasi i mea uma.

 

E faia pea...