Onosa’i I Mea Tiga

Vaega: 134

 

Alo maia, o le a toe fa’aauau atu la tatou tala mo lenei aso. Ua ma’ea le fa’aipoipoga maua uma fo’i ona momoli le Faletua ia Onosa’iimeatiga ma lona to’alua, le Fa’afeagaiga i a Peniamina i lo la nu’u e galulue ai.

 

Fai mai, o le galuega ua fai nei e matua o le Faletua, o le o lea e asi, ma e ta’i fa’alua i le vaiaso, ae e le gata i lea, ae o tuafafine o Lilomaiava, e fai mo la’ua le fale o le Fa’afeagaiga ma lona Faletua. Aua, fai mai, e lima nu’u e va ai ma le nu’u o lo’o nonofo ai nei matua o Tiga.

 

E le gaogao le pusa’aisa a le Faifeau ma lona Faletua, e o’o i mea uma e teuteu ai le maota o le galuega, fai mai, e le i tigaina le aulotu e fa’atino, sa liliu atu i ai Lilomaiava ma ona tuafafine ma a latou fanau e fa’atino. Fai mai, e le tigaina le aulotu sa galulue ai Peniaminna ma Onosa’iimeatiga, sa fa’atino uma e le aiga o le Faletua.

 

Ae fai mai, le tala, ua tau oso ai le matamuli o le Faifeau, ae sa lalago pea lona sa i le manatu e tasi, o le valevale alofa o le aiga o si ona Faletua i a la’ua, ae maise ai fo’i, o le fiafia ma le loto fa’afetai ina ua maua se tasi o le fanau e galue i le galuega a le Atua.

 

Ua fa’agasolo pea le aluga o le galuega, ma sa manuia mea uma, ona o le fautua lelei ma le tu’ualalo a Onosa’iimeatiga i lona to’alua. O lava luga, la lo, o le galuega, ae sa lalago pea o la loto i le ‘auga e tasi, ia manuia le galuega a le Atua, e ala i sa la’ua auaunaga.

 

Ua fa’asolosolo pea aso o le olaga, ua fa’atupulai’a fo’i le tamaoaiga o le aiga o Lilomaiava, ona ua manuia taumafaiga uma sa alo i ai le fanau, ae maise fo’i o ona tuafafine. Fai mai, na fa’ate’ia le aiga, ina ua ta’alo e Lilomaiava lona aiga i se tasi afiafi, ma ua fa’ailoa loa i ai lona mana’oga.

 

“Ia le paia ma le mamalu o le aiga, ae maise fo’i o tuafafine o lo’o alaala mai nei, o le mataupu na ou fia talatalanoa atu ai, o le a ou alu i le palota, ua ou mana’o e avea a’u ma faipule, o si o’u lea mana’oga,

 

“Ua ou va’ai atu i si o tatou itumalo, e tele lava ea o lo’o mo’omia ona fa’alelei, ona ou fa’apea ai lea, ua tatau ona ou alu i le tofi, se tu’u atu le fesoasoani i si o tatou itumalo, ae maise ai, o nai tagata o lo’o feagai ma le tausiga o aiga, e ala i fa’atoaga ma manu o lo’o tausi,

 

“Ua outou silafia lava le tulaga o lo’o i ai, afai e Faipule se tagata o se nu’u, e liliu lava ia e fa’aleleia na o lona nu’u, ae valiano ai le itumalo atoa, e le fa’apea e tasi se nu’u, e leai, o le na ua outou silafia, e fa nu’u e aofia fa’atasi, ma ou va’ai i le oi o tagata, i le leaga o auala galue, o nisi o aiga, e leai se suavai taumafa, o mea la ia, o le a ou finau malosi ai, aua se manuia o tagata uma, ae le mo se to’atasi.”

 

Fai mai, na fa’ate’ia le aiga i le fa’asalalauga ua folasia nei e le Sa’o o le aiga, ma fai mai, na sapaia ma le loto fiafia lea fuafuaga lelei. O lea la ua loto e Lilomaiava na o lona aiga, ae e le i logoina le nu’u atoa. Fai mai, e le i uma ane le tala a Lilo, ae oso a’e le tali a le tamaloa o Vesi.

 

“E maotua lava le nofoaga, ae o le a fai atu pea se mea o lo’o o’u manatu i ai, lau afioga i le Sa’o, ua matua’i selau pasene lou finagalo ua folasia nei, se o mea lelei lava mea uma Lilo,

 

“Ua mautu si o tatou aiga, ma o le a o matou liliu atu e sapai lou finagalo, aua matou te talitonu, ua alaga tatau lea fuafuaga, o mea lelei lava mea uma, ae ou te talitonu fo’i, o le a finagalo malilie fo’i i ai le nu’u atoa,

 

“Ae fai mai le tala a le pagota fo’i lea, “iesu e, a e o’o i lou malo, ia e manatua mai a’u.” Ua alu nei le talie a le aiga, ae liliu ane i ai lona to’alua o Luisa, “Vesi, fai fai lamu, fai fai lamu, va’ai fo’i oe i e moe i le umukuka.” E faia pea...

Comment Here