Onosa’i I Mea Tiga

Vaega: 133

 

Alo maia, o le a toe fa’aauau atu la tatou tala mo lenei aso. Ua ma’ea le fa’aipoipoga a le tama’ita’i o Onosa’iimeatiga, ma ua o’o fo’i i le taimi e momoli ai i lo la nu’u, lea ua tofia e galulue ai.

 

Fai mai, e le i fa’avaivai Lilomaiava ma lona aiga, i lea itu, aua ua maua le tamaoaiga maua tu lelei fo’i fanau. Sa toe liliu ane nei ua toe tapena le o’o o Onosa’iimeatiga ma le lona to’alua, le Faifeau o Peniamina i lo la nu’u. O ia fo’i tulaga e tutu fa’atasi ai fo’i aiga galua, ae fai mai, i le o’o ane o le aiga o le Faifeau, sa i ai lava nai mea na sasi ai.

 

E le i amanaia e Lilomaiava ma Loleta, ia tulaga, ua liliu ane nei ua toe fa’aatoatoa mea uma. O lea fo’i sa fesoasoani malosi i ai ona tuafafine o Filipina ma Luisa, fa’atasi ma tamaiti. Ua olaola le faleoloa ma ua mautu fo’i le faleoloa si’i atoatoa o lo’o fa’agaoioia e le tama’ita’i o Mataniu ma lona to’alua Palagi o William.

 

O le lima taumatau lea a nai ona matua, o le tama’ita’i o Mataniufeagaimaleata, aua e leai se mea e ga se i le tama’ita’i. O a mea uma a lona aiga e liliu ane Mataniu e fa’atino mea uma, ona o le alofa i nai ona matua, ae maise fo’i o le va’ai a le tama’ita’i i tuafafine o lona tama.

 

Fai mai, e alu alu lava tau o lima o Mataniu i gutu o si tamaloa o William i isi taimi, pe a fa’alogo atu Mataniu ua tau sau tala a lona to’alua e uiga i lona aiga. E tasi lava le tala a Mataniu ia Viliamu, “Na e fia nofo lava i a te a’u, o lou lava fai o’u fa’alavelave, ia tago la’ia i ai, tago i ai, aua a leai, o lona uiga e va’ai mai lou aiga, ua e toe ti’eti’e atu i le va’a tu’u sa’o.”

 

A fai la tala ia a Mataniu i a Viliamu, fai mai, ua na o le nofo o si tamaloa Palagi, ua le tautala ma lulu lona ulu. Ae fai mai le tomumu le leoa a Viliamu, “E ka’i kaea gei mea fa’apea, la lea, la lea, kele lave lave, Samoa.”

 

Ua alu nei le momoliga o Onosa’iimeatiga ma lona to’alua o Peniamina i le nu’u ua tofia e galulue ai. Fai mai, o se feiloa’iga fiafia na fai nei, ona o le lelei o le fa’afoefoe a Lilomaiava, ae maise ai o le matai o lona aiga, lea ua toe fa’asuafa nei i a Lefefe.

 

Ae fai mai, e tele lava le ‘ese’esega o Lefefe ua maliu ma le Lefefe lea ua tula’i mai nei, e mo’i lava e lelei i le aganu’u, ae pala’ai, e fefe e tautala. Ae ua uma ona fa’atolegi e Lilomaiava i so’o se itu o le aganu’u. O lea fo’i la ua tula’i Lefefe i le to’oto’o mo le momoliga o le Fa’afeagaiga ma lona Faletua.

 

A alu alu le lauga a Lefefe lea, fa’alogo atu ua alu ma fa’amatalaga fa’apea, “Le mamalu o le Ekalesia i ona mamalu ‘ese’ese, afai matou te fa’alogo mai ua tia’i e le Faifeau si o’u afafine, ia vave logo atu matou, ae su’e se mea e fa’alafi ai le tou Faifeau, aua a ou mauaina, ia e fetagisi uma agelu i luga.”

 

O nai pea ia e togitogi atu nei e Lefefe, se i talie ai tagata, ona ua tau sau lona afu malulu i le pala’ai. Na iloa lelei lava e Lilo le tulaga lea, ma e le i popole lava i lea itu, ae ia ma’ea lelei le aso o Onosa’iimeatiga.

 

Ua ma’ea mea uma, ma sa maua le fiafiaga sili ona o le lelei o le fa’afoefoe a Lefefe, ae fai mai ina ua tula’i mai le fofoga o le itu a le Ekalesia, na fa’apea ana fa’amatalaga, “Lefefe, ia ou te fa’amalie atu i lau tofa a le failauga, o le mea lea ua ou va’ai atu nei i ai, e i’u ina tia’i e le Faletua le Faifeau, ae sau ma te nonofo, ae sau le tina o tama’iti e nonofo ma le Faifeau…”

 

E faia pea...

Comment Here