Ads by Google Ads by Google

Onosa’i I Mea Tiga

Vaega: 131

 

Alo maia, o le a toe fa’aauau atu la tatou tala mo lenei aso. Ua tapeapena nei le aiga o Lilomaiava mo le fa’aipoipoga a lona afafine o Onosa’iimeatiga, lea ua ma’ea ona susu ane i ai le Fa’afeagaiga e avea ma ona tofi, ma o la galulue i le galuega a le Atua.

 

Fai mai le tala, ua tu’u atoa le malosi ma le tamaoaiga ua maua e Lilo ma Loleta, o Filipina ma Roger, o Vesi ma Luisa fa’apea Mataniufeagamaleata ma lona to’alua o Viliamu, mo le aso o Tiga.

 

Ua taufao nei po’o ai o le a faia le ‘ofu fa’aipoipo o Tiga, ae na malilie fa’atasi uma, o le ofu o Tiga, o le a faia e tuafafine o Lilo, le lo’omatua o Filipina ma le lo’omatua o Luisa. O le tala a Lilo i ona tuafafine, o le ‘ofu o lona afafine, o le a tu’u ane i a i la’ua e fai e la’ua le tonu.

 

Ua lagona le fiafia o lo’omatutua, ma ua fai lava e la’ua le tonu mo le ‘ofu fa’aipoipo o le afafine o si o la tuagane e to’atasi. Ua ma’ea le tonu a Filipina ma Luisa, e lua ‘ofu o le a ‘ofuina e Onosa’iimeatiga, o le ofu e fa’apaia ai, ua lafo e Filipina i si ona uso matua o Luisa ma si ana fanau latou te faia, a’o le ‘ofu e ‘ofu e Tiga i le taimi o le ‘aiga, o le ofu lea o le a fai e Filipina ma si ana tama o Ali’ioaiga, fa’apea lona to’alua o Roger.

 

Fai mai, o le teuteuina o le fale o le a fai ai le ‘aiga o le fa’aipoipoga ua lafo atu i a Mataniu ma lona to’alua. O mea tausami o le a fa’atino lava e Lilo ma Loleta, ae ua ofo mai Ataataota’ulelei ma le ulumatua a Vesi ma Luisa, le tama’ita’i o Maria Matalena, o a o la faia le vaiinu, ia po’o le pa fo’i e maua ai le uaina, ma so’o se meainu. Ua fa’apea lava ona fai, fai mai, ua o’o ane le aiga o le Faifeau. O le va’ai a Lilo i le aiga o le Faifeau, e le tu’ua fo’i lava i se pito le to’atele o le aiga. Ae va’ai mai Lilo, o lo’o filo atu ai ma Faipule e to’alua ma o la faletua, i le o’o ane o le aiga o le Faifeau o Peniamina, e momoli ane a latou tapenapenaga mo le fa’aipoipoga.

 

Fai mai, ina ua ma’ea ona logo e Peniamina lona aiga, ua maua se tama’ita’i e talafeagai tonu ma loa mana’oga, ae maise fo’i o le galuega a le Atua, sa tapena ai fo’i le aiga latou. Fai mai le tala a Vesi i a Luisa, “Luisa, e le fa’ama’ima’i lava le sau lea e sau ai le aiga o le Faifeau latou, ia la lea, la lea, amuia Onosa’iimeatiga latou, ua ia maua se to’alua lelei, ma o le taulaga fo’i lea a si o tatou aiga, a Luisa.”

 

Fai mai, ua le tautala Luisa, ae ua punou ifo ma ona loimata. Na iloa mai nei e lona to’alua o Vesi ma na toe fesili ane ai, “Luisa, e leaga la’u tala na fai atu i a te oe, ua e tagi ai, se loto tele, a lea ua tatou tagolima uma lava e fa’atino mea uma, ‘aua e te popole i se mea e tasi pe lua, ae ia e popole mai i a te a’u, ma sa’u fagu mafanafana le ituaiga fo’i lele, e tasi a ae oti, uma lava pisupo.”

 

Ua ‘ata nei Luisa ma soloi ona mata ma tilotilo ane i si ona to’alua, sa tautua malosi i totonu o lona aiga. O a lava mea e fai a lona aiga, e le mafai ona fa’atamala le aiga o Vesi i se mea e tasi, ona ua iloa e le aiga o Vesi le alofa o Luisa i a latou. O le mea fo’i la lea, e le mafai lava ona tu’ua e le aiga o Vesi se mea e tasi, pe a o’o i fa’alavelave o le aiga o Luisa.

 

“Vesi, ia fa’alogo lelei mai lava oe, o lau fagu le na e te fai mai ai, ia tu’u, e le o le taimi lenei e inu ai na mea, a e va’ai mai o lea e pisi i le faiga o le fa’aipoipoga a le teine, ae e salusalu inu mai, va’ai le fagu Clorox, po’o le fagu Soia, la e tu mai, ia o le fagu tonu lava le na e te inu ai, ‘aua ne i o’u va’ai atu lava i na mea i le taimi lenei, se i ma’ea lelei, ona e liliu ane lea e fai lou ivi.”

 

E faia pea...