Onosa’i I Mea Tiga

Vaega: 130

 

Alo maia, o le a toe fa’aauau atu la tatou tala mo lenei aso. Fai mai, ina ua maua e Filipina le tala e uiga i a Onosa’iimeatiga, ua na o le punou o le lo’omatua ma tagi, fai mai, “E ma’imau e, pe ana fa’apea o lo’o soifua mai pea si toeaina ma si lo’omatua, se o la va’ai ma molimau i nei mea lelei ua faia e le Ali’i i totonu o si o tatou aiga.”

 

Ua logo nei e Loleta nai ona tuagane, ae fai mai, o pisinisi ma mea uma sa umia e le aiga o Loleta, ua mou malie ‘ese atu, ua le toe i ai se mea, ona o le fa’atamala o tama. Ae fai mai, o Lilo ma Loleta lea o lo’o taumafai fo’i le aiga o Loleta latou, e le mafai ona fa’atamala Lilo i mea o le aiga o Loleta, aua o fautuaga ia ma tima’iga a si ona tina, le lo’omatua o Malia.

 

Ua uma ona fai le talatalanoaga a Lilo, Loleta ma le la tama o Onosa’iimeatiga e uiga i le susu ane o le Faifeau. “Tiga, ua e sauni e tali le vala’auina o oe, e te galue i le galuega a le Atua, afai ua e loto tele e fa’ataunu’u, ia o ou mama na, ia e loto tele, ma te iloa e te la’ititi, ae ua iloga fo’i au galuega i totonu o si o tatou aiga, ae maise ai o le Maota o le Fa’afeagaiga o lo’o e alu i ai i aso uma,

 

“Atonu, o le tali lea mo oe, e au mai e le Atua le tofi o le tagata, o le a ma tapua’i atu, ae alo i ou faiva, o lea fo’i e nofo atu lou tina, o le a fesoasoani malosi ia te oe, o lo’o i ai fo’i, Filipina ma Luisa, o le a le mea e te vaivai ai, o lea ma te nonofo atu ma lou tina ma lou aiga atoa,

 

“Tiga, o le galuega e le o se galuega e faigofie, ae a e va’ai i mea o lo’o tutupu i totonu o si o tatou aiga, ona avea lea ma ta’iala mo oe, ia e alofa, ia e onosa’i ma ia maua lou fa’apalepale i mea uma, ia e fautua lelei i le Faifeau i mea e atina’e ai le galuega a le Atua, ae le o le fautua i mea e le aoga, ia e loto tele ma ia e usita’i i lou to’alua i itu uma, ona manuia lea o le lua galuega, ua e fa’alogo mai,”

 

“O le uiga tonu lava lea o lou igoa, “Onosa’iimeatiga” ia e maua le loto onosa’i i mea uma lava, o a lava tiga ma faigata o le a feagai ma oulua i le galuega, o oe, e te fa’apalepale i mea uma, ona manuia lea ma maua le fealofani o tagata uma,”

 

“Tu’u le faitala, tu’u lalo o le isu, e le o se mea le na e fai e se Faletua, tu’u le afisi o le isi, ae toso le isi, Tiga, ia mamao lava ma oe na uiga e le manuia ai se galuega, ae ia fai tutusa uma tagata, ona iloa ai lea o oe o se Faletua alofa.”

 

Fai mai, ua na o le tagi lotulotu nei o le tama’ita’i o Onosa’iimeatiga, ina ua fa’alogo atu i upu ua fautua mai ai nai ona matua ia te ia, o se aupega ua sili ona taua ma aoga mo ia.

 

Ua tapena nei le aiga o Lilomaiava mo le aso fiafia o si ona afafine o Onosa’iimeatiga, ma o se aso ua tu’u atoa i ai loto ma mafaufau o le lo’omatua o Filipina ma lona uso o Luisa, aua ua tau fai tu lelei uma, ona o fanau, ae maise ai o le faleoloa o lo’o fa’agaioi pea e a latou fanau.

 

Fai mai le tala, e mo’i lava sa fai isi fa’aipoipoga i totonu o le aiga o Lilomaiava, ae o se fa’aipoipoga lenei ua sili ona tapena mae’ae’a lelei, ona o le manatu o Lilo ma Loleta, ae maise fo’i o Filipina ma Luisa, o se fa’aipoipoga ua sili ona taua. Fai mai, e fai lava tapenapenaga, ae e fa’alogo atu lava Lilo o sau le talie i le fale talimalo tele lava o le aiga o lo’o tu i le ogatotonugalemu o le fanua.

 

O le talie lea e fa’alogo nei i ai Lilo ma Loleta, o lea ua fai tala a Ataataotaulelei i si ona uso o Alofagiaimeauma, ae e tasi lava le tala a Alofa, “E a, mafaufau, o lena ua nonoa tou ua, ua se’i fo’i tou laisene, a’o Alofagiaimeauma, e sa’oloto, e leai lava se mea e tiga ai le ulu, ia o le a fo’i le mea e leaga ai, pe a outou va’ai atu, ua ma o mai ma se turisi sa amo popo i tua.”

 

E faia pea...

Comment Here