Ads by Google Ads by Google

Onosa’i I Mea Tiga

Vaega: 126

 

Aalo maia, o le a toe fa’aauau atu la tatou tala mo lenei aso. Ua fa’asolosolo pea aso o le olaga, o a fo’i tiga ma mafatiaga sa i ai Lilo ma lona aiga, ae maise ai o lona tuafafine o Filipina, ae ua suiaga malie mea uma i le onosa’i ma le fa’apalepale i mea uma.

 

Ua avea le toe fo’i mai o le tamaloa o Roger ua mafai ona maua se mafutaga mafana ma lona atali’i o Ali’ioaiga. Fai mai, o a lava mea e fai, ua le mafai e le toeaina o Roger ona toe tu’u ‘ese atu lona atali’i mai i ona tafatafa. O le tele o aso, e o fa’atasi ai e fa’atino nisi o fuafuaga lelei mo le aiga. O se fiafiaga sili lea i a Filipina, aua sa i ai lona manatu, o le a le amanaia e Ali’ioaiga lona tama, a’o lea ua va’ai atu, o se tulaga fiafia ua tula’i mai nei.

 

Ua matutua le fanau teine a Lilo ma Loleta, ae maise fo’i o le atali’i o Lilo, ae e la’ititi le atali’I o Lilo, ae matua Ali’ioaiga. O le tele fo’i o taimi, e o fa’atasi lava Ali’ioaiga ma le atali’i o le tuagane o lona tina, ma lona tama o Roger. Ua fa’amatalatala nei i ai e le toeaina lona aiga i Amerika, ae maise o nai ona uso o lo’o soifua pea.

 

Na i ai lea o le manatu, e fia o fa’atasi ma Ali’ioaiga pe o’o i le aso e toe fo’i ai e fa’aauau ana galuega i totonu o le Malo, ona o le mana’oga o Roger, ia feiloa’i lona atali’i i nai ona uso a’o soifua pea mai. O se mana’oga sa talia gata e Filipina, peita’i, sa toe manatu Filipina, o se mea e tatau ona fai, ma e sili fo’i lea, se o e va’ai le nofoaga o le a galue ai si a la tama e to’atasi o Ali’ioaiga.

 

Ua talia e Lilo le mana’oga o Roger ma Filipina, ma ua tapena nei le malaga a Ali’ioaiga ma ona matua mo Amerika. Fai mai, sa avea ma avega mamafa i le loto o Lilo, ona o lona va’ai i nisi itu, ae ua fai lava le mea ua mana’o i ai Filipina.

 

Ua tu’u nei e Filipina i a Lilo ma Loleta le faleoloa, ae o le va’aiga atoa o mea uma, o le tama’ita’i o Samalaulu, aua ua masani le teine i mea uma, ae maise ai o tulaga o lo’o i ai le faleoloa o le aiga. Ua ma’ea le fa’aipoipoga a le tama’ita’i o Ataataotaulelei, fai mai, o se aso fiafia lea mo le aiga atoa.

 

Ua tagolima Lilo ma lona aiga i so’o se mea, ae fai mai le tala, e le mafai ona fa’agaloina e Lilo ia fautuaga ma tima’iga a si ona tina o Malia, aua o fautuaga ua silisili ona lelei, e ta’ita’ina ai lona olaga, a’o alo atu i le tausiga o si ona aiga.

 

O le tulafa fo’i ua tula’i mai ai le tama’ita’i o Mataniu, ua matua’i selau pasene mea uma, e leai se mea e fa’aletonu i ona itu uma. Ua feiloa’i fo’i Roger i le to’alua o Mataniu le ali’i Palagio William, fai mai, e fiafia lava la’ua nei e talatalanoa. O le mea ua tupu, ua fia iloa e Mataniu ma Filipina, po’o a mea o lo’o talanoa ai Roger ma William. Ua matua le tama a Mataniu ma Viliamu, o se fiafiaga lea i le tamaloa o Viliamu, ae ua toe ma’itaga fo’i Mataniu.

 

Ua fa’atalitali nei Viliamu, pe o se teine po’o se tama, ae fai mai, e ‘ese le malosi o Mataniu, i le va’ai a Filipina, o se teine e ‘ese le loto tele, ae fai mai, i le va’ai a Filipina, o le afafine moni lava o si ona tuagane. E le mafai ona faia e Filipina se tala, e o’o fo’i i lona uso o Luisa, e le mafai ona o la faia se fa’amatalaga e manu’alia ai le loto o si o la tuagane, aua ua va’ai nei e i la’ua le alofa fa’amaoni o Lilo i si ona afafine o Mataniufeagaimaleata.

 

E faia pea...