Onosa’i I Mea Tiga

Vaega: 125

 

Alo maia, o le a toe fa’aauau atu la tatou tala mo lenei aso. Ua fa’asolosolo pea aso o le soifuaga, ma ua tele fo’i suiga lelei i totonu o le aiga o Lilomaiava. Fai mai, o a mea e fai, e  le mafai ona fa’avaivai ai Lilo ma Loleta.

 

Ua matutua si a la fanau, e to’afa teine ae to’atasi le tama, ae fai mai, e le mafai ona fa’aalia e Lilo lona auau i lona atali’i e to’atasi o Ti’aseu, ae ua tutusa uma le fa’atonuga e fai i lana fanau teine ma lona atali’i. Ua toe mautu le aiga o Filipina ma Roger, ma ua o’o nei i le taimi e toe fo’i mai ai Ali’ioaiga mai i ana a’oa’oga i le Malo.

 

O le toe fo’i mai lea o Ali’ioaiga, e fa’amavae atu i lona aiga, ona alu ai lea e fai ona tiute i le Setete ua tofia e galue ai. Ae fai mai le tala, e ‘ese le vave ona si’itia o le tulaga o le tama i totonu o le Malo, ona o lona atamai ma lona naunau ia lelei ana galuega uma, e pei ona fa’atonu ai e lona tina.

 

E le o iloa e Ali’ioaiga, o lea ua toe fo’i mai lona tama, aua e le i ta’uina i ai e Filipina po’o Lilo se tala e uiga i lona tama. O le mea na manatu i ai Filipina, ia ‘aua ne i fa’alavelave se mea e tasi i a Ali’ioaiga, se i toe malolo mai i le aiga. Fai mai, ua fa’atali nei e Filipina ma lona aiga le toe fo’i mai o Ali’ioaiga. Ua tapenapena mea uma, ua leai se tasi na toe fa’atamala i lea aso.

 

Ua ma’ea fo’i ona logo Fa’afeagaiga o le nu’u, ae maise fo’i o nai matai ma aiga, ina ia auai uma i le alalafaga mo Ali’ioaiga i le aso e soso’o ai. Fai mai, o se feiloa’iga ua sili ona fiafia, ua fa’ate’ia fo’i le ali’i ina ua va’ai mai, o lo’o tutu fa’atasi atu lona tina a se tamaloa Palagi.

 

Na savali atu nei ma feiloa’i atu i lona tina, ae na fa’apea ane i ai Filipina, “Ali’ioaiga, o lou tama lea, o Roger, ua toe fo’i mai i a ta’ua, feiloa’i ane i lou tama.” Fai mai, na a’apa atu nei Roger ua opo mai si ona atali’i, ua a’apa mai fo’i le tama ua fusi atu si ona tama, ua osofia lagona o le fiafia, “Dad, I love you, i miss you so much.”

 

Fai mai, ua pei o timuga e afuto ifo mai le lagi, loimata o le toeaina o Roger ma fusi mau mai si ona atali’i, “Son, please forgive me, for all i have done wrong, I love you very much too, please forgive me Son.”

 

O se feiloa’iga fiafia, ae sa va’ai ai fo’i le loimata maligi, ona o tulaga sa i ai le aiga o Filipina ma Roger i tausaga e tele. Ua saofafa’i ifo nei i lalo, ae fai mai, e mana’o lava le tamaloa, e fusi mai si ona atali’i. Ua le mafai ona tatali loimata o le fiafia i lea taimi, ma ua mata’ina fo’i e tagata uma sa i ai.

 

Fai mai, i le va’ai a le toeaina o Roger, e leai se mea o ona foliga e ave’esea mai i lona atali’i, a’o talavou, o se tama ua ‘ese le lalelei i le va’ai. O se tama fo’i e tino lelei, ma e alofagia e le aiga o lona tina. Ua fa’asolosolo ane nei tama’ita’i o le aiga e feiloa’i ma Ali’ioaiga i lea taimi, ae na fa’amulimuli lava lana feiloa’iga i le tuagane o si ona tina, le toeaina o Lilo.

 

Fai mai, ua fusi mau nei e Ali’ioaiga i a Lilo, “Uncle, fa’afetai tele mo mea uma lava, fa’afetai ua e toe talia si o’u tama i totonu o le aiga, ia e alofa fa’amagalo i si o’u tama i mea uma lava, ua lagona lava lo’u fiafia tele, ina ua ou va’ai i si o’u tama, amuia a’u, ae o lo’o i ai lava nisi fanau, e le o va’ai lava i o latou tama, fa’afetai lava Uncle, ia foa’i e le Atua lou soifua laulelei ma lou malosi i le tausiga o si o tatou aiga.”

 

E faia pea...

Comment Here