Onosa’i I Mea Tiga

Vaega: 124

 

Alo maia, o le a toe fa’aauau atu la tatou tala. Fai mai, ua te’i lava ua toe talatalanoa Lilo ma Loleta i lea aso, ai ona ua o la iloa ma ua mautinoa fo’i, o le tulaga lea o lo’o faia e Filipina ma Roger.

 

Na i’u lava ina fai le fa’atonuga a Lilo i tama o lo’o galulue i le fa’amautuina o fa’atoaga ma lafu manu, e sauni se suavai mo le alalafaga a Faifeau mo le toe fo’i mai o le to’alua o Filipina. Fai mai, e le o iloa e Filipina, ua liliu lona tuagane e fa’amautu mea ia, o lea lava e fai le talatalanoaga a Filipina ma si ona to’alua ua tele ma tele tausaga o valavala.

 

Fai mai, ua fa’apea lava ona fai, ua galulue nei tama mo le gao’oina o le suavai, ae ua alo ane nei tama’ita’i faigaluega mo le fa’atinoina o mea tausami. Fai mai, o tagata faigaluega uma nei, e leai se tasi e lagona le fa’avaivai, ona ua mautinoa lelei, e ‘ese le lelei o le faiga o i latou e Lilo ma Loleta. O ai lava le tagaga e mo’omia se fesoasoani, e le mafai ona fa’afiti Lilo ma Loleta, e tu’u atu i ai le fesoasoani i so’o se itu.

 

O le mea fo’i lea e galulue malosi ai e fa’amautu ma fa’alelei mea uma, aua e le mafai ona sasi Lilo i a latou totogi. Ua iloa lelei e Lilo ma Loleta, o lo’o fa’aauau pea le talatalanoaga a Filipina ma Roger, o le ala lea na tu’u atu i ai le avanoa mo i la’ua, ae ua liliu nei Lilo ma Loleta e fa’atino mea uma, aua le alalafaga a Faifeau i le afiafi.

 

Fai mai, e le i umi, ae taunu’u ane loa Mataniu, ua fa’ate’ia ai fo’i Lilo ma Loleta, o le isi itu, ona o lea o lo’o taofiofi e Loleta le tama a Mataniu, o lea la ua maua le avanoa e alu ane ai e asi ona matua ma va’ai si ana tama.

 

O le isi lea itu ua iloa nei e Lilo, e ‘ese le auau o Mataniu i a i la’ua, e le mafai ona ‘aso le vaiaso ma alu ane e asi i la’ua. O a fo’i mea e mo’omia e Lilo ma Loleta, fai mai e tu malosi Mataniu e fa’atino mea uma. O lea la e taunu’u ane i lea aso, ua pisi tagata faigaluega mo le alalafaga i a Roger.

 

Na fa’apea ifo mafaufauga o Lilo, “Talofa e, i si o’u afafine, e le mafai ona tu’ua e Mataniu i ma’ua, e mo’i lava o lona tina, ae o ia, e tasi lava lana upu, e le fa’atali Mataniu, e fa’atino e Mataniu mea uma.”

 

Ua toe manatua nei e Lilo si ona tina, ae maise fo’i o si ona tama, fa’atasi ai ma o na mafafauga, ma’imau e, pe ana fa’apea o lo’o soifua mai pea, se i o la va’ai i le tulaga ua i ai nei si o latou aiga, ua mautu mea uma, ua leai se mea e toe popole ai. Ae o lo’o manatua pea e Lilo ia fautuaga ma tima’iga a si ona tina, ina ia fai lelei tagata, ia alolofa ma tausi i Fa’afeagaiga o le nu’u, ‘aua ne i fuatasi i se to’atasi, ae ia alolofa ma tausi i Fa’afeagaiga o so’o se Ekalesia.

 

O mafaufauga ia o Lilo na te’i lava ua maligi ifo ona loimata, ae taunu’u ane loa ma Mataniufeagaimaleata. “Papa, e i ai se mea o e tiga ai, tautala mai ia te a’u, e i ai se mea o tupu.?” Ua punou ifo Lilo i lea taimi ma ua toe ea a’e i luga, “Mataniu, ua ou toe mafaufau i si lo’omatua ma si toeaina, ma’imau e, pe ana fa’apea o lea lava e soifua mai, ae soia ia, o lenei olaga e le tumau, e sau taimi tatou te mavae ai i le oti.”

 

Ua punou ifo nei le teine o Mataniu, ma fa’apea ane, “Papa, ua lagona lava lo’u fiafia mo Filipina, fa’afetai i le Atua, ua toe fo’i mai si tamaloa, ia fa’afetai fo’i ia te oe, i lou onosa’i, ona o lou alofa i si ou tuafafine, ae tautala mai, o a ni mea e mo’omia ae o le a fo’i le mea ua pisi solo ai tagata faigaluega.”

 

“Mataniu, o lea ua uma ona fai la’u fa’atonuga, e tapena se suavai e fai ai le alalafaga mo Roger, ma o le a auai uma Fa’afeagaiga.” Ua te’i Mataniu i lea tala, ae sa lagona lona loto fiafia, ona ua va’ai atu i si ona tama, ua ‘ese lava i lea taimi, ua ia iloa fo’i, ua maua e Lilo le fiafia mo si ona tuafafine o Filipina.

 

E faia pea...

Comment Here