Ads by Google Ads by Google

Onosa’i I Mea Tiga

Vaega: 123

 

Alo maia, o le a toe fa’aauau atu la tatou tala. Na muta mai la tatou tala, ina ua feiloa’i fiafia nei Filipina ma lona to’alua o Roger, lea sa tele tausaga o valavala. Ua logo uma fo’i e le tama’ita’i o Samala’ulu ona uso ma lona aiga e tusa ai ma le taunu’u ane o Roger.

 

Fai mai, o se aso fiafia i a Lilo ma lona au aiga, o a lava tiga ma mafatiaga sa tauave pea e Lilo ona o lona alofa i si ona tuafafine, ua mou malie ‘ese atu, ina ua va’ai atu ua fiafia le loto o Filipina.

 

“Loleta, e sa’o lava Filipina, manatua fo’i o a’u lava ou te fautua i ai e fai se isi ona to’alua, ae fa’agalogalo ia le ali’i Palagi, ona o lo ta le mautonu, pe o le a toe fo’i mai pe leai, talofa i a Filipina, “Talofa fo’i i a Roger, tatou te le iloa atu fo’i mafatiaga ma tiga na o’o i se tamaloa, ae pau le mea e sili ona taua, ua toe fo’i mai lava, o le fa’ailoga lea o le alofa moni, a Loleta.”

 

Fai mai, ua ‘ata’ata Loleta ma tilotilo ane i si ona to’alua, ua tolusefulu fa tausaga o mafuta pea, ma o la onosa’i fa’atasi i le taumafaiga o le aiga. Ua tilotilo ane le tasi i le isi, na i’u ina fa’apea ane Loleta i a Lilo, “Lilo, fa’afetai lava, i lou alofa ma lau tausiga mo a’u i tausaga e tele o le ta mafutaga, o a fo’i ni o’u sese ma ni o’u leaga ua e iloa, alofagia, fa’amagalo mai a’u Lilo, “Ou te alu ifo lava i le tu’ugamau ma o’u loimata i lou alofa ia te oe, fa’afetai fo’i mo lau tausiga i nai o’u matua a’o soifua i la’ua, fa’afetai fo’i i lau tausiga i si a ta fanau, ae maise ai o Mataniufeagaimaleata, “Lilo si o’u to’alua pele, fa’afetai lava, mai le ta’ele o lo’u fatu, i lau tusiga ma lou alofa fa’amaoni ia te a’u, ae maise o Mataniu, ia e alofa fa’amagalo mai a’u i lo ta va.”

 

E fai lava tala ia a Loleta ma maligi ifo ona loimata, ua le mafai ona ma tu. Ua fa’apea Lilo latou, ua pei ua toe fo’i o la olaga i le amataga mai o le mafutaga, i fesoua’iga ma mafatiaga sa o la asaina mai i tausaga e tele. Ua iloa lelei e Lilo, uiga o lona to’alua, fai mai, o se suiga ua matua’i sili ona lelei ia suiga ua i ai nei Loleta.

 

O a mea o le aiga, e le fa’avaivai ai le lo’omatua, o a mea e tatau ona fai, e fautua ma tu’ualalo Loleta i mea uma o le aiga. O le ta’ita’iga fo’i a Lilomaiava i totonu o lona aiga, ua matua’i selau pasene, mea uma, ona o le lelei o le fautua, fautua ma le alofa, fautua ma le lima foa’i i so’o se tasi.

 

Fai mai, o uiga uma o le tina o Lilo, o lea ua maua ai Loleta, ae manatua fo’i, e ‘ese le faigata o le olaga o Loleta sa i ai i le amataga o le mafutaga, ae fai mai, ina ua fanau mai Mataniu, o i’ina na suia ai mea uma, i se suiga lelei ma le mautu.

 

Sa va’aia lava e Loleta le alolofa o le aiga o Lilo i a Mataniu, e ui lava ina fa’apea, e le o se afafine o Lilo, ae sa le i fo’i ai le alofa ma le tausiga a le lo’omatua o Malia. E le i fa’alogo fa’atasi taliga o Loleta o fai se tala a se tagata o le aiga o Lilo e uiga i si ana tama o Mataniu. Ae ua sili ona alofa le lo’omatua o Malia i a Mataniu, na lo le la fanau moni ma Lilo.

 

O uiga ia na liua ai le loto o Loleta, ua le va’ai masae pe va’ava’ai le aiga o Lilo, pe ua ta’u’esea fo’i Mataniu i totonu o le aiga, ua tasi lava i latou uma, o lea fo’i e fanau mai le la fanau ma Lilo, e leai se tasi o iloaina lea tulaga, aua ua tanumia i le palapala, ua le toe aliali a’e i luga.

 

E faia pea...