Ads by Google Ads by Google

Onosa’i I Mea Tiga

Vaega: 122

 

Alo maia, o le a toe fa’aauau atu la tatou tala. Na muta mai la tatou tala ina ua feiloa’i fiafia nei Roger ma Filipina, mai le tele o tausaga o valavala, ua pei o ni ufi e tutupu i le loto o Filipina ina ua toe va’ai i si ona to’alua.

 

Ua lagona le loto fa’afetai i le Atua, e ui lava i tiga ma faigata sa feagai ma ia, ae sa mau pea le to’ovae ma le onosa’i, o lea ua tali mai i ana talosaga, ua toe fa’atasia i la’ua. Ae o le itu i si a la tama o Ali’ioaiga, o le itu lea ua lagona ai le fa’anoanoa o Filipina, ina ua taunu’u mai Roger, ae ua alu le la tama i le Malo.

 

Fai mai, ua fa’amatalatala nei e Filipina i lona to’alua mea uma lava na tutupu, ua tau nei le fa’amatalaga a Filipina i si ona tina, le lo’omatua o Malia, fai mai ua na o le punou o Roger ma tagi. Ua toe fa’amatala e Filipina le fanau a lona tuagane o Lilo, ae maise ai o le teine o Mataniu, lea ua nonofo nei ma le Palagi o William.

 

Na tu a’e nei i luga Filipina ma savali atu i le potu malolo, peita’i, ua toe liliu mai i tua ma u’u atu le lima o lona to’alua, se fa’amatamata i ata o si a la tama. Fai mai, na ona va’ai atu lava o le tamaloa i le ata o le fa’au’uga o si ona atali’i, ua na o le tilotilo atu i ai ma loimata. Na a’apa ane nei Roger ma fusi atu Filipina, ma momoli le isi fa’afetai i luga o le isi fa’afetai, ona o le tausiaga a Filipina i si a la tama.

 

Fai mai, ua le iloa e Filipina le mea o le a fai, se i tau fa’ato’ato’a ai le loto ma le mafaufau o Roger, ona e ui lava ina ua toe fa’atasia i la’ua, ae o lo’o i ai lava le mea o lo’o misi, o tausaga e tele sa o la valavala ai, ae ua tuputupu a’e Ali’ioaiga e aunoa ma se tama.

 

Sa lagona lava e Filipina le mafanafana o le alofa o Roger ia te ia, ona ua le matu loimata o le tamaloa. ina ua uma le fa’amatalaga a Filipina i mea uma na tutupu. Na liliu ane loa Roger, ua fa’amatala i a Filipina mea uma na tutupu i lona nofo ai i Amerika. Na alu alu lava, i’u ina to’atuli ifo i luma o Filipina, ae na taumafai lava Filipina ina ia fa’atu a’e i luga, ae ua le mafai.

 

Ua na o le tagi lotulotu nei o Roger ma fusi mai Filipina i lea taimi, ua le toe i ai lava nisi mea e faia, ua fa’aauau pea le fa’ato’esega a Roger i lona to’alua, e tusa ai ma le mea na tupu ia te ia. Ae maise ai, o lana mea na fai, ua fa’aipoipo ma Filipina, ae o lo’o i ai le isi ona to’alua fa’aipoipo i Amerika.

 

Fai mai, ‘ao fai le fa’atoesega a Roger ma talatalanoa ma Filipina, o le taimi lea ua alu le uaealesi mosoi a le tama’ita’i o Samala’ulu, ua vili nei le telefoni i a Mataniu. Fai mai e te’i mai le teine, ma ua fetagisi ai lava i luga o le telefoni, ua lagona le loto fiafia, ona o lo latou alolofa i le tuafafine o si o latou tama, a’o le uso o le tina o Samala’ulu.

 

Ua uma ona talanoa Samala’ulu ma Mataniufeagaimaleata, ae ua alu nei le isi vala’au i a Ataataotaulelei. Fai mai o le mea lava e tasi ua tupu nei, uma le na, toe vala’au Samala’ulu i le isi afafine o Lilo, le teine o Alofagiaimeauma. Fai mai, o le vala’au la lea a Samala’ulu na lavea ai loa i a Alofagiaimeauma.

 

“Samala’ulu, a e lailoa lava e tau vala’au mai, ae fai i le na tamaloa e tago i se umu, ua alu alu, ua a la, o le a le mea ua toe sau ai, e sili pe a ave e lagilagi le no’o i le ta’inafi. Na tali atu i ai Samala’ulu, “E Alofagia, tu’u au mea na e, e te le alofa i a Filipina, o lea fa’atoa toe feiloa’i, tu’u la’ia, onosa’i lou loto, a ua le maua sou to’alua Palagi ona e onosa’i la’ia pei o le onosa’i a Iopu.”

 

E faia pea…..