Onosa’i I Mea Tiga

Vaega: 121

 

Alo maia, o le a toe fa’aauau atu la tatou tala. Na muta mai la tatou tala, ina ua feiloa’i i le manuia Roger ma lona to’alua o Filipina. Fai mai, ua pei o timuga ua afu to ifo mai le lagi loimata o Filipina, ua fa’apea fo’i le tamaloa lona to’alua o Roger.

 

O se feiloa’iga ua lofia i loimata maligi o le fiafia ma le olioli. O lea lava la e fai fusifusiga a Roger ma Filipina, ae ua fetagisi atu ai lava Lilo, Vesi ma lona afafine o Samala’ulu. Fai mai, ua o’o lava i tagata faigaluega ua na o le tilotilo ane nei ma le alolofa ae o lo’o pogisa pea i o latou mafaufau le mea o lo’o tupu.

 

Ua u’ulima nei Roger ma Filipina ma savavali loa i totonu o le ofisa, fai mai, o lea lava e mulimuli atu ai Lilo ma Vesi. Ua fai nei le fa’atonuga a le tama’ita’i o Samala’ulu i tagata faigaluega i totonu o le ofisa, e o i fafo, se i ai se taimi ona toe vala’au atu lea e toe o ane e fa’auma a latou galuega. Ua fa’apea lava ona fai, fai mai, ua le mafai ona tu’u ‘ese e Roger si ona to’alua i lea taimi, ua mana’o lava ia pa’i atu ia Filipina.

 

Ua tele e suiga ua va’ai nei i ai Roger i a Filipina, ua la matutua fo’i, ua feiloa’i atu nei Roger ia Lilo ma Vesi. Fai mai, ua na o le tagi o le tamaloa ma fusi mai Lilo e o’o fo’i ia Vesi. Ua va’aia ma ua iloa e Roger ua matutua fo’i i la’ua ia, ua fa’apea fo’i ma ia.

 

Na o le fusi mau nei e Roger i a Lilo, ua toe mafaufau le tamaloa i uiga lelei ma le tausa’afia o Lilo, o lea lava e tumau pea e o’o mai i lea taimi. Na fai nei le tonu a Lilo ma Vesi, e sili pe a tu’umuli la’ua, ae se i fai se talatalanoaga a Roger ma Filipina, ua fa’apea lava ona fai. Ua tu’umuli uma i latou sa i totonu ma ua tu’u nei le avanoa e talatalanoa ai Roger ma Filipina. O le fesili muamua lava a le tamaloa, o lona fia iloa po’o le a le la tama. Ua ‘ata Filipina ma fusi mai si ona to’alua, ua fia tausaga o mavae, “Roger, your son Ali’ioaiga Alfred, is in the Military now, he left about three months ago, he is doing well, he keep asking about you, but i sort of calm him down, by telling him to work hard, and aim high.”

 

Ua le tautala le tamaloa i lea taimi, ae ua na o le punou ma ona loimata. Ua toe fesili Roger i a Filipina, po’o a la ana mea o lo’o fai i totonu o lea faleoloa tele, na tali ane i ai Filipina, o le faleoloa a la’ua ma si a la tama. Ua atili ai ona maligi ifo loimata o Roger ma fusi mai Filipina.

 

Ua fa’ate’ia Filipina, ina ua to’atuli nei Roger ma fai lana fa’ato’esega, ua a’apa atu nei Filipina ma fa’atu a’e i luga. Ae, ua le utufia loimata o le tamaloa i lea taimi. Na pau le tali na tu’u i ai e Filipina, ua lagona le fiafia o lona loto, ina ua toe fo’i mai, pau lava lea o le mea sa ia tatalo ma talosia i aso uma, ia ona maua le malosi ma e i ai lava se aso e toe fo’i mai ai ia te ia ma si ana tama.

 

Ua fa’ailoa nei e Filipina i a Roger, talu ona alu ‘ese atu, e le i toe i ai lava se isi ona mafaufau e toe fai sona to’alua, ua lava Ali’ioaiga ma sa avea lava si a la tama ma fa’amama avega ia te ia i aso uma. Na tonu nei i le mafaufau o Filipina, ua tatau ona tu’umuli i lo la fale, se fai se fa’amalosi tino ma se fa’aauau ai le la talanoaga.

 

O le taimi lea, o lo’o fa’atali pea Semo, mo le totogi o lana ta’avale, ua le toe alu ‘ese, o le ua maua nei le ‘au o le paipa, o le to’alua lea o Filipina. Na fa’apea nei mafaufau o le ave ta’avale, letioa lava a ‘ese a uiga o le lo’omatua, lea o lo’o i ai se tasi o fa’atalitali i ai, tago i ai Filipina, ua e manumalo i lou onosa’i ma lou fa’apalepale.

 

E faia pea.....

Comment Here