Onosa’i I Mea Tiga

Vaega: 13

 

Fa’atalofa atu i le mamalu o le atunu’u i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Atua e, o ai ea o le a o matou o i ai, o lo’o i te Oe upu o le ola, o a lava fa’ama’i ma faigata o lo’o feagai ma i matou, matou te tutu i lo matou fa’atuatua i Lau Afio, mo lau fa’amalologa mo i matou, ae ia fo’i atu lava le vi’iga i Lau Afio e fa’avavau, amene.”

 

Na muta mai la tatou tala ina ua alu nei i le atoa le toeaina lea na o ane e si’ima’i i le lo’omatua foma’i lea o lo’o tau fofoina ia le lo’omatua o Malia. Fai mai le tala, ua alu nei i le atoa le matai lea, ae ua tau mane’e ifo i luga ma le toeaina o Mose. Na toe liliu ane nei Malia i a Mose ma tete ane i ai ona mata, “E Mose, ta inoino e, e a ua i ai se isi fa’asimolo ua e mana’o i ai, a, ua e le toe alofa i a te a’u, e te mane’e i fea, alu e alu, mea sili lava ua maua ou se’evae ma lou ie, ta inoino, a ou pologa ifo e fai mea o lou aiga, e te va’ai i ai, a ou oti, e muamua lava ou ‘aia lou ulu, ua e fa’alogo mai, e te va’ai i ai, po’o le a lava le malosi o le ato ‘ofe na  maua ai oe, e uma ona ou galia le ‘ato ‘ofe, ou liliu atu gali ma oe.”

 

Ua pupula to’a ane nei le lo’omatua foma’i, ua le mautonu lona mafaufau, po’o le a le uiga o le mea lea ua tupu, e foliga mai, o lea e fai malamalama lava faiga a le lo’omatua o Malia. Na ona uma lava o tala ia a Malia i si ona to’alua o Mose, tu sasa’e a’e loa i luga ma fa’apea lana tala i le lo’omatua fai vai, “Se na o lo’u fia alu i le vai se, o a nei mea pepelo fa’apea, e leai ni aitu, soia ia le faia o nei mea pepelo e leai se isi e malosi ai, ae na o le fia o ai i le faleta’ele.”

 

Fai mai, ua tu a’e nei i luga ma le lo’omatua foma’i, “ E Malia, ia o ai oe, a, o ai oe, lou meaola, ou te le iloa po’o ai oe, a sau sau nei e fia malosi a’o lea e taumafai atu le vai ae e tautala le mafaufau mai, ia alu e alu, e te va’ai i ai, o na nei e te uma ai e, o la’u tala lena e fai atu, ta inoino i lenei aumatua, po’o ai lea maile e ou mai fa’apea, o ‘ese vave nei ma lo’u fanua.”

 

E pei o le ‘emo o le uila le tula’i o Mose i lea taimi, e o’o fo’i i le la fanau, ua leai se isi na toe tautala, ua alu nei le solo e aga’i atu i le ta’avale na o ane ai. A’o le matai e onaina le ta’avale lea na o ane ai, ua nofonofo nei i totonu o le ta’avale ua le toe aliali ane i fafo. Ua fa’ate’ia le toeaina o Lefefe ina ua nofo ane i ona talane le toeaina o Mose. Ae ua nonofo mai i tua o le ta’avale ia Malia ma lana fanau o Lilo ma Filipina, e leai ma se tasi na fai ane se tala i lo la tina.

 

Fai mai, ua na o le tilotilo ane o tamaiti i lo la tina ma le alofa, i le va’ai ane i le tigaina o lo’o i ai le lo’omatua. Na i’u lava ina soso ane i ai Filipina, “Malia, o fea nei la o le a tatou o e ave i ai oe, ua uma vai, uma fo’i foma’i Samoa, o fea nei o le a tatou o e ave i ai oe, se i fesoasoani i lou ma’i.”

 

Ua a’apa ane nei le lo’omatua ma u’u mau le lima o si ana tama i lea taimi, ua maligi ifo ona loimata. Na geno ane nei i lana tama o Lilo e soso ane i ona tafatafa, ma ua fai lava e le tama. Na a’apa ane nei le lo’omatua ua fusi mai si ana fanau, aua e na o le to’alua lava, ae se i vagana ai Luisa ma Vesi, o lo’o fa’amuli mai i le fale ma le la fanau, ma tapena le mea’ai e fa’atali mai ai le si’iga ma’i.

 

“Lilo ma Filipina, afai lava o lo’u ma’i lenei, ua ou talia lava, afai lava o le finagalo o le Atua o lo’u ma’i lenei, ua lava fo’i lea, pau le mea o lo’o pologa ai lo’u mafaufau, o oulua ma si o oulua tama, ae ou te talia ma le onosa’i lenei ma’i ua ou maua ai.”

 

E faia pea...

Comment Here